Ezekiel 13 - Mbeti ti Nzapa - Tënë so amu fini

Tënë na ndö ti awayanga-nzapa ti mvene

¹ Tënë ti *KOTA GBIA asi na mbi, atene:

² “*Molenge ti zo, tene peko ti tënë ti yanga ti mbi na tere ti awayanga-nzapa ti Israel, ala so ayeke tene peko ti tënë so alondo na be ti ala wani so. Mo tene na ala ti ma tënë ti mbi.

³ Tënë so mbi Kota Gbia NZAPA, mbi tene ayeke so: Mawa na ala, awayanga-nzapa so ahinga ndo pepe! Ala so abaa ye oko pepe si ala mu gi atënë ti ya ti li ti ala si ayeke tene so.

⁴ Azo ti Israel, awayanga-nzapa ti ala aga tongana anzagua na ndo so ada atuku kue na sese!

⁵ Awayanga-nzapa ni ague ti kanga adu ti gbagba pepe, ala leke gbagba pepe ti bata ala, azo ti Israel, na ngoi ti bira, na *lango ti KOTA GBIA.

⁶ Aye so ala baa na ya ti mbeni ye tongana bango-li ayeke mvene si bango nda ti aye ti ala ayeke ti handa na azo. Ala yeke tene: ‘So tënë ti yanga ti KOTA GBIA laa’, andaa mbi KOTA GBIA laa, mbi tokua ala pepe. Me ala yeke ku titene mbi sara si tënë ti ala aga taa-tënë!

⁷ Mbi hunda ala, mbi tene: ‘Ye so ala baa na ya ti mbeni ye tongana bango-li ayeke mvene pepe? Bango nda ti aye ti ala ayeke ti handa na azo pepe? Ala yeke tene: So tënë ti yanga ti KOTA GBIA laa, andaa mbi laa mbi tene tënë ni pepe!

⁸ Ndani laa, tënë so mbi Kota Gbia NZAPA, mbi tene ayeke so: Ndali ti so ala yeke tene gi atënë ti li ti ala wani si aye so ala baa na ya ti mbeni ye tongana bango-li ayeke ti handa na azo, mbi yeke ga na tere ti ala.’ So tënë ti yanga ti Kota Gbia NZAPA laa.

⁹ “Mbi yeke fa ngangu ti mbi na awayanga-nzapa so ayeke baa ye na ya ti mbeni ye tongana bango-li si ayeke mvene si bango nda ti aye ti ala ayeke ti handa na azo. Fade ala yeke duti na ya ti bongbi ti azo ti mbi pepe; a yeke su iri ti ala pepe na ya ti mbeti so a su iri ti azo ti Israel na ya ni, gere ti ala ayeke kiri ti do sese ti Israel pepe. Tongaso, fade ala yeke hinga atene, mbi laa mbi yeke Kota Gbia NZAPA.

¹⁰ “Awayanga-nzapa ni ayeke handa azo ti mbi, atene: ‘Siriri ayeke daa’, andaa siriri ayeke daa pepe. Azo ti mbi ayeke sara gbagba, me ti awayanga-nzapa ni, ala duti ti ala gi ti leke tere ni na potopoto.

¹¹ Mo tene na azo so ayeke leke tere ti gbagba ni, mo tene: Fade mbeni kota ngu-Nzapa ayeke pika, *apembe ti bekpa ayeke tuku, kota pupu ti ngu-Nzapa ayeke ya si gbagba ni ayeke tuku na sese gburrr!

¹² Tongana gbagba ni atuku na sese, fade azo ayeke hunda ala atene: potopoto so ala zia na tere ni asara kua ti nyen?

¹³ Ndani laa, tënë so mbi Kota Gbia NZAPA, mbi tene ayeke so: Na lege ti ngonzo ti mbi ti wâ, mbi yeke sara titene ngangu pupu ti ngu-Nzapa alondo; na lege ti ngonzo ti mbi, mbi yeke sara titene kota ngu-Nzapa apika si apembe ti bekpa atuku ti buba ye kue.

¹⁴ Gbagba so ala leke tere ni na potopoto so, mbi yeke kinda ni na sese si agere ni aduti na gigi. Gbagba ni ayeke tuku na sese si ala yeke kui na gbe ti atêne ni. Tongaso, fade ala yeke hinga atene, mbi laa mbi yeke KOTA GBIA.

¹⁵ Mbi yeke tuku ngonzo ti mbi ti wâ na ndö ti gbagba ni nga na ndö ti azo so aleke tere ni na potopoto ngbii be ti mbi ade si. Mbi yeke tene na ala, mbi tene: ‘Ti gbagba ni awe! Ti azo so aleke tere ni awe!

¹⁶ Ti ala awe, awayanga-nzapa so ayeke tene lani tënë ti peko ti yanga ti Nzapa na ndö ti Jérusalem si ala yeke baa ye na ya ti mbeni ye tongana bango-li, ala yeke tene, siriri ayeke daa, andaa siriri ayeke daa pepe!’ So tënë ti yanga ti Kota Gbia NZAPA laa.”

Tënë na tere ti awali ti sarango mazi

¹⁷ “Ti mo, *molenge ti zo, mo baa ndo fadeso na mbage ti awali ti kodro ti mo so ayeke tene peko ti tënë ti yanga ti Nzapa so alondo na be ti ala wani. Mo tene peko ti tënë ti yanga ti mbi na tere ti ala.

¹⁸ Fade mo yeke tene: Tënë so mbi Kota Gbia NZAPA, mbi tene ayeke so: Mawa na ala, awali so ayeke fu anduru yanga ti bongo ti sara na kati ti amaboko kue! Ala yeke sara abongo ti bingo na li alingbi na yongo ti azo kue. Ala yeke sara tongaso ti gbu fini ti azo ni. Ala ye ti gbu fini ti azo ti mbi si ala ye ti bata fini ti ala wani!

¹⁹ Ala bi buba na tere ti mbi na le ti azo ti mbi ndali ti kete le ti *orze nga ndali ti nduru mapa. Ala yeke tene mvene na azo ti mbi so ayeda ti ma atënë ti mvene ti ala, awali ni. Tongaso ala yeke fâ azo so alingbi na kuâ pepe si ala yeke bata azo so alingbi na kuâ.

²⁰ Ndani laa, tënë so mbi Kota Gbia NZAPA, mbi tene ayeke so: Mbi ke anduru yanga ti bongo ti ala so ala yeke gbu fini ti azo na ni. Mbi yeke suru ya ni si mbi yeke zi ni na maboko ti ala; mbi yeke zi azo so ala gbu fini ti ala so.

²¹ Mbi yeke suru ya ti abongo so ala yeke bi na li ti ala si mbi yeke zi azo ti mbi na maboko ti ala. Azo ti mbi ayeke kiri ti ti na ya ti kuku ti ala pepe. Tongaso, fade ala yeke hinga atene, mbi laa mbi yeke KOTA GBIA.

²² Na lege ti mvene ti ala, awali ni, ala sara si be ti azo ti mbirimbiri awoko, ataa so mbi laa mbi zia vundu na be ti azo ti mbirimbiri ni pepe. Ala mu ngangu na be ti azo ti sioni si ala lingbi ti zia lege ti sioni ti ala pepe ti ngba na fini.

²³ Ndali ni, ye so ala yeke baa na ya ti mbeni ye tongana bango-li si ayeke mvene, ala yeke kiri ti baa ni pepe; bango nda ti aye so ala yeke baa ti handa na azo, ala yeke kiri ti baa ni pepe. Fade mbi yeke zi azo ti mbi na maboko ti ala. Tongaso, fade ala yeke hinga atene, mbi laa mbi yeke KOTA GBIA.”