Ezekiel 11 - Mbeti ti Nzapa - Tënë so amu fini

A yeke fâ ngbanga na ndö ti Jérusalem ndali ti asioni ti lo

¹ Yingo ti *KOTA GBIA ayo mbi na nduzu si ague na mbi na yanga ti kota da ti Nzapa ti mbage ti To. Taa na yanga ti da ni, akoli baleuse na oku ayeke kâ. Na popo ti ala, mbi baa amakonzi use ti azo, Yazania, molenge ti Azur, na Pelatia, molenge ti Benaya.

² Yingo ni atene na mbi: “*Molenge ti zo, baa, azo so laa aleke na be ti ala ti sara asioni ye si ala yeke mu asioni wango na ya ti gbata so!

³ Ala yeke tene: ‘E yeke nduru ti sara ada ge fafadeso pepe. Gbata ni ayeke tongana tawa; ti e, e yeke kasa so ayeke na ya ni.’

⁴ Ndani laa, alingbi mo tene peko ti tënë ti yanga ti mbi na ndö ti ala. Molenge ti zo, tene peko ti tënë ti yanga ti mbi na ndö ti ala!”

⁵ Yingo ti KOTA GBIA agbu mbi si amu yanga na mbi, atene: “Tënë so KOTA GBIA atene ayeke so: Ala azo ti Israel, tënë so ala yeke tene, mbi ma ni! Aye so ayeke ga na li ti ala, mbi hinga ni.

⁶ Ala fâ azo gbani gbani na ya ti gbata so, asara si akuâ asi singo na ndö ti alege.

⁷ Ndani laa, tënë so mbi Kota Gbia NZAPA, mbi tene ayeke so: gbata ni ayeke tongana tawa ni, kasa ni ayeke azo so ala fâ ala. Me ti ala, fade mbi yeke tumba ala na ya ti gbata ni.

⁸ Mbeto ti bira ayeke sara ala? Ala ku, fade mbi yeke tokua bira na tere ti ala. So tënë ti yanga ti Kota Gbia NZAPA laa.

⁹ Mbi yeke tumba ala na ya ti gbata ni si mbi yeke zia ala na maboko ti awande; mbi yeke fâ ngbanga na li ti ala.

¹⁰ Mbi yeke fâ ngbanga na li ti ala taa na ndö ti sese ti Israel si ala yeke kui na ya ti bira. Tongaso, fade ala yeke hinga atene, mbi laa mbi yeke KOTA GBIA.

¹¹ Gbata ni ayeke ga ande tongana tawa ti batango ala pepe, ala yeke ga kasa so ayeke na ya ni pepe. Me fade mbi yeke fâ ngbanga na li ti ala taa na ndö ti sese ti Israel.

¹² Tongaso, fade ala yeke hinga atene, mbi laa mbi yeke KOTA GBIA, mbi so ala ke ti sara ye alingbi na aye so mbi fa, ala ke ti sara ye alingbi na atënë ti ndia ti mbi. Me ala mu gi peko ti lege ti sarango ye ti amara nde so angoro ala.”

¹³ So mbi ngba ti tene peko ti tënë ti yanga ti Nzapa so, Pelatia, molenge ti Benaya angba akui. Mbi ti, mbi kpo li ti mbi na sese si mbi dekongo ngangu, mbi tene: “Ae, Kota Gbia NZAPA! Mo ye ti hunzi tanga ti azo ti Israel ni kue?”

Fade KOTA GBIA ayeke bongbi azo so akangbi lani na popo ti amara nde

¹⁴ Tënë ti *KOTA GBIA asi na mbi, atene:

¹⁵ “*Molenge ti zo, azo ti Jérusalem ayeke mu wango na taa a-ita ti mo, asongo ti mo nga na azo ti Israel so kue a gbu ala, a gue na ala na kodro wande, atene: ‘Ala ngba yongoro na KOTA GBIA; sese so ge, a mu na e si aga ti e awe.’

¹⁶ Tongaso, tene na amba ti mo so a gbu mo na ala si a gue na ala na kodro wande so, mo tene: Tënë so mbi Kota Gbia NZAPA, mbi tene ayeke so: ‘Ataa mbi tokua ala na akodro yongoro, ataa mbi kangbi ala na popo ti amara nde, kâ kue, mbi yeke na popo ti ala tongana ti so mbi yeke na ya ti da ti mbi so ayeke nde si ayeke nzoni kue.’

¹⁷ Tongaso, mo tene na ala, mo tene: Tënë so mbi Kota Gbia NZAPA, mbi tene ayeke so: ‘Fade mbi yeke zi ala na popo ti amara nga na ya ti akodro so mbi kangbi ala daa ti bongbi ala; mbi yeke kiri ti mu na ala sese ti Israel.

¹⁸ Tongana ala, azo ti Israel, ala kiri awe, ala yeke zi afungo yanda kue na asioni ye so kue zo alingbi ti baa na le ti lo fani use pepe so.

¹⁹ Fade mbi yeke mu na ala be oko, mbi yeke zia na ya ti ala fini yingo; mbi yeke zi be ti ala so akpengba tongana têne si mbi yeke mu na ala be ti zo.

²⁰ Tongaso, fade ala yeke sara ye alingbi na aye so mbi fa nga na atënë ti andia ti mbi. Fade ala yeke duti azo ti mbi si mbi yeke duti Nzapa ti ala.

²¹ Me ti azo so be ti ala angba na vorongo ayanda nga na asioni ye so zo alingbi ti baa na le ti lo fani use pepe so, mbi yeke futa ala alingbi na lege ti sarango ye ti ala.’ So tënë ti yanga ti Kota Gbia NZAPA laa.”

KOTA GBIA alondo na Jérusalem ahon

²² Tongaso, *asheruben azi ya ti *akpangi ti ala, aruu ni ayeke na tere ti ala. Gonda ti Nzapa ti Israel ayeke na ndö ti ala, na nduzu.

²³ Na pekoni, gonda ti *KOTA GBIA alondo na be ti gbata ni ague na nduzu si aluti na ndö ti hoto ti mbage ti To ti gbata ni.

²⁴ Gi na ya ti oko ye so mbi baa na ya ti mbeni ye tongana bango-li, yingo ti Nzapa amu mbi na nduzu; lo kiri na mbi na Babilone na tere ti azo ti Israel so a gbu ala si a gue na ala kâ so. Tongaso, ye so mbi baa na ya ti mbeni ye tongana bango-li so, alondo na ndö ti mbi ahon.

²⁵ Mbi tene na azo so kue a gbu ala si a gue na ala na Babilone, peko ti aye so kue Nzapa afa na mbi si mbi baa so.