Esther 6 - Mbeti ti Nzapa - Tënë so amu fini

Gbia amu nengo na Mardochée

¹ Na bi ni so, gbia aye ti lango, lo lango gbaa. Tongaso lo hunda titene a ga na lo ambeti-sango ti ngu oko oko ti kodro ni; so ti tene mbeti so a su akota tënë ti kodro ni daa so. A ga na mbeti ni si a diko ni na lo.

² So azo ni angba ti diko mbeti ni, le ti ala ati na ndö ti tënë ti Mardochée so lo sigigi na nda ti Bigtan na Teresh, *ambaiwa use ti gbia so ayeke azo ti batango yanga ti ada ti lango ti gbia. Ala gi lege lani ti fâ gbia Zerses.

³ Tongaso gbia ahunda atene: “Nzoni ye ti nyen laa a sara na Mardochée ndali ti ye so lo sara so? Nyen laa a sara ti mu nengo na lo, nyen?” Azo ti kua ti gbia ni akiri tënë: “A sara ye oko pepe!”

⁴ Gbia ni atene: “Zo wa laa ayeke na le ti kodro so, zo wa?” Andaa gi na ndembe ni so, Haman ayeke li na ya ti gbagba ti yangbo ni. Lo ga ti hunda na gbia titene gbia amu yanga si a kanga go ti Mardochée na nduzu na tere ti keke so Haman aleke awe ndali ti Mardochée.

⁵ Azo ti kua ti gbia akiri tënë: “Haman laa ayeke luti na le ti kodro so.” Gbia akiri atene: “Lo li ma!”

⁶ Haman ali si gbia ahunda lo, atene: “Mbeni zo ayeke daa so gbia aye ti mu nengo na lo. Nyen laa lo lingbi ti sara ndali ti zo ni, nyen?” Haman atene na be ti lo, atene: “Mbeni zo nde ayeke daa so gbia alingbi ti mu nengo na lo? Gbaa, zo ni ayeke gi mbi wani-aa!”

⁷ Haman akiri tënë na gbia, atene:

⁸ “Ayeke nzoni a mu mbeni bongo ti gbia so gbia ayu ni awe, a ga na ni na zo ni; a mu nga mbeni mbarata so gi gbia ako na ndö ti lo a ga na lo si a zia kpoto ti gbia na li ti mbarata ni.

⁹ Na pekoni, a mu mbeni kota zo ti kua ti mo oko, lo so azo ane lo mingi so titene lo yu bongo ni na zo ni. Fade lo mu maboko na zo ni ti ko na ndö ti mbarata ni, lo gbu kamba ti mbarata ni si lo yeke tambula na zo ni na ndö ti kota balabala ti gbata ni si lo yeke to mbela na dawa ti zo ni, lo tene: ‘Ye so gbia ayeke sara ndali ti zo so lo ye ti ne lo laa-oo!’ ”

¹⁰ Gbia akiri tënë na Haman, atene: “Nzoni mingi! Gue hio, mo mu bongo ni na mbarata ni si mo sara tongana ti so mo fa so ndali ti Mardochée, zuife so ayeke sara kua na yanga ti yangbo so. Mo zi mbeni ye oko na ya ti aye so mo fa so pepe.”

¹¹ Haman ague, amu bongo ni nga na mbarata ni si aga na ni. Lo yu bongo ni na Mardochée si na pekoni lo tambula na Mardochée na ndö ti kota balabala ti gbata ni kue si lo yeke to mbela, lo tene: “Ye so gbia ayeke sara ndali ti zo so lo ye ti ne lo laa-oo!”

¹² Na pekoni, Mardochée akiri na ndo ti kua ti lo na yanga ti yangbo ni. Me Haman akiri na loro na ndo ti lo; kamene ahon ndö ti lo si lo kanga le ti lo na bongo.

¹³ Haman afa na wali ti lo Zeresh nga na amba ti lo so lo na ala aye tere mingi peko ti aye so kue asi so. Wali ti lo Zeresh na amba ti lo so ayeke azo ti ndara atene na lo, atene: “Mardochée so mo to nda ti ti na gbe ti lo awe so ayeke biani zuife; tingo ti mo kue kue kue na gbe ti lo laa. Mo yeke gbu le ni ande na lo pepe.”

¹⁴ Gi so ala ngba ti tene tënë na lo tongaso, ambaiwa ti gbia asi, ala iri Haman ti gue hio na matanga ti tengo kobe so Esther aleke.