Esther 5 - Mbeti ti Nzapa - Tënë so amu fini

Esther aleke matanga ndali ti gbia Zerses na Haman

¹ Na peko ti lango ota so Esther ake kobe, lo yu bongo ti lo ti gbia-wali si lo gue, lo luti na ya ti gbagba ti yangbo ti gbia ni; lo luti na ndo so ayeke baa ndo na ndo so gbia ayeke duti ka daa. Andaa gbia ni ayeke na ya ti yangbo ni, lo duti na ndö ti mbata ti lo so ayeke baa ndo na yanga ti yangbo ni.

² So lo baa wali ti lo Esther so ayeke luti na le ti kodro ni kâ na gigi, gbia asara nzoni be na lo: lo yoro na Esther keke ti gbia so a sara ni na lôro so ayeke na maboko ti lo; Esther ague nduru si lo ndu li ti keke ni.

³ Gbia ahunda lo, atene: “Esther, wali ti gbia, nyen? Nyen laa mo hunda, nyen? Mbi yeke nduru ti mu na mo ye ni, ataa ndambo ti kodro ti mbi!”

⁴ Esther akiri tënë: “Gbia, tongana be ti mo aye, fade mo na Haman aga na da ti mbi laso ndali ti matanga ti tengo kobe so mbi leke ndali ti mo.”

⁵ Gbia atokua azo ti lo, lo tene: “Ala gue hio airi Haman, lo ga, e gue na matanga ti tengo kobe so Esther atisa e daa.” Gbia na Haman alondo si ala gue na matanga so Esther aleke ni.

⁶ So ala hunzi ti te kobe awe, gbia atene na Esther, atene: “Mo ye nyen? Fade a yeke mu ni na mo. Nyen laa mo hunda nyen? Mbi yeke nduru ti mu na mo ye kue, ataa ndambo ti kodro ti mbi!”

⁷ Esther akiri tënë: “Ye so mbi ye? Ye so mbi hunda?

⁸ Babâ gbia, tongana mo ye ti sara nzoni be na mbi, wala tongana be ti mo aye ti mu na mbi ye so mbi hunda na mo, ayeke nzoni mo na Haman akiri aga kekereke na matanga ti tengo kobe so mbi leke ndali ti ala. Tongaso fade mbi yeke fa na mo mbirimbiri ye so mbi ye.”

Haman aleke na be ti lo ti fâ Mardochée

⁹ Gi na lango ni so, Haman asigigi na da ti Esther, wali ti gbia, ti gue na nzerengo tere nga na kota ngia na be ti lo. Me gi so lo si na yanga ti yangbo ni, lo baa so Mardochée aye ti londo pepe, wala lo ye ti ne lo pepe; tongaso be ti lo asi na ngonzo na tere ti Mardochée.

¹⁰ Me Haman akanga be ti lo si lo gue na da ti lo. Na pekoni, lo tokua titene a iri amba ti lo so lo na ala aye tere mingi nga na wali ti lo Zeresh.

¹¹ Lo to nda ti fa na ala gba ti mosoro so lo yeke na ni, gba ti amolenge so lo yeke na ni; lo fa nga na ala lege so gbia amu nengo mingi na lo; lege so lo zia lo ti ga makonzi na ndö ti akota zo nga na ndö ti azo ti kua ti gbia kue.

¹² Haman akiri atene: “Na ndö ni kue, gi mbi oko laa Esther, wali ti gbia, atisa mbi ti mu peko ti gbia ti gue na matanga ti tengo kobe so lo leke ni laso. Kekereke nga, gi mbi na gbia si lo kiri lo tisa e ti gue!

¹³ Me ye so kue ayeke senge na le ti mbi tongana mbi ngba ti baa Mardochée, zuife so ayeke sara kua kâ na yanga ti yangbo ti gbia so.”

¹⁴ Tongaso Zeresh, wali ti Haman, lo na azo so kue Haman na ala aye tere mingi atene na lo: “Ayeke nzoni a leke mbeni keke so ayo na nduzu metere baleuse na oku. Kekereke na ndaperere, mo tene na gbia titene a kanga go ti Mardochée na tere ti keke ni na nduzu. Tongaso si mo lingbi ti duti na ngia ti gue na matanga ti tengo kobe ni, mo na gbia.” Tënë ni anzere na be ti Haman si lo hunda titene a kpo keke ni na nduzu.