Esther 3 - Mbeti ti Nzapa - Tënë so amu fini

Haman na Mardochée ama tere pepe

¹ Na peko ti aye so, gbia Zerses amu nengo mingi na Haman, molenge ti Hamedata, mbeni *hale ti Agag. Gbia azia Haman na kota ndo si lo ga kozo gbenyogbia.

² Gbia amu yanga titene azo kue akuku akpo li ti ala na sese na gbe ti Haman. Nilaa azo so kue ayeke sara kua na yanga ti yangbo ti gbia ayeke kuku si ayeke kpo li ti ala na sese na gbe ti Haman. Me Mardochée ake ti kuku na gbe ti lo.

³ So tanga ti azo ti kua ti yangbo ti gbia abaa ye ni tongaso, ala hunda Mardochée, atene: “Ngbanga ti nyen si mo yeke sara ngangu li na ndia ti gbia so?”

⁴ Lakue ala yeke tene tënë na lo na ndö ti ye ni so, me lo ma ala pepe. Tongaso lo tene na ala: “Mbi yeke ti mbi zuife”. So ala ma tënë so awe, ala gue si atene tënë ni na Haman ti baa wala Mardochée ayeke ngba gi na ndö ti tënë ti lo ni.

⁵ So Haman abaa biani so Mardochée ake ti kuku na gbe ti lo si ake ti kpo li ti lo na sese, be ti lo asi na ngonzo mingi.

⁶ So lo ma a tene, Mardochée ayeke zuife, lo leke na be ti lo ti fâ Mardochée. Me titene lo fâ gi lo oko, so ayeke lingbi pepe. Nilaa lo ye ti fâ azuife so kue ayeke lango na ya ti kodro so Zerses ayeke gbia daa.

⁷ Na ngu baleoko na use so Zerses aga gbia, na kozo nze so iri ni nze ti Nisan, Haman amu yanga titene a bi zeke so iri ni purim. Ala bi zeke ni ti mu lege na ala ti hinga lango wa na nze wa so ala lingbi ti fâ azuife ni. Zeke ni afa nze ti Adar so ayeke nze baleoko na use ni.

Haman aleke tënë ti fâ azuife kue ti hunzi ala

⁸ Haman atene na gbia Zerses: “Babâ gbia, mbeni mara ayeke na ya ti kodro so ayeke ti lo nde. Azo ti mara ni amu ya ti kodro ti mo kue si ala yeke duti ti ala nde na azo ti kodro ni. Lege ti dutingo ti ala na sarango ye ti ala ayeke nde na ti ambeni mara; ala ye ti sara ye alingbi na andia ti gbia pepe. Tongana mo zia ala duti kpoo tongaso, mo yeke wara nyen daa?

⁹ Gbia, tongana be ti mo aye, fade mo su maboko ti mo na gbe ti mbeni ndia ti mu lege na e ti fâ ala kue. Fade mbi yeke mu na akota zo so ayeke baa ndo na ndö ti amosoro ti gbia wen ti nginza so nengo ni ayeke kilo saki ngbangbo ota titene ala tuku ni na ya ti sanduku ti nginza ti gbia.”

¹⁰ Gbia azi bage so ayeke na li ti maboko ti lo si lo mu na Haman, wato ti azuife. Haman ayeke molenge ti Hamedata si lo yeke nga mbeni hale ti Agag.

¹¹ Na pekoni, gbia atene na Haman: “Bata nginza ni! Ti azo ni so, mbi zia tënë ti ala na maboko ti mo; fade mo sara ye so be ti mo aye na ala.”

¹² Na lango baleoko na ota ti kozo nze ni, a tokua titene a iri awakuasu ti gbia ti ga. Ala ga si ala su na mbeti atënë ni kue alingbi gi na yanga so Haman amu na ala. Na pekoni ala tokua mbeti ni na akota komanda, agovoronere ti akodro-sese oko oko nga na amakonzi ti amara oko oko kue. Awakuasu ni asu ambeti ni na lege ti kode ti sungo mbeti nga na yanga ti kodro ti azo ni oko oko kue. Awakuasu ni asu iri ti gbia Zerses daa si ala kpo nzoroko ti lo na ndö ni.

¹³ Ala mu ambeti ni na azo ti tokua ti gbia si azo ti tokua ni ague na ni na ya ti akodro-sese ni oko oko kue. Tënë ti ya ti mbeti ni ayeke tongaso: “Ala gbu azuife kue, amaseka na akangba, amolenge na awali kue gi na ya ti lango oko; ala fâ azo ni kue ahunzi ala, mbeni oko angba pepe. Ala gbu akungba ti azo ni si aga ti ala. Ala sara ye so kue gi na ya ti lango oko, mbirimbiri na lango baleoko na ota ti nze baleoko na use ni so a iri ni nze ti Adar.”

¹⁴ Na ya ti kodro so kue mbeti ni asi daa, tënë ti ya ni aga ndia so zo ayeke sara ye alingbi na ni, tongaso si zo so kue ama tënë ni alingbi ti leke tere ti lo ti ku na lango ni so.

¹⁵ Gi so gbia amu yanga awe, azo ti tokua ni asigigi na kota loro si ala gue na ambeti ni. Azo atambula na ya ti kota kodro ti Suze kue ti fa na azo tënë ti ndia so. Tongaso gbia na Haman aduti ti nyon ye. Me li ti azo ti gbata ti Suze kue aga kirikiri.