Esther 2 - Mbeti ti Nzapa - Tënë so amu fini

Esther aga wali ti gbia

¹ Na peko ti aye so, ngonzo ti gbia Zerses ade; lo dabe ti lo na Vasti, ye so Vasti asara nga na mbela so a mu na tere ti lo.

² Ambeni maseka-koli so ayeke sara kua na lo atene na lo: “Ayeke nzoni a gi na gbia amaseka-wali so akono nzoni, tere ti ala ayeke za zango si ade ala hinga koli pepe.

³ Ayeke nzoni lo zia akota zo so ayeke na ya ti akodro-sese ti lo kue ti bongbi apendere maseka-wali kue si aga na ala na da ti awali ti gbia so ayeke na kota kodro ti Suze. Fade Hege, *mbaiwa so ayeke zo ti batango awali ti gbia ayeke baa ndo na ndö ti ala. Lo laa lo yeke mu ande na ala aye ti sarango na pendere ti ala.

⁴ Maseka so gbia ayeke ye lo ahon ndoni, lo laa lo yeke ga ande wali ti gbia na peko ti Vasti.” Tënë so anzere na be ti gbia si lo ye gbe ni.

⁵ Mbeni zuife oko ayeke lango na ndembe ni so na kota kodro ti Suze; iri ti lo Mardochée, molenge ti Yair, *hale ti Shimei na ti Kish, zo ti mara ti Benjamin.

⁶ Andaa Mardochée ayeke lani na popo ti azo so gbia Nabukodonosor agbu ala na Jérusalem si ague na ala na Babilone. Yekonia, gbia ti Juda ayeke nga na popo ti azo ni.

⁷ Hadasa, so a iri nga lo Esther ayeke molenge ti ita ti babâ ti Mardochée ti koli. Babâ na mama ti Esther akui awe, nilaa Mardochée amu lo si ayeke bata lo. Lo yeke maseka-wali so tere ti lo ayeke za zango si pendere ti lo ahon ndoni.

⁸ Na peko ti yanga so gbia amu nga na peko ti mbela ti lo ni, azo abongbi amaseka-wali gbani gbani si aga na ala na Suze, kota kodro ni; na popo ti amaseka-wali ni Esther ayeke daa. A gue na Esther na yangbo ti gbia si a zia lo na da so awali ayeke lango daa. Hege, so ayeke zo ti batango awali ti gbia si ayeke baa ndo na ndö ti lo.

⁹ Tënë ti Esther agbu be ti Hege mingi, tongaso lo sara nzoni be na lo. Gi hio tongaso, lo mu na lo aye ti sarango na pendere ti lo nga na anzoni kobe. Lo mu nga na lo amaseka-wali mbarambara so lo soro ala na popo ti azo ti kua ti yangbo ti gbia titene ala duti azo ti kua ti Esther. Hege azia lo titene lo na azo ti kua ti lo ni alango ti ala na ya ti da ti awali; da ni apendere ahon ti tanga ti awali ni kue.

¹⁰ Esther afa mara ti lo wala asongo ti lo na zo oko pepe, ngbanga ti so Mardochée ake na lo titene lo fa ni.

¹¹ Mardochée ayeke tambula lakue, lo si kâ, lo si ge na yanga ti gbagba ni titene lo hinga tënë na ndö ti dutingo ti Esther nga na ndö ti ye so ayeke si na lo.

¹² Ndembe titene maseka-wali oko oko ague na tere ti gbia Zerses ayeke daa. Kozo titene ndembe ni alingbi, maseka-wali ni ayeke leke tere ti lo na ya ti ngu oko alingbi na ndia so a mu na awali oko oko: nze omene titene lo sara mafuta ti *mire na tere ti lo si tanga ti nze omene ni titene lo sara yombo na tere ti lo nga na ambeni mafuta so awali ayeke sara na tere ti ala titene aga pendere.

¹³ Lege ti guengo na tere ti gbia ni ayeke tongaso: so maseka-wali oko oko ayeke londo na da so lo yeke lango daa ti gue na yangbo ti gbia, a yeke mu na lo ye so kue lo hunda titene lo gue na ni.

¹⁴ Wali ni ayeke gue na tere ti gbia na lakui. Na kiringo ti lo na ndaperere, lo yeke gue na mbeni da nde. Shaashgaz, mbeni mbaiwa nde ti gbia laa ayeke zo ti batango awali so gbia amu ala na peko. Lo laa lo yeke mu wali ni ti gue na lo na ya ti da ni. Tongana wali ni ague awe, lo yeke kiri na tere ti gbia mbeni pepe; wali ni alingbi ti kiri na tere ti gbia gi tongana gbia wani asara nzara ti wali ni si lo iri wali ni taa na iri ti lo.

¹⁵ Ndembe ti Esther, molenge ti Abihail alingbi awe; Abihail ayeke ita ti babâ ti Mardochée, lo so abata Esther. So Esther alondo ti gue na tere ti gbia Zerses, lo hunda mbeni ye nde ti gue na ni pepe, me gi ye so Hege afa na lo. Hege ayeke mbaiwa si lo yeke nga zo ti batango awali ti gbia. Azo so kue ayeke baa Esther ayeke gonda lo.

¹⁶ Na ngu mbarambara so gbia Zerses aga gbia, na nze baleoko ni, so ti tene na nze ti Tebet, a mu Esther si a gue na lo na tere ti gbia kâ na yangbo ti gbia.

¹⁷ Gbia ni aye Esther ahon awali kue. Ndani laa lo nzere na le ti lo si lo ye ti sara nzoni be na lo ahon amaseka-wali so kue. Tongaso lo zia na li ti lo kpoto ti gbia si lo zia lo titene lo mu ndo ti wali ti lo Vasti.

¹⁸ Na pekoni, gbia Zerses aleke mbeni kota matanga ti tengo kobe na iri ti Esther ndali ti akota zo ti kua ti lo kue nga ndali ti akota zo ti akua nde nde kue. Lo mu yanga titene azo ti akodro-sese ni afuta lapo pepe; lo kangbi aye senge senge na azo tongana ti so gbia alingbi fade ti sara.

¹⁹ A kiri abongbi amaseka-wali ti fani use ni. Andaa na ngoi ni so, Mardochée ayeke sara kua na yanga ti yangbo ti gbia kâ.

²⁰ Esther afa mara ti lo wala asongo ti lo na zo oko pepe. Lo sara ye ni alingbi gi na yanga so Mardochée amu na lo. Esther angba ti ma yanga ti Mardochée gi tongana ti so lo yeke lani na gbe ti lo si lo yeke bata lo so.

Mardochée afa nda ti azo so aleke tënë ti fâ gbia Zerses

²¹ Na ngoi ni so, tongana Mardochée ayeke sara kua ti lo na yanga ti yangbo ti gbia kâ, ambaiwa use, Bigtan na Teresh so ayeke azo ti batango yanga ti ada ti lango ti gbia, aleke tënë na hondengo ni ti fâ gbia Zerses. Ala ye ti fâ lo, ngbanga ti so ala baa so lo sara na ala ye ti songo be mingi.

²² Mardochée ama tënë ni si lo mu tënë ni atene na gbia-wali Esther; Esther atene tënë ni na gbia na iri ti Mardochée.

²³ So azo agi nda ti tënë ni si ala baa so ye ni ayeke taa-tënë, ala gbu akoli use so akanga go ti ala na tere ti keke na nduzu. Na pekoni, taa na dawa ti gbia wani, ala su tënë ni na ya ti ambeti-sango ti ngu oko oko ti kodro-gbia ni.