Esdras 9 - Mbeti ti Nzapa - Tënë so amu fini

Azuife mingi amu awali wande ti ga wali ti ala

¹ Na peko ti aye so, amakonzi ti azo ti Israel aga atene na mbi: “Ataa asenge zo, ataa awayango-sandaga, ataa azo ti mara ti Lévi, mbeni zo so aduti nde na azo ti ambeni mara ayeke daa pepe. Ala sara gi asioni ye so zo alingbi ti baa na le ti lo fani use pepe; asioni ye so azo ti Kanaan, azo ti mara ti Het, ti Perizi, ti Yebus, ti Amon, ti Moab, ti Ezipte na ti Amori asara.

² Azo ti Israel amu amolenge ti amara ni so ti ga awali ti ala; ala mu nga amolenge ti amara ni so na amolenge ti ala ti koli ti ga awali ti ala. Nilaa azo so Nzapa azia ala nde ndali ti lo abongbi na azo ti kodro ni si ala ga oko. Amakonzi na akota zo ayeke akozo zo ti sara mara ti asioni ye mingi tongaso.”

³ So mbi ma tënë so, mbi suru bongo na tere ti mbi nga na yongoro bongo ti mbi, mbi gboto kua ti li ti mbi na kua ti yanga ti mbi, mbi duti na sese na gingo be.

⁴ Mbi ngba tongaso ngbii asi na ngbonga so a yeke mu *sandaga ti lakui. Azo mingi asara mbeto ti fango ngbanga ti Nzapa ti Israel ndali ti sioni ye mingi so azo so a gbu ala si ala kiri so asara; azo ni kue abongbi na tere ti mbi.

Esdras asambela Nzapa ndali ti azo so asara sioni

⁵ Na ngbonga ti mungo *sandaga ti lakui, mbi londo na ya ti vundu ti mbi. Abongo ti mbi na yongoro bongo ti mbi so a suru so angba na tere ti mbi. Mbi ti na sese na likunu ti mbi, mbi yoro maboko ti mbi na nduzu na *KOTA GBIA Nzapa ti mbi,

⁶ mbi sambela, mbi tene: “Nzapa ti mbi, kamene ahon ndö ti mbi tongana mbi yo le ti mbi na nduzu ti baa ndo na mbage ti mo. Siokpari ti e ayeke gbani gbani, ahon ndö ti li ti e; sioni ti e ague ngbii akpo le ti nduzu.

⁷ Ti londo na ngoi ti akotara ti e ngbii asi laso, e sara sioni ahon ndoni. Ndali ti siokpari ti e, e na agbia ti e, na awayango-sandaga ti e, e ti na gbe ti agbia ti amara nde; ala sara bira na e, ala gbu e ague na e na kodro wande, ala gbu aye ti e ahon na ni, ala bi kamene na le ti e, tongana ti laso so.

⁸ Me fadeso, gi na ya ti kete ngoi, KOTA GBIA Nzapa ti e, mo sara nzoni be na e. Mo sara si ambeni zo na popo ti e angba na fini si ala kiri ti duti na sese so mo zia ni nde ndali ti mo. Nilaa mo Nzapa ti e, mo zi le ti e, mo sara si e wara pasa ti duti na fini, ataa so e yeke na gbe ti ngbaa.

⁹ Biani, e yeke ando angbaa, me mo Nzapa ti e, mo zia e na ya ti ngbaa ni pepe. Mo sara si agbia ti Perse asara nzoni be na e; ala kiri fini na e si e lingbi ti leke kota da ti mo nga na agbagba ni so a kungbi ando na sese; e wara ndo so e lingbi ti duti daa na Jérusalem nga na sese ti Juda si sioni ye asi na e pepe.

¹⁰ “Fadeso, Nzapa ti e, e lingbi ti tene nyen na peko ti ye so asi so? Biani, e zia lege ti atënë ti ndia

¹¹ so mo fa na e na lege ti awayanga-Nzapa, azo ti kua ti mo! Lani mo gboto mê ti e, mo tene: ‘Sese so ala yeke gue ti mu ni titene aga ti ala so ayeke *sioni, ngbanga ti so amara so aduti na sese ni ayeke *sioni; ala sara si asioni ye so zo alingbi ti baa na le ti lo fani use pepe amu ndo kue na sese ni.

¹² Tongaso ala azo ti Israel, ala mu amolenge ti ala ti wali na amolenge-koli ti amara ni pepe; ala soro awali na popo ti azo ti amara ni pepe ti mu na amolenge ti ala ti koli. Ala gi nzoni dutingo na nzoni maingo ti amara ni pepe; tongaso si ala, azo ti Israel, ala lingbi ti ga ngangu mara, ala yeke te anzoni ye ti sese ni si ala yeke zia sese ni na amolenge ti ala titene aga ti ala kpu na kpu.’

¹³ Nzapa ti e, akpale so kue asi na e ndali ti asioni sarango ye ti e nga ndali ti kota sioni ye so e sara. Me mo fâ ngbanga na li ti e alingbi na asioni ti e ni pepe. Mo sara si e ngba na fini, e so e yeke ge so.

¹⁴ Fade e yeke kiri ti ke atënë ti ndia ti mo tongana nyen? E lingbi ti sara songo na lege ti mungo tere koli na wali na azo so sarango ye ti ala ayeke sioni mingi so tongana nyen? Tongana e sara tongaso, fade ngonzo ti mo ayeke londo na tere ti e si mo fâ e kue kue kue ti hunzi e pepe?

¹⁵ KOTA GBIA, Nzapa ti Israel, mo yeke mbirimbiri! Laso, mo sara si ambeni zo na popo ti e angba na fini. Baa, e laa na gbe ti mo na asioni ye ti e na li ti e so! Ndali ti aye tongaso, zo oko alingbi ti luti fade na le ti mo pepe.”