Esdras 5 - Mbeti ti Nzapa - Tënë so amu fini

¹ Me mbeni lâ, wayanga-Nzapa Aggée na wayanga-Nzapa Zakarii, molenge ti Ido atene peko ti tënë ti yanga ti Nzapa ti Israel, Nzapa ti ala, na azuife so ayeke na Juda nga na ala so ayeke na Jérusalem.

² Tongaso Zorobabel, molenge ti Shealtiel, lo na Yeshua, molenge ti Yosadak alondo ti leke kota da ti Nzapa so ayeke na Jérusalem. Awayanga-Nzapa amu maboko na ala.

³ Gi hio tongaso, Tatenai, govoronere ti sese so ayeke na Do ti ngu ti Efrate, na Shetar-Boznai na amba ti ala aga abaa ala si atene na ala: “Zo wa laa amu na ala yanga ti leke kota da ti Nzapa so, ti leke agbagba ni na nduzu, zo wa?

⁴ Ala mu na e iri ti azo so ayeke sara akua ni so!”

⁵ Me le ti Nzapa ayeke na ndö ti *akangba ti azuife. Nilaa a kanga lege na ala pepe ti leke kota da ti Nzapa. Azo ni atokua mbeti na gbia Darius si ala yeke ku titene lo kiri tënë na ala na ndö ni si.

A su mbeti na gbia Darius na tere ti azuife

⁶ So ayeke mbeti so Tatenai, govoronere ti sese so ayeke na Do ti ngu ti Efrate, lo na Shetar-Boznai na amba ti ala, akota komanda so ayeke na Do ti ngu ti Efrate asu si atokua na gbia Darius laa.

⁷ Tënë ti ya ti mbeti ni atene: “Gbia Darius, e bara mo, mo duti nzoni!

⁸ “Gbia, e ye ti fa na mo so e gue na kodro ti Juda si e si na kota da ti kota Nzapa. Azuife akiri ayeke leke da ni na akota têne so a de tere ni dengo, ala zia na ya ti dere ti da ni angbongboro keke. Ala yeke sara kua ni pendere mingi si akua ni ayeke gue gi na nduzu.

⁹ E hunda azo so ayeke na ndö ti akua ni si e tene: ‘Zo wa laa amu na ala yanga ti leke kota da so, ti leke agbagba ni na nduzu, zo wa?’

¹⁰ E hunda nga na ala iri ti ala, tongaso si e lingbi ti su na mbeti iri ti azo so ayeke na li ti akua ni ti tokua ni na mo.

¹¹ Ala kiri tënë na e, atene: ‘E yeke azo ti kua ti Nzapa ti yayu na ti sese. E yeke leke kota da so mbeni kota gbia ti Israel asara ni ando si kua ni ahunzi aninga ngu mingi fadeso awe.

¹² Me akotara ti e asara si ngonzo ti Nzapa ti yayu alondo. Nilaa lo zia ala na maboko ti Nabukodonosor, zo ti Babilone, gbia ti Kalde. Nabukodonosor akungbi da ni kue na sese si lo gbu azo ti Israel, lo gue na ala na Babilone.

¹³ Andaa na kozo ngu ni so Sirus ayeke gbia ti Perse, lo mu yanga titene a kiri a leke kota da ti Nzapa.

¹⁴ Gbia Nabukodonosor amu ando akungba so a sara na lôro nga na wen ti nginza so ayeke na ya ti kota da ti Nzapa na Jérusalem si lo gue, lo zia ni na ya ti da ti anzapa ti Babilone. Gbia Sirus azi akungba ni na ya ti da ti anzapa ti Babilone si lo mu na Sheshebasar so lo zia lo govoronere ti Juda.

¹⁵ Gbia Sirus amu yanga na Sheshebasar atene: Mo gue na akungba so, mo zia ni na ya ti kota da ti Nzapa ti Jérusalem; ayeke nzoni a kiri a leke kota da ti Nzapa gi na kozo ndo ni.

¹⁶ Nilaa Sheshebasar aga ge na Jérusalem, lo lu afini gere ti kota da ti Nzapa. Ti londo na ngoi ni so ngbii asi fadeso, kua ti da ni angba ti tambula, me ade ti hunzi pepe.’

¹⁷ Fadeso gbia, tongana mo baa nzoni na le ti mo, ayeke nzoni a gi na ya ti angbene buku ti mbai ti aye so agbia ti Babilone asara ti baa wala taa-tënë, gbia Sirus amu yanga ando biani titene a kiri a leke kota da ti Nzapa na Jérusalem. Ayeke nzoni a tokua na e tënë ti be ti mo na ndö ti tënë so.”