Esdras 4 - Mbeti ti Nzapa - Tënë so amu fini

Awato ti azuife akanga lege na lekengo kota da ti Nzapa

¹ Awato ti azuife ti mara ti Juda na ti Benjamin ama a tene, azo ti Israel alondo na kodro wande, ala kiri si ala yeke leke kota da ti *KOTA GBIA, Nzapa ti Israel.

² Awato ni aga abaa Zorobabel na azo ti li ti asewa ti azo ti Israel si atene na ala: “E ye ti mu maboko na ala na lekengo da ni! Biani, oko Nzapa so ala yeke voro lo laa e nga, e yeke voro lo; e yeke ya asandaga na lo ngbene ye na ngoi so Asaradon, gbia ti Asirii, agbu e si aga na e ge.”

³ Me Zorobabel, Yeshua na tanga ti azo ti li ti asewa ti azo ti Israel akiri tënë na ala: “Ala laa alingbi ti mu maboko na e ti sara da ndali Nzapa ti e pepe; gi e oko laa e lingbi ti leke ni, ngbanga ti so ayeke kota da ti KOTA GBIA, Nzapa ti Israel. Sirus, gbia ti Perse laa amu yanga na e ti leke ni.”

⁴ Tongaso azo ti kodro ni ato nda ti sara si be ti azuife awoko, ala zia mbeto na be ti azuife, tongaso si ala lingbi ti do lege ti lekengo da ni ti zia.

⁵ Ti londo na ngoi so kue Sirus ayeke gbia ti Perse ngbii asi na ngoi so Darius aga gbia ti Perse, awato ni amu nginza na awamungo-wango ti gbia ti sara titene pialo ti azuife ali ngu.

Azo ti kodro ni aka azuife na gbia Artakzerses

⁶ Na ndembe so Zerses ato nda ti le-gbia na kodro ti Perse, awato ti azuife asu mbeti na tere ti azo ti Juda na ti Jérusalem si ala tokua ni na gbia.

⁷ Na ngoi so Artakzerses ayeke le-gbia na kodro ti Perse, Bishelam, Mitredat, Tabeel na ambeni mba ti ala asu nga mbeti na gbia Artakzerses. Ala su mbeti ni na yanga ti arameen nga na kode ti sungo agere ti mbeti ti yanga ti arameen.

⁸ Rehum, govoronere ti sese ni, lo na wakuasu Shimeshai, asu mbeti na gbia Artakzerses ti tene tënë na lo na ndö ti Jérusalem. Mbeti ni ato nda ni tongaso:

⁹ “Rehum, govoronere ti sese ni, lo na wakuasu Shimeshai, na amba ti ala, azo ti sese ti Din, ti Afarsatak, ti Tarpel, ti Afaras, ti Erek, ti Babilone, ti Suze, ti Deha na ti Elam,

¹⁰ na iri ti azo so Asnapar, lo so lo yeke kota mingi si iri ti lo awu mingi, lo so lo gbu lani ala si lo ga lo zia ala na ya ti agbata ti Samarii nga na ya ti tanga ti sese so ayeke na Do ti ngu ti Efrate…”

¹¹ Tënë ti ya ti mbeti ni ayeke so: “Gbia Artakzerses, e azo ti gbe ti mo so e yeke na sese so ayeke na Do ti ngu ti Efrate…

¹² “Gbia, ayeke nzoni mo hinga, mo tene, azuife so alondo na mo kâ si ala si na e ge na Jérusalem so, ala to nda ti leke gbata ni awe, gbata ti azo ti ngangu li na ti azo ti sioni so. Ala yeke lu agere ti gbagba ni si ala yeke leke agbagba ni na nduzu.

¹³ Gbia, ayeke nzoni mo hinga, mo tene, tongana a leke gbata so si a leke gbagba ni awe, fade azo ni ayeke kiri ti futa lapo pepe, wala lapo na ndö ti akungba wala lapo ti lege pepe. Tongana ala ke ti futa ni, fade mosoro ti gbia ayeke kiri na peko.

¹⁴ Babâ gbia, e so e wara pasa ti ga azo ti kua ti mo, e lingbi ti yeda pepe titene azo abaa mo tongana buba zo. Ndani laa e tokua mbeti so ti fa na mo aye so asi.

¹⁵ Tongaso, ayeke nzoni gbia agi ya ti abuku ti mbai ti aye so agbia so aga kozoni na lo asara; na ya ti ambeti ni, fade gbia ayeke baa so azo ti gbata ni ayeke azo ti ngangu li: ala sara ngangu li na agbia nga na agovoronere ti asese ni lakue. Ngu na ngu, kua ti azo ni ayeke ti bingo wusuwusu. Ndani laa a buba gbata ni.

¹⁶ Tongana a kiri aleke gbata ni si a kiri aleke gbagba ni na nduzu, asese so ayeke na Do ti ngu ti Efrate ayeke kiri ti duti ti mo pepe.”

Kiringo tënë ti gbia Artakzerses

¹⁷ Gbia Artakzerses akiri na peko ti mbeti ni atene: “Mbi tokua mbeti so na govoronere Rehum, na wakuasu Shimeshai nga na amba ti ala so ayeke na gbata ti Samarii nga na ala so ayeke na sese ti Do ti ngu ti Efrate. “Mbi bara ala…

¹⁸ “Mbeti so ala tokua na mbi so, a kiri peko ni na yanga ti kodro ti mbi si a diko ni na mbi awe.

¹⁹ Mbi mu yanga titene a gi nda ti atënë ni. A baa biani so, ngu na ngu gbata ti Jérusalem ayeke tomboka na tere ti agbia, azo ni ayeke bi akpale mingi si ala yeke sara wusuwusu.

²⁰ Ando, ambeni ngangu gbia ayeke na Jérusalem; ala yeke le-gbia na sese so kue ayeke na Do ti ngu ti Efrate. Azo ayeke futa na ala alapo, lapo na ndö ti akungba nga na alapo ti lege.

²¹ Fadeso, alingbi ala mu yanga na azuife ti kai akua ni: ala yeke kiri ti leke gbata ni pepe ngbii mbi wani, mbi mu yanga na ala si.

²² Ala sara hange si ala baa tënë so tongana senge ye pepe. Alingbi ye ni aga sioni ahon ndoni pepe si komandema ti gbia awara kpale na peko ni pepe.”

²³ Gi so a diko mbeti ti gbia Artakzerses na Rehum, na wakuasu Shimeshai nga na amba ti ala awe, ala londo hio ague na Jérusalem. Ala sara ngangu na azuife, ala gbu azuife ni na ngangu titene ala zia lege ti lekengo gbata ni.

Akua ti lekengo kota da ti Nzapa akiri alondo

²⁴ Na Jérusalem, akua ti lekengo kota da ti Nzapa aluti; akua ni aluti ngbii asi na ngu use ni so Darius ayeke gbia ti Perse.