Esdras 1 - Mbeti ti Nzapa - Tënë so amu fini

Gbia Sirus amu yanga titene a leke kota da ti Nzapa

¹ Na kozo ngu so Sirus ayeke gbia ti Perse, *KOTA GBIA aye ti sara si tënë ti lo so lo zia ando na yanga ti Jérémie ti tene, aga taa-tënë. Nilaa KOTA GBIA azia na be ti Sirus ti mu yanga titene a to mbela na tënë ti Sirus na ya ti kodro ti lo kue; a su nga atënë ni na mbeti, atene:

² “Tënë so mbi Sirus, gbia ti Perse, mbi tene ayeke so: KOTA GBIA, Nzapa ti yayu azia na gbe ti mbi akodro-gbia kue ti sese. Lo mu yanga na mbi ti leke na lo da na Jérusalem, na sese ti Juda.

³ Azo so kue na popo ti ala ayeke azo ti lo, ayeke nzoni ala gue na Jérusalem, na sese ti Juda ti leke kota da ti KOTA GBIA, Nzapa ti Israel. Nzapa so a yeke voro lo na Jérusalem laa. Ayeke nzoni Nzapa ti ala aduti na ala!

⁴ Na ya ti akodro so kue azo ti Israel ayeke daa, alingbi azo ti kodro ni amu maboko na ala na gango na ala wen ti nginza, lôro na ambeni nzoni ye. Ala lingbi nga ti mu na azo ti Israel anyama nga na aye so zo ayeke mu na be ti lo wani ndali ti kota da ti Nzapa so ayeke na Jérusalem.”

⁵ Tongaso azo so ayeke na li ti asewa ti mara ti Juda na ti Benjamin, awayango-sandaga na azo ti mara ti Lévi alondo ti gue ti leke kota da ti KOTA GBIA so ayeke na Jérusalem. Ala na azo so kue Nzapa azia na be ti ala nzara ti sarango da ni laa ague.

⁶ Azo so kue ayeke nduru na azo ti Israel amu maboko na ala na lege ti aye nde nde so a sara na wen ti nginza nga na lôro. Azo ni amu nga na ala ambeni nzoni ye, aye mingi ti ngangu ngere na anyama; na ndö ni, ala mu aye so zo amu na be ti lo wani ndali ti kota da ti KOTA GBIA.

⁷ Lani, gbia Nabukodonosor azi akungba ti ya ti kota da ti KOTA GBIA so ayeke na Jérusalem si lo zia ni na ya ti da ti anzapa ti lo. Gbia Sirus asara si a kiri na akungba ni so.

⁸ Lo mu yanga na Mitredat, wabatango amosoro titene lo sigigi na akungba ni, lo diko ni na le ti Sheshebasar, makonzi ti Juda.

⁹ Wungo ti akungba ni ayeke tongaso: akpangbara sembe ti lôro 30, akpangbara sembe ti wen ti nginza 1 000, azeme 29;

¹⁰ akota sembe ti lôro 30, akota sembe ti wen ti nginza 410 so apendere mingi pepe na ambeni kungba 1 000.

¹¹ Wungo ti akungba ni kue ti lôro na ti wen ti nginza ayeke 5 400. Na ngoi so Sheshebasar na azo ti Israel so a gbu ala ague na ala na kodro wande alondo na Babilone ti kiri na Jérusalem, lo mu akungba ni kue, lo gue na ni.