Ésaïe 8 - Mbeti ti Nzapa - Tënë so amu fini

Hio, mo nzi ye na peko ti bira!

¹ *KOTA GBIA atene na mbi: “Mo mu kota le ti têne, mo de mbeti na ndö ni kota kota: ‘Maher-Shalal-Hash-Baz’, (so ti tene: ‘Hio-mo-nzi-ye-na-peko-ti-bira-Ti-na-ndö-ti-ye-mo-nzi-ni’)”

² Mbi fa kota le ti têne ni na azo so zo alingbi ti zia be na ndö ti ala titene ala baa ni; azo ni ayeke: Uria, wayango-sandaga nga na Zakarii, molenge ti Yeberekia.

³ Na pekoni, mbi na wali ti mbi so lo yeke wayanga-Nzapa, e duti koli na wali; lo mu ngo si lo du molenge-koli. KOTA GBIA atene na mbi: “Mo di iri ti molenge ni ‘Maher-Shalal-Hash-Baz’.

⁴ Biani, kozoni titene molenge ni ahinga ti tene: ‘babâ’ na ‘mama’, fade azo ayeke mu amosoro ti gbata ti Damas na aye so ala gbu na peko ti bira na Samarii ti gue na ni na gbia ti Asirii.”

Azo ti Asirii aga ti mu kodro na bira

⁵ *KOTA GBIA akiri atene na mbi:

⁶ “Azo ti Juda ake ngu ti Siloe so ayeke sua yeke-yeke; be ti ala anzere ndali ti gbia Resen na gbia Peka, molenge ti Remalia.

⁷ Ndali ti ye so ala sara so, fade KOTA GBIA ayeke sara titene *bale ti Efrate asuku, aga na tere ti ala. Bale ni ayeke gbia ti Asirii na ngangu ti lo kue. Ngu ni ayeke londo na ndo so lo yeke daa, lo yeke suku ti hon yanga ti sese ti mu ndo kue.

⁸ Ngu ni ayeke sua na ya ti kodro ti Juda, ayeke suku, ayeke mu ya ti kodro ni, ayeke suku ngbii agbu zo na go ti lo. Ngu ni ayeke suku mbage na mbage si ayeke mu ndö ti kodro ti mo kue, Emmanuel.”

Asenge pialo ti azo

⁹ Ala azo, ala do na mbeto, fade a yeke nika ala! Ala azo so alango yongoro, ala dingi mê ti ala, ala ma! Ala leke tere ti ala ti tiri bira, fade a yeke nika ala! Ala leke tere ti ala ti tiri bira, fade a yeke nika ala!

¹⁰ Ala leke apialo ma, fade ayeke li ngu. Ala tene tënë mingi mingi ma, fade a yeke sara ye oko pepe, ngbanga ti so Nzapa ayeke na e.

Têne so azo ayeke pika gere ti ala daa

¹¹ *KOTA GBIA agbu mbi ngangu si lo mu na mbi wango titene mbi sara ye tongana ti azo so pepe. Tënë so lo tene na mbi ayeke so:

¹² “Ye so kue azo so ayeke iri ni ‘mango tere ti kinda gbia’, ala iri ni tongaso pepe; ye so azo ni ayeke sara mbeto ni, ala sara mbeto ni pepe, ala duti na mbeto ni pepe.

¹³ Ayeke nzoni ala hinga atene, KOTA GBIA so ayeke na ndö ti dunia kue laa ayeke nde si lo yeke nzoni kue, lo laa ala lingbi ti sara mbeto ti lo, lo laa ala lingbi ti duti na mbeto ti lo.

¹⁴ Ndali ti akodro-gbia use ti Israel, lo yeke duti ndo so a zia ni nde ndali ti Nzapa, lo yeke duti têne so azo ayeke pika gere ti ala daa, kota têne so ayeke sara titene azo ati, gbanda na kuku ndali ti azo so alango na Jérusalem.

¹⁵ Ndali ti lo, azo mingi aye ti ti, ala yeke ti si ya ti tere ti ala ayeke kungbi. Ala yeke ti na ya ti kuku si kuku ni ayeke gbu ala.”

Ngoi so tënë kue akai si azo ayeke ku

¹⁶ Tënë so mbi tene, mo bata ni nzoni; wango so mbi mu, le ti mo akpengba na ndö ni; mo fa ni gi na adisiple ti mbi.

¹⁷ Mbi yeke ku *KOTA GBIA, lo so lo bi le ti lo yongoro na *ahale ti Jacob; mbi zia be ti mbi ti ku lo.

¹⁸ Mbi na amolenge so KOTA GBIA amu na mbi, e yeke tongana mbeni ye so ayeke fa ye so ayeke si na Israel. E yeke tongana ye ti kpene ndali ti KOTA GBIA so ayeke na ndö ti aye kue, lo so lo yeke duti na ndö ti hoto ti *Sion.

¹⁹ Ambeni zo ayeke tene: “Ala gue, ahunda yingo ti akuâ nga na azo so ayeke fa ye so ayeke si kekereke, azo ni ayeke huru yanga ti ala si ala yeke tene tënë na gbe ti go ti ala. Mbeni mara alingbi ti gue ti baa anzapa ti lo pepe? Ala lingbi ti tene tënë na akuâ ndali ti azo so ade na fini pepe?” Tongana azo ni atene na ala amara ti tënë tongaso,

²⁰ fade ala yeke kiri tënë na ala, atene: “E yeke kiri gi na ndö ti wango ti KOTA GBIA na tënë so lo tene.” Zo so atene tënë tongaso pepe, fade lo yeke baa lumiere ti ndaperere pepe.

Vukongo ndö so ayeke zia kota mbeto na be ti zo

²¹ Fade azo ayeke hon na ya ti kodro ni, na kota pasi na nzara. Ndali ti so nzara ahon ndö ti ala, ala yeke sara ngonzo, ala yeke deba gbia ti ala na Nzapa ti ala. Ala yeke baa ndo na nduzu.

²² Na pekoni, ala yeke baa ndo na sese: gi ye ti ngangu na vukongo ndo, vukongo ndo so ayeke zia kota mbeto na be ti zo, vukongo ndo so avuko pitipiti.

²³ Zo so vukongo ndo ni akanga lo, lo lingbi ti sigigi na ya ni pepe. Ando, *KOTA GBIA azia kamene na le ti azo ti sese ti Zabulon na ala ti sese ti Neftali. Me gbanda, lo yeke mu nengo na lege so ayeke na tere ti kota ngu-ingo, sese so ayeke na mbage ti ngu ti Jourdain kâ nga na Galile, sese ti amara nde.