Ésaïe 65 - Mbeti ti Nzapa - Tënë so amu fini

Fango ngbanga so ayeke ga

¹ *KOTA GBIA atene: “Azo so ahunda ye na mbi pepe, mbi zia lege na ala ti hunda mbi. Azo so agi mbi pepe, mbi zia lege na ala ti wara mbi; mbi tene: ‘Mbi laa, mbi laa!’ Me mbi tene tënë ni na mara so adi iri ti mbi pepe.

² Lakue, mbi yoro maboko ti mbi na mara so asara ngangu li, na azo so amu sioni lege, na ala so ayeke sara gi ye ti be ti ala.

³ Azo ni ayeke zia ngonzo na be ti mbi lakue, na le ti mbi: ala yeke mu asandaga na ya ti apendere ndo so ala yeke voro ayanda daa, ala yeke zö dukani na anzapa nde na ndö ti abiriki.

⁴ Ala yeke duti na popo ti asende ti kuâ, ala yeke lango na ya ti adu ti têne; ala yeke te kasa ti nguru, ya ti asembe ti ala asi singo na kobe so ayeke *sioni mingi.

⁵ Ala yeke tene na azo, atene: ‘Ngba yongoro, ga nduru na mbi pepe! Fade ye ti ngangu ayeke wara mo, ngbanga ti so a zia mbi nde awe.’ Tongana mbi baa aye so kue ala yeke sara, wâ ti ngonzo ti mbi ayeke londo si ayeke gbi ndo lakue.

⁶ Me mbi su aye so kue na mbeti awe; mbi yeke duti kpoo pepe, ngbii mbi futa ala alingbi na ala, mbi futa ala sioni sioni.

⁷ Mbi KOTA GBIA, mbi tene: Mbi yeke futa ala alingbi na sioni ti ala wani nga na sioni ti akotara ti ala. Akotara ti ala ayeke zö ando yombo na li ti ahoto, ala yeke zonga mbi na li ti akete hoto. Tongaso, mbi yeke futa ala sioni sioni ndali ti aye so ala sara ando so.”

⁸ Tënë so KOTA GBIA atene ayeke so: Tongana azo awara gba ti ale ti *vinye so abe, ala yeke tene: “E buba ni pepe, ngbanga ti so tufa ayeke na ya ni”. Mbi yeke sara ande gi tongaso ndali ti azo ti kua ti mbi; fade mbi yeke buba ye kue pepe.

⁹ Fade mbi yeke mu *ahale na azo ti Jacob, mara ti Juda. Ala yeke mu ahoto ti mbi ti ga ye ti ala; ala so mbi soro ala, ala yeke mu ni titene aga ye ti ala, azo ti kua ti mbi ayeke duti kâ.

¹⁰ Ti azo ti mbi so agi mbi, fade lando ti Saron ayeke ga ndo ti tengo kobe ti ataba na ti angasa; popo-hoto ti Akor ayeke ga ndo ti lango ti abagara.

¹¹ “Me ti ala, ala so ado mbi azia, ala so agirisa lege ti guengo na hoto ti mbi so ayeke nde si ayeke nzoni kue, ala so ayeke mu kobe na Gad, ala so ayeke bongbi samba si ayeke mu na *sandaga na Meni,

¹² mbi diko ala titene ala kui kuâ ti yongoro zeme. Ala kue, fade ala yeke kuku na sese si a yeke fâ go ti ala. Biani, mbi iri ndo, ala yeda pepe; mbi tene tënë, ala ma pepe, ala sara ye so ayeke sioni na le ti mbi; ala soro ye so anzere na be ti mbi pepe.

¹³ Ndani laa, tënë so mbi, Kota Gbia NZAPA, mbi tene ayeke so: Fade azo ti kua ti mbi ayeke te kobe, me ti ala, ala yeke duti na nzara. Azo ti kua ti mbi ayeke na ngu ti nyongo ni, me ti ala, nzara ti ngu ayeke sara ala. Azo ti kua ti mbi ayeke duti na ngia, me ti ala, kamene ayeke sara ala.

¹⁴ Azo ti kua ti mbi ayeke dekongo na ngia, be ti ala ayeke nzere; me ti ala, ala yeke dekongo na vundu na be. Biani, ala yeke dema tere, be ti ala ayeke woko kue.

¹⁵ Azo so mbi soro ala ayeke mu iri ti ala, azo ti sioni, ti deba azo na ni; ala yeke tene: ‘Alingbi Kota Gbia NZAPA afâ mo tongana zo tongaso!’ Me ti ala, azo ti kua ti mbi, fade a yeke mu mbeni iri nde na ala.

¹⁶ Na ya ti kodro, zo so aye ti sara tufa na ndö ti mbeni zo, lo yeke sara ni na iri ti Nzapa so ayeke bata tënë ti yanga ti lo. Zo so aye ti deba yanga ti lo, lo yeke deba yanga ti lo ni na iri ti Nzapa so ayeke bata tënë ti yanga ti lo.” *KOTA GBIA atene: “Aye ti vundu so ahon awe, fade azo ayeke girisa ni; aye ti vundu ni ayeke hon yongoro na le ti mbi.

Fini yayu na fini sese

¹⁷ Biani, mbi yeke sara fini yayu na fini sese. Aye so ahon awe so, zo ayeke kiri ti dabe ti lo na ni pepe, be ti zo ayeke kiri ti ti na ndö ni pepe.

¹⁸ Me ala duti na ngia, ala dodo na ngia lakue ndali ti ye so mbi yeke sara. Mbi yeke sara Jérusalem titene ngia asi singo na be ti lo si ngia asi singo na be ti azo ti gbata ni.

¹⁹ Mbi nga, mbi yeke duti na ngia ndali ti Jérusalem, ngia ayeke si singo na be ti mbi ndali ti azo ti mbi. Zo ayeke kiri ti ma toto pepe wala dekongo pepe.

²⁰ Fade kete molenge so ayeke sara gi kete lango si lo kui, ayeke duti kâ pepe. Akangba ayeke ga mbakoro kue si ala kui. Zo so awara ngu ngbangbo oko si lo kui, andaa lo ngba maseka mingi. Zo so akui kozo titene lo wara ngu ngbangbo oko, a baa lo tongana zo so a deba lo debango.

²¹ Azo ti mbi ayeke sara ada si ala yeke lango daa. Ala yeke lu *vinye si ala yeke te alengo ni.

²² Ala yeke kiri ti sara ada pepe titene ambeni zo nde alango daa. Ala yeke kiri ti lu vinye pepe titene ambeni zo nde ate alengo ni. Biani, azo ti mbi ayeke te gigi, ala yeke ga mbakoro tongana akeke. Azo ti mbi so mbi soro ala ayeke wara ye ti peko ti kua so ala sara.

²³ Ala yeke kiri ti baa pasi senge senge pepe, ala yeke kiri ti du amolenge pepe titene amolenge ni akui kuingo. Biani, ala yeke asewa so KOTA GBIA asara tufa na ndö ti ala, ala na amolenge ti ala.

²⁴ Kozo titene ala di iri ti mbi, mbi, mbi yeke kiri tënë na ala; tënë angba ngbango na yanga ti ala, mbi ma ala awe.

²⁵ Fade mbo ti ngonda na molenge ti taba ayeke te kobe na ndo oko; bamara ayeke te pere tongana bagara. Ngbo ayeke te fuku ti sese. Na ndö ti hoto ti mbi so ayeke nde si ayeke nzoni kue, sarango sioni ayeke kiri ti duti daa pepe, bubango ye ayeke kiri ti duti daa pepe. Tënë so KOTA GBIA atene laa.”