Ésaïe 64 - Mbeti ti Nzapa - Tënë so amu fini

¹ ka mo yeke ga tongana wâ so ayeke gbi akete keke so ahole, tongana wâ so ayeke sara si ngu akporo; ka mo sara si awato ti mo ahinga mo; na dawa ti mo, ka tere ti amara nde ado!

² Tongana mo sara lani aye ti ziango mbeto na be ti zo so e ku pepe, tongana mo zu lani, ka ahoto ayingi na dawa ti mo.

³ Mara ti ye so mo sara ndali ti azo so azia be ti ala na ndö ti mo, mbeni nzapa nde asara ni laoko pepe, me gi mo oko. Zo oko ama tënë ni laoko pepe, zo oko ahinga tënë ni laoko pepe, zo oko abaa ni laoko pepe.

⁴ Azo so ayeke sara ye ti mbirimbiri na ngia, ala so ayeke dabe ti ala na mo si ala yeke tambula na lege ti mo, mo yeke ga ti tengbi ala. Me so mo sara ngonzo mingi so, nda ni ayeke so e sara siokpari. Andaa, gi na ndö ti alege ti giriri so laa e yeke soo ande kuâ.

⁵ E kue, e yeke tongana azo so aga *sioni awe, aye ti mbirimbiri so kue e sara ayeke tongana bongo so awali ayeke yu na ndembe so ala yeke baa ya ti ala. E kue, e woko tongana kugbe, sioni ti e ayeke hon na e kirikiri tongana ti so pupu ayeke hon na ye.

⁶ Zo oko ti di iri ti mo ayeke daa pepe, zo oko ti zingo na lango si lo bongbi oko na mo ayeke daa pepe. Biani, mo honde le ti mo na e, mo zia e si e woko na gbe ti sioni ti e.

⁷ Andaa mo KOTA GBIA laa, mo yeke babâ ti e. E yeke tongana sese ti sarango na ta si mo yeke tongana wasarango-ta; e kue, maboko ti mo laa asara e.

⁸ KOTA GBIA, sara ngonzo ahon ndoni pepe, dabe ti mo na sioni ti e lakue pepe! E gbu gere ti mo, baa, e kue, e yeke azo ti mo!

⁹ Agbata ti mo so ayeke nde si ayeke nzoni kue, zo oko ayeke daa mbeni pepe, *Sion aga benyama, Jérusalem aga ngonda.

¹⁰ Pendere kota da so ayeke nde si ayeke nzoni kue, ndo so akotara ti e ayeke he ando bia daa ti sepela na mo, wâ agbi ni awe. Aye so kue e ye ni mingi abuba kue.

¹¹ KOTA GBIA, na dawa ti aye so kue so, fade mo yeke ngba ti kanga be ti mo daa? Mo yeke duti kpoo, mo zia kamene na le ti e ngbii ahon ndoni?