Ésaïe 63 - Mbeti ti Nzapa - Tënë so amu fini

KOTA GBIA afâ ngbanga ti azo ti lo

¹ Zo wa laa alondo na Edom, na li-kodro ti Bosra si lo yeke ga, abengba ye ayeke na tere ti bongo ti lo so? Lo yu kota bongo, lo suku kate ti lo si lo yeke tambula, lo hinga lo tene, ni yeke na ngangu. *KOTA GBIA atene: “Mbi laa! Mbi yeke ga ti fâ ngbanga mbirimbiri, mbi yeke na ngangu ti soo ala.”

² “Bengba ye ayeke na tere ti bongo ti mo ngbanga ti nyen? Abongo ti mo akpa abongo ti zo so ayeke pete ale ti *vinye na ya ti du ngbanga ti nyen?”

³ “Biani, gi mbi oko laa mbi pete ale ti vinye na ya ti du. Na popo ti amara kue, zo oko ayeke na tere ti mbi pepe. Tongaso, na ya ti ngonzo ti mbi, mbi do ala na gbe ti gere ti mbi, na ya ti sioni ngonzo ti mbi, mbi nika ala. Nilaa mene ti ala ati na tere ti abongo ti mbi si abuba abongo ti mbi ni.

⁴ Mbi leke lani na be ti mbi mbeni lango ti kiri peko ti sioni na ala. Ngu ti zi azo ti mbi alingbi awe.

⁵ Mbi baa ndo, me zo oko ti mu maboko na mbi ayeke daa pepe. Li ti mbi kue akpe, me zo oko ti sara na mbi ayeke daa pepe. Tongaso, maboko ti mbi laa asara si mbi so benda; sioni ngonzo ti mbi laa amu na mbi ngangu ti sara ye ni.

⁶ Na ya ti ngonzo ti mbi, mbi nika azo; na ya ti sioni ngonzo ti mbi, mbi sara si li ti ala aga kirikiri tongana ti zo so anyon samba ahon ndö ti lo. Mbi tuku mene ti ala na sese.”

Tënë ti nzoni be ti KOTA GBIA

⁷ Fade mbi yeke dabe ti azo na nzoni be ti *KOTA GBIA, mbi yeke fa nda ni so azo alingbi ti sepela lo: anzoni ye so kue lo sara na e, akota nzoni ye so lo sara na azo ti Israel, aye so kue lo sara na lege ti ndoye, na lege ti kota nzoni be ti lo.

⁸ Lo tene tënë ti azo ti Israel, lo tene: “Biani, ala yeke azo ti mbi; amolenge ti mbi so alingbi ti handa mbi pepe.” Lo laa lo yeke wasongo ala.

⁹ Na ya ti aye ti ngangu ti ala kue, lo soro mbeni zo wala mbeni watokua ti soo ala pepe, me lo wani laa lo soo ala. Na lege ti ndoye ti lo nga na lege nzoni be ti lo, lo zi ala; lo gbu ala si lo yo ala na ya ti angoi so kue ahon.

¹⁰ Me ala tomboka na tere ti lo, ala sara si yingo ti lo so ayeke nde si ayeke nzoni kue awara vundu. Tongaso lo kiri lo ga wato ti ala si lo wani, lo tiri bira na ala.

¹¹ Tongaso, azo ti lo adabe ti ala na ngoi ti giriri, ngoi so Moïse ayeke ando na ala: “Lo so lo sara si azo ti lo so ayeke tongana ataba ti lo nga na amakonzi ti ala afâ kota ngu-ingo si ala sigigi so, lo yeke na ndo wa? Lo so ando lo zia yingo ti lo so ayeke nde si ayeke nzoni kue na popo ti azo ti lo so, lo yeke na ndo wa?

¹² Na mbage ti maboko ti Moïse ti koli, lo yoro maboko ti lo ti ngangu; lo sara si ya ti ngu akangbi na dawa ti ala, lo sara tongaso titene azo agonda iri ti lo lakue lakue.

¹³ Lo laa lo sara si ala fâ kota ngu-ingo so alinda mingi tongana mbarata so ayeke hon na benyama. Ala pika gere ti ala ti ti pepe.

¹⁴ Ala yeke tongana anyama so ayeke zu ti gue na popo-hoto. Yingo ti KOTA GBIA ague na ala na mbeni ndo ti wungo tere.” Biani KOTA GBIA, tongaso laa mo fa lege na azo ti mo; mo sara tongaso titene azo agonda iri ti mo so awu.

Sambela ti vorongo tere na KOTA GBIA

¹⁵ *KOTA GBIA, na yayu kâ, zi le ti mo, mo baa ndo. Na pendere ndo ti mo so ayeke nde si ayeke nzoni kue, baa ye so asi na e: ndoye so ayeke gbi be ti mo tongana wâ ndali ti e, ayeke na ndo wa? Ngangu ti mo ayeke na ndo wa? Mo ke ti baa mawa ti e, mo ke ti sara nzoni be na e awe?

¹⁶ Biani, mo laa mo yeke babâ ti e. Be ti Abraham, kotara ti e agirisa na e awe; Jacob akiri ahinga e pepe; me mo KOTA GBIA, mo yeke Babâ ti e; mo so a yeke di iri ti mo “Wazingo e”, ngbene ye kpu na kpu.

¹⁷ KOTA GBIA, mo zia e, e tambula kirikiri yongoro na lege ti mo ngbanga ti nyen? Mo sara si be ti e akpengba si e ke ti kpe mbeto ti mo ngbanga ti nyen? Ndali ti e, azo ti kua ti mo, amara so aga azo ti mo, kiri, mo ga!

¹⁸ E azo ti mo so e yeke nde si e yeke nzoni kue, e mu sese ni aga ti e aninga pepe. Awato ti e ado na gbe ti gere ti ala da ti mo so ayeke nde si ayeke nzoni kue.

¹⁹ Ngbene ye aninga awe, e yeke tongana azo so mo kiri mo le-gbia na ndö ti ala pepe, e yeke tongana azo so iri ti mo ayeke na ndö ti ala mbeni pepe. Tongana mo suru fade le ti nduzu si mo zu, ka ahoto ayingi na dawa ti mo,