Ésaïe 53 - Mbeti ti Nzapa - Tënë so amu fini

¹ Zo wa laa ayeda na tënë so e ma? Zo wa laa ahinga ngangu ti maboko ti KOTA GBIA?

² Na le ti KOTA GBIA, zo ti kua ni akono tongana mbeni kete keke so ayeke sigigi, tongana gunda ti keke so ayeke sigigi na ya ti holengo sese. Lo kpa zo pepe, pendere ti lo so ayeke gboto zo ti baa ndo na mbage ti lo ayeke daa pepe. Mbeni nzoni ye na tere ti lo so anzere na e ayeke daa pepe.

³ Azo abaa lo tongana mbumbuse zo, azo ado lo azia. Lo yeke zo so ye aso lo, lo hinga ye so iri ni pasi. Lo kpa zo so mbeni zo alingbi ti baa lo na le fani use pepe. E baa lo tongana mbumbuse zo, e ne lo oko pepe.

⁴ Andaa pasi ti e laa lo yo ni, kobela ti e laa lo yo na ndö ti lo. Ti e, e baa e tene, Nzapa laa abi kpale na tere ti lo, Nzapa laa apika lo si abi buba na tere ti lo.

⁵ Me ti lo, ndali ti sioni ti e laa a kpo lo na ka, ndali ti siokpari ti e laa a nika lo. Pika so lo wara asara si e duti na siriri; ndali ti aka ti lo laa tere ti e aga nzoni.

⁶ E kue, e yeke lani tongana ataba so akangbi kirikiri, zo oko oko amu lege ti lo wani. Me KOTA GBIA asara si asioni ti e kue ati na ndö ti lo.

⁷ Azo asara ngangu na lo, lo sara tere ti lo kete, lo zi yanga oko pepe. Lo yeke tongana kete taba so a yeke gue na lo na ndo ti fango anyama; lo yeke tongana taba so ayeke buburu na dawa ti azo ti fango kua ti tere ti lo, lo zi yanga oko pepe.

⁸ Azo agbu lo, ala fâ ngbanga na li ti lo si ala fâ lo. Me na popo ti azo ti ngoi ti lo, zo wa laa abaa mawa ti lo, zo wa? Biani, a zi lo na ndö ti sese ti azo so angba na fini; a pika lo ndali ti sioni ti azo ti mbi.

⁹ A zia lo na du ti kuâ legeoko na azo ti sioni; a lu lo na ndo ti azo ti mosoro, ataa so lo sara sioni oko pepe, ataa so tënë ti mvene asigigi na yanga ti lo oko pepe.

¹⁰ Me KOTA GBIA ayeda ti nika lo na lege ti pasi. Zo so lani amu fini ti lo na *sandaga ndali ti azo, KOTA GBIA akiri na lo na kozo ndo ti lo. Fade zo ti kua ti lo ayeke baa *ahale ti lo si lo yeke kiri ti te gigi aninga. Na lege ti lo, KOTA GBIA ayeke sara ye so be ti lo aye.

¹¹ Ndali ti pasi so lo baa, fade lo yeke baa lumiere; ndali ti hingango ye ti lo, lo yeke te gigi aninga. Zo ti kua ti mbi so ayeke zo ti mbirimbiri ayeke sara ande si gba ti azo aga azo ti mbirimbiri, ngbanga ti so lo yo sioni ti ala.

¹² Ndani laa mbi mu na lo ndo na popo ti akota zo; ye so a gbu na peko ti bira, lo na azo ti ngangu laa ayeke kangbi ni. Biani, lo wani, lo ka tere ti lo na kuâ, a diko lo na popo ti azo ti sioni, ngbanga ti so lo yo siokpari ti gba ti azo, lo gbu koko ti azo ti sioni.