Ésaïe 51 - Mbeti ti Nzapa - Tënë so amu fini

Zingo azo so ayeke ngba kpu na kpu

¹ *KOTA GBIA atene: “Ala so ayeke gi titene a soo ala, ala so ayeke gi mbi, ala ma mbi si! Ala baa kota têne so a de tere ni si a sara na ala; ala gbu li ti ala na ndö ti du ti têne so a gboto ala na ya ni si a sigigi na ala.

² Ala baa Abraham, babâ ti ala, ala baa Sara so adu ala. Biani, Abraham ayeke lani gi lo oko si mbi iri lo. Mbi sara tufa na ndö ti lo si lo ga kotara ti gba ti azo.”

³ KOTA GBIA abaa mawa ti *Sion, lo baa mawa ti aye ti lo so kue abuba. Ndo ti lo so ayeke tongana benyama, lo yeke sara si aga tongana yaka ti Eden; ndo ti lo so ngu ayeke daa pepe, lo yeke sara si aga yaka ti KOTA GBIA. Na ya ti gbata ni, fade azo ayeke duti na ngia si ala yeke sara ngia, ala yeke he bia ti gondango Nzapa si ala yeke pika mozoko.

⁴ KOTA GBIA atene: “Ala azo ti mbi, ala ma mbi nzoni! Ala azo ti mara ti mbi, ala zi mê ti ala, ala ma mbi! Mbi laa mbi yeke mu ndia na azo, fango ngbanga so mbi yeke sigigi na ni ayeke ga lumiere ndali ti azo.

⁵ Zingo azo so mbi yeke zi ala aga nduru awe, songo azo na kuâ so mbi yeke soo ala asigigi awe. Mbi yeke fâ ngbanga ti azo na ngangu. Fade azo ti azoa ayeke zia be ti ala ti ku mbi, ala yeke ku ngangu ti maboko ti mbi.

⁶ Ala yo le ti ala, ala baa ndo na yayu, na pekoni, ala baa ndo na sese: fade yayu ayeke hon tongana guru ti wâ, sese ayeke buba tongana gbagba bongo, azo ti ndö ti sese ni ayeke kui tongana avuma. Me zingo azo ayeke ngba kpu na kpu, songo azo so mbi yeke ga ti soo ala ayeke ngba lakue lakue.

⁷ Ala so ahinga ye so ayeke mbirimbiri, ala so ndia ti mbi ayeke na be ti ala, ala ma mbi! Tongana azo ahe ala, ala sara mbeto ni pepe, be ti ala ado ndali ti zonga ti ala pepe.

⁸ Fade kangi ayeke te ala tongana ti so lo yeke te bongo, kangi ayeke te ala tongana ti so lo yeke te bongo so a sara na kua ti tere ti taba. Me songo so mbi yeke ga ti soo azo na kuâ ayeke ngba lakue, zingo azo ayeke ngba kpu na kpu.”

KOTA GBIA, zingo si!

⁹ Zingo, zingo hio si! Maboko ti *KOTA GBIA, mo fa ngangu ti mo! Zingo tongana ti so mo sara ando, tongana ti so mo sara na ngoi ti azo ti giriri. Mo laa mo fâ ando Rahab pepe? Mo laa mo kpo ando kota sioni nyama so akpa ngunde so pepe?

¹⁰ Kota ngu-ingo na kota ngu so alinda mingi so, mo ando laa mo sara si ahole pepe? Mo ando laa mo suru lege na ya ti kota ngu-ingo si azo so mo zi ala awe so ahon daa pepe?

¹¹ Azo so KOTA GBIA azi ala, fade ala yeke kiri; ala yeke dekongo na ngia si ala yeke linda na ni na *Sion. Ngia so angba lakue lakue ayeke za na ndö ti le ti ala, nzerengo tere so asi singo ayeke duti na ala, pasi na demango tere ayeke kpe ti hon.

Azo ti mbi, zo wa laa ala yeke sara mbeto ti lo so?

¹² *KOTA GBIA atene: “Mbi, mbi laa mbi yeke de be ti ala. Azo ti mbi, ala yeke sara mbeto ti zo so ayeke kui kuingo so ngbanga ti nyen? Fini ti lo ayeke tongana pere.

¹³ Be ti ala agirisa na KOTA GBIA awe; lo laa lo sara ala, lo laa lo gbara yayu si lo zia gere ti sese. Lakue tere ti ala ayeke do na mbeto na dawa ti ngonzo ti zo ti sarango ngangu na azo, mo baa mo tene, lo lingbi ti fâ ala. Fadeso, ngonzo ti zo ti sarango ngangu na azo ni ayeke na ndo wa?

¹⁴ Zo ti kanga so ye ahon ndö ti lo, fafadeso, a yeke zi lo; lo yeke kui na ya ti sururu ti lo pepe, kobe ayeke kiri ti tia lo pepe.

¹⁵ Mbi laa mbi yeke KOTA GBIA, Nzapa ti ala. Mbi yeke yingi le ti kota ngu-ingo; mbi yeke sara si *amapo ni atoto. Iri ti mbi ayeke KOTA GBIA so ayeke na ndö ti dunia kue.

¹⁶ Mbi gbara yayu, mbi zia gere ti sese si mbi tene na azo ti *Sion: ‘Ala laa ayeke azo ti mbi; mbi zia tënë ti mbi na yanga ti ala, mbi bata ala na gbe ti de ti maboko ti mbi.’ ”

Jérusalem, kiri mo zingo si

¹⁷ Jérusalem, zingo, zingo hio si! Londo! *KOTA GBIA amu lani na mo kopo so ngonzo ti lo asi ya ni; mo nyon ni, mo nyon ni kue, ni laa asara si li ti mo aga kirikiri so.

¹⁸ Na popo ti amolenge so kue mo du ala, mbeni oko so afa lege na mo ayeke daa pepe; na popo ti amolenge so kue mo bata ala, mbeni oko so agbu maboko ti mo ayeke daa pepe.

¹⁹ Aye ti mawa use so asi na mo awe: aye ti mo kue abuba si kpale ati na ndö ti mo; kota nzara na bira afâ azo ti mo. Zo wa laa ayeke dema mo, zo wa? Zo wa laa ayeke de be ti mo, zo wa?

²⁰ Amolenge ti mo alango na sese na ndö ti alege kue. Ala yeke tongana atagba so ati na ya ti gbanda, ala ngba na ya ni, me ala lingbi ti sara ye oko pepe; ala yeke na gbe ti ngonzo ti KOTA GBIA, Nzapa ti mo abe le na ala.

²¹ Ndani laa, ayeke nzoni mo ma tënë so, mo Jérusalem, gbata ti mawa: samba asara mo, me samba laa mo nyon pepe.

²² Kota Gbia ti mo, KOTA GBIA Nzapa ti mo, lo so lo yeke gbu koko ti azo ti lo, tënë so lo tene ayeke so: “Kopo so ayeke sara si li ti mo aga kirikiri, kopo so ngonzo ti mbi ayeke na ya ni, mbi yeke zi ni na maboko ti mo. Fadeso, mo yeke kiri ti nyon ni pepe.

²³ Mbi yeke mu kopo ni na azo so lani ayeke sara pasi na mo. Ala yeke tene lani na mo, atene: ‘Lango na sese, e tambula na ndö ti mo!’ Mo yeke zia lani peko ti mo si aga tongana sese, wala tongana lege so azo ayeke hon daa.”