Ésaïe 49 - Mbeti ti Nzapa - Tënë so amu fini

Zo ti kua ti KOTA GBIA (use bia)

¹ Ala so ayeke lango na yongoro ndo, ala ma mbi! Ala so ayeke na yongoro ndo, ala dingi mê ti ala, ala ma! Kozo titene a du mbi, *KOTA GBIA airi mbi; gi so mbi de na ya ti mama ti mbi, lo di iri ti mbi.

² Lo sara si tënë ti yanga ti mbi aga tongana yongoro zeme so yanga ni aza mingi. Lo honde mbi na gbe ti de ti maboko ti lo. Lo sara si mbi ga tongana le ti kokora so yanga ni aza, lo honde mbi na ya ti bozo ti ale ti kokora ti lo.

³ Lo tene na mbi: “Israel, mo laa mo yeke zo ti kua ti mbi; na lege ti mo, mbi yeke fa gonda ti mbi.”

⁴ Ti mbi, mbi tene fade, mbi tene: “Mbi baa pasi na sarango kua senge senge, mbi hunzi ngangu ti mbi kue senge senge, ye ti peko ni oko ayeke daa pepe.” Andaa *KOTA GBIA laa ayeke baa lege ti nzoni fango ngbanga ti mbi, futa ti mbi ayeke na maboko ti Nzapa ti mbi.

⁵ Me fadeso, KOTA GBIA atene tënë awe, lo so mbi de na ya ti mama ti mbi si lo leke mbi titene mbi ga zo ti kua ti lo. Lo ye titene mbi mu *ahale ti Jacob, mbi ga na ala na mbage ti lo, mbi bongbi azo ti Israel na tere ti lo. Mbi ne mingi na le ti KOTA GBIA, Nzapa ti mbi ayeke ngangu ti mbi.

⁶ Lo tene na mbi: “Titene mo ga gi zo ti kua ti mbi ti yo azo ti mara ti Jacob na nduzu, ti mu tanga ti azo ti Israel so angba na fini ti ga na ala, so alingbi pepe. Mbi yeke sara titene mo ga lumiere ti amara kue, tongaso si mbi yeke soo azo na kuâ ngbii asi na nda ti sese kue.”

Kiringo ti azo ti Israel na kodro ti ala

⁷ Mo so lani azo abaa mo tongana mbumbuse zo, so be ti azo kue ake mo, mo so mo yeke ngbaa ti azo ti sarango ngangu na zo, *KOTA GBIA, lo so lo zi azo ti lo, Nzapa ti Israel so ayeke nde si ayeke nzoni kue, tënë so lo tene na mo ayeke so: “Tongana agbia ayeke baa ande mo, ala yeke londo na ndö ti mbata ti ala; tongana amakonzi ayeke baa mo, ala yeke kuku akpo li ti ala na sese na dawa ti mo.” Ye ni ayeke si ndali ti KOTA GBIA so ayeke sara ye alingbi na tënë ti yanga ti lo, ndali ti Nzapa ti Israel so ayeke nde si ayeke nzoni kue, lo so lo soro mo.

⁸ Tënë so KOTA GBIA atene ayeke so: “Na ndembe so alingbi, mbi kiri tënë na mo; na lango ti songo azo na kuâ, mbi mu na mo maboko. Mbi bata mo titene na lege ti mo, mbi na azo, e ga *ambuki. Mbi yeke yo kodro ti Israel na nduzu, mbi yeke kiri ti kangbi na azo sese so lani ayeke ti ala si abuba so.

⁹ Mbi tene na azo ti kanga: ‘Ala sigigi!’ Mbi tene na azo so aduti na ya ti vukongo ndo: ‘Ala sigigi, ala ga na ya ti lumiere!’ Ala yeke duti tongana ataba so ayeke te pere na tere ti lege, ala yeke wara kobe ti ala na ndö ti ahoto kue.

¹⁰ Nzara ti kobe na nzara ti ngu ayeke kiri ti sara ala pepe; pupu ti wâ ti benyama na sungo ti lâ ayeke zö ala pepe. Biani, mbi yeke baa mawa ti ala si mbi yeke fa lege na ala, mbi yeke gue na ala na ndo so li ti ngu ayeke daa.

¹¹ Mbi yeke sara titene ahoto kue aga nzoni lege, mbi yeke kiri ti kanga adu ti alege.

¹² Baa! Ala londo yongoro si ala yeke ga: ambeni alondo na mbage ti Banga, ambeni na mbage ti Do, ambeni na mbage ti Mbongo, na mbage ti Ezipte.”

¹³ Yayu, he bia na ngia! Sese, dodo na ngia! Ahoto, ala dekongo na ngia! Biani, KOTA GBIA asara si be ti azo ti lo akiri ade, lo baa mawa ti azo so ayeke baa pasi.

Be ti mbi ayeke girisa na mo pepe

¹⁴ *Sion atene: “*KOTA GBIA ado mbi azia awe! Be ti Kota Gbia ti mbi agirisa na mbi awe!”

¹⁵ Me KOTA GBIA akiri tënë: “Be ti wali alingbi ti girisa na molenge ti lo so angba ti nyon me? Molenge so asigigi na ya ti lo, lo yeke zia ti baa mawa ti lo? Ataa be ti mama ni agirisa na molenge ni, mbi, be ti mbi ayeke girisa na mo laoko pepe.

¹⁶ Baa, mbi kpaka iri ti mo na ya ti maboko ti mbi; agbagba ti bira ti mo ayeke na gbe ti le ti mbi lakue.

¹⁷ Azo so ayeke kiri ti leke mo amu loro ti ga; me azo so akungbi mo, ala so abuba mo, ala yeke hon yongoro na tere ti mo.

¹⁸ Yo le ti mo na nduzu, mo baa ndo na tere ti mo: amolenge ti mo kue abongbi, ala yeke ga na mbage ti mo. KOTA GBIA atene: Fini ti mbi! Amolenge ni ayeke ga ande tongana ye ti go so zo ayeke zia na go ti lo; ala yeke ga tongana pendere kamba ti ndö ti bongo so wali so aye ti mu koli ayeke kanga na ya ti lo.

¹⁹ Ti fadeso, mo yeke na popo ti aye so abuba awe, kodro ti mo aga ngonda awe, sese so aga ndo ti gba ti atêne; fade ndo ni ayeke ga kete mingi, ayeke lingbi na azo so ayeke lango daa pepe. Me azo so lani abuba mo so ayeke hon yongoro na tere ti mo.

²⁰ Amolenge so lani a gbanzi ala na mo so, ala yeke tene ande na mo, atene: ‘Ndo ni ayeke kete mingi ndali ti e, mo pusu si e lingbi ti wara mbeni ndo ti duti daa.’

²¹ Tongaso, fade mo yeke hunda tere ti mo, mo tene: ‘Amolenge so kue so, zo wa laa adu ala na mbi, zo wa? A gbanzi mbi lani na amolenge, mbi yeke wali ti dungo ni pepe, a gbu mbi lani, a gue na mbi na kodro wande, a zia gi mbi oko. Zo wa laa abata ala so, zo wa? Mbi ngba lani gi mbi oko, amolenge so, ala yeke lani na ndo wa?’ ”

²² Tënë so Kota Gbia NZAPA atene ayeke so: “Baa, mbi yeke sara maboko na amara nde, mbi yeke yo bendere na nduzu na mbage ti azo. Azo ni ayeke yo amolenge ti mo ti koli na ya ti maboko ti ala ti ga na ala, ala yeke yo amolenge ti mo ti wali na ndö ti go ti ala ti ga na ala.

²³ Agbia ayeke ga ababâ ti batango ala, amolenge ti agbia ti wali ayeke ga amama ti batango ala. Agbia ni ayeke kuku, akpo li ti ala na sese na dawa ti mo, ala yeke su sese so ayeke na tere ti gere ti mo. Tongaso fade mo yeke hinga, mo tene: mbi yeke KOTA GBIA; azo so azia be ti ala na ndö ti mbi, kamene ayeke gbu le ti ala pepe.”

²⁴ Ye so ngangu zo ti bira agbu na bira, zo alingbi ti zi ni na maboko ti lo? Ngbaa so zo ti sarango ngangu na azo agbu lo zo alingbi ti gboto ngbaa ni na maboko ti lo?

²⁵ Biani, tënë so KOTA GBIA atene ayeke so: “Ngbaa so ngangu zo ti bira agbu lo, mbi yeke gboto ngbaa ni na maboko ti lo. Ye so zo ti sarango ngangu na azo agbu na bira, mbi yeke gboto ni na maboko ti lo. Jérusalem, mbi wani laa mbi yeke tiri na azo so atiri na mo si mbi yeke soo amolenge ti mo.

²⁶ Azo so asara ngangu na mo, mbi yeke sara titene ala te kasa ti tere ti ala wani, ala yeke nyon mene ti ala si ahon ndö ti ala tongana zo so anyon fini vin si ahon ndö ti lo. Tongaso, fade azo kue ayeke hinga atene, mbi yeke KOTA GBIA, wasongo mo, wazingo mo, mbi, ngangu Nzapa ti Jacob!”