Ésaïe 46 - Mbeti ti Nzapa - Tënë so amu fini

Anzapa ti Babilone ati na gbe ti taa Nzapa

¹ Bel akuku awe, Nebo ati awe. A zia ayanda ti ala na ndö ti anyama, na ndö ti abagara. Ando, ala yeke yo ayanda ni ti tambula na ni na ya ti amatanga; fadeso aga nengo kungba na ndö ti anyama so awoko awe.

² Anzapa ni akuku, ala ti legeoko; ala lingbi ti soo ayanda ti ala pepe, ala wani, ala gue na ngbaa.

³ Azo ti Jacob, ala ma mbi, ala, atanga ti azo ti Israel so angba na fini so! Gi so ala de na ya ti mama ti ala, mbi bata ala, gi so a du ala, mbi yo ala.

⁴ Mbi yeke ngba gi tongaso ngbii asi na mbakoro ti ala; mbi yeke yo ala ngbii kua ti li ti ala avuru. Mbi laa mbi sara ala, mbi laa mbi yeke yo ala. Biani, mbi yeke ngba ti yo ala si mbi yeke soo ala.

⁵ Ala lingbi ti haka mbi na zo wa? Zo wa laa alingbi na mbi, zo wa? Zo wa laa ala lingbi ti haka mbi na lo si ala tene: mbi na lo, e lingbi tere?

⁶ Ambeni zo ayeke sigigi na lôro ti bozo ti ala kue, ala yeke haka wen ti nginza na kilo, ala yeke futa mbeni wakode-kua ti kporo lôro ti sara na mbeni nzapa. Na pekoni, ala yeke kuku na gbe ti lo ti voro lo.

⁷ Ala yeke zia nzapa ni na ndö ti go ti ala, ala yo lo, ague na lo si azia lo na ndo ti lo. Nzapa ni ayeke ngba gi na ndo ni so, lo yeke gue na mbeni ndo pepe. Ataa zo adekongo na lo, lo yeke kiri tënë pepe. Lo lingbi ti soo zo ni pepe na ya ti ye ti ngangu.

Ngoi ti zingo zo na ya ti kpale angba yongoro pepe

⁸ Ala dabe ti ala na ye so, ala kiri asara ye ti koli! Ala azo ti ngangu li, ala gbu li ti ala!

⁹ Ala dabe ti ala na ye so ahon awe so, aye so asi ando giriri so: Biani, mbi laa mbi yeke Nzapa, mbeni nde ayeke daa pepe. Mbeni Nzapa tongana mbi ayeke daa pepe.

¹⁰ Aye so ayeke si ande, mbi fa tënë ni gi na tongo nda ni. Ye so ade ti si pepe, mbi tene tënë ni ngbene ye aninga awe. Mbi tene: “Pialo ti mbi ayeke si alingbi na ni. Ye so kue mbi ye ti sara, mbi yeke sara ni.”

¹¹ Na mbage ti To, mbi iri mbeni ndeke so ayeke te anyama. Yongoro na nda ti sese kâ, mbi iri mbeni zo, lo laa lo yeke sara si apialo ti mbi asi alingbi na ni. Tënë so mbi tene, ye ni ayeke si! Pialo so mbi leke, mbi yeke sara ni!

¹² Ala azo ti kpengbango be, ala so angba yongoro na tere ti ye so ayeke mbirimbiri so, ala ma mbi!

¹³ Mbi yeke sara titene mbirimbiri ti mbi aga; akiri angba yongoro pepe. Tënë ti songo zo na kuâ aga nduru awe. Mbi yeke ga na tënë ti songo zo na *Sion. Biani, mbi yeke ga na ye so ayeke pendere mingi na Israel.