Ésaïe 40 - Mbeti ti Nzapa - Tënë so amu fini

USE MBAGE NI TËNË TI DENGO BE TI AZO TI ISRAEL 40–55 Ala de be ti azo ti mbi

¹ Nzapa ti ala atene: Ala de be ti azo ti mbi, ala de be ti azo ni.

² Ala tene tënë ti mu ngangu na be ti Jérusalem, ala dekongo na lo atene: “Kua ti lo ti ngbaa ahunzi awe, a zi sioni ti lo na li ti lo awe. Biani, asioni so lo sara, *KOTA GBIA asara si lo wara futa ni fani use.”

³ Mbeni go adekongo, atene: “Na benyama, ala suru lege ndali ti KOTA GBIA; na lando so ngu ayeke daa pepe, ala leke lege mbirimbiri ndali ti Nzapa ti e!

⁴ Ndo so ayeke na popo-hoto, ayeke nzoni a tuku sese daa asi, a de na sese ahoto na akete hoto! Ayeke nzoni akete hoto aga kpangbara sese, ando so ayeke na nduzu aga popo-hoto.

⁵ Tongaso, fade gonda ti KOTA GBIA ayeke sigigi polele si azo ti sese kue ayeke baa ni. Tënë so asigigi na yanga ti KOTA GBA laa.”

⁶ Mbeni go atene: “Dekongo!” Me mbi kiri tënë: “Mbi dekongo ni, mbi tene nyen?” Go ni akiri atene: “Azo kue ayeke tongana pere, pendere ti ala ayeke tongana kongo ti ngonda.

⁷ Tongana pupu ti KOTA GBIA ahon na ndö ni, pere ni ayeke hole si kongo ni ayeke ti. Biani, azo ayeke tongana pere.

⁸ Pere ayeke hole, kongo ayeke ti, me tënë ti Nzapa ti e ayeke ngba kpu na kpu.”

Nzoni tënë

⁹ Mo gbata ti *Sion, mo so mo yeke ga na nzoni tënë, mo ma na li ti kota hoto. Mo Jérusalem, mo so mo yeke ga na nzoni tënë, mo yo go ti mo na nduzu na ngangu ti mo kue. Mo yo go ti mo na nduzu, sara mbeto pepe. Tene na agbata ti Juda: “Baa, Nzapa ti ala laa!

¹⁰ Baa Kota Gbia NZAPA laa. Lo yeke ga na ngangu kue; ngangu ti lo alingbi titene lo sara komandema. Futa ti lo ayeke na maboko ti lo, lo yeke ga na ye so lo wara na peko ti kua ti lo.

¹¹ Tongana wabatango-taba, lo yeke gue na ataba ti lo na ndo ti tengo pere, lo yeke sara maboko ti lo ti bongbi ala; lo yeke yo akete taba ni na ya ti maboko ti lo, lo yeke gue yeke-yeke na ataba so ayeke mu me na amolenge ti ala.”

Nzapa ayeke na ndara si lo yeke kota na ndö ti aye kue

¹² Zo wa laa ahaka ngu ti kota ngu-ingo na ya ti maboko ti lo, zo wa? Zo wa laa azi ya ti ali ti maboko ti lo si lo sara konde ti konongo ti yayu, zo wa? Zo wa laa azia fuku ti sese na ya ti sembe ti hinga nengo ni, zo wa? Zo wa laa azia ahoto na akete hoto na ndö ti kilo si lo haka ala, zo wa?

¹³ Zo wa laa alingbi ti haka yingo ti *KOTA GBIA, zo wa? Zo wa laa alingbi ti mu wango na lo?

¹⁴ Zo wa laa Nzapa abaa lo titene zo ni azi le ti lo si lo fâ ngbanga nzoni, zo wa? Zo wa laa afa na lo hingango nda ti aye, zo wa? Zo wa laa afa lege ti hingango ndo na lo, zo wa?

¹⁵ Na le ti lo, amara nde ayeke tongana kete kete ngu so alondo na ya ti tawa si ati! Ala yeke tongana le ti fuku ti sese so a zia na ndö ti kilo. Azo so ayeke na yongoro ndo ayeke tongana kete le ti fuku ti sese so ane pepe.

¹⁶ Anyama kue ti Liban alingbi pepe titene a mu na *sandaga so a yeke gbi ni kue na wâ. Akeke ni alingbi nga pepe titene a sara na wâ ti gbi na sandaga ni.

¹⁷ Na le ti KOTA GBIA, azo ti mara kue ayeke ye oko pepe; ala yeke gi senge senge ye, ala yeke tongana pupu senge.

Ye oko ti lingbi na Nzapa ayeke daa pepe

¹⁸ Ala ye ti haka Nzapa na zo wa? Limo ti nyen laa ala baa alingbi na lo?

¹⁹ Yanda? Wakode-kua laa akporo wen si asara na ni; zo ti sarango ye na kode azia lôro na tere ni, lo zia na go ti lo aye ti go so a sara na wen ti nginza.

²⁰ Zo so yere ahon ndö ti lo si lo lingbi ti mu mara ti matabisi tongaso pepe, lo yeke soro keke so alingbi ti fun pepe. Na pekoni, lo yeke gi nzoni wakode-kua so alingbi ti sara yanda so alingbi ti yingi pepe.

²¹ Ala hinga tënë so pepe? Ala ma tënë so pepe? A fa tënë ni na ala ngbene ye na tongo nda ni pepe? Ala hinga nda ti ziango gere ti dunia pepe?

²² *KOTA GBIA azia mbata ti lo ti gbia na nduzu kâ, na ndö ti sese, lo yeke baa azo tongana agbadola. Lo gbara le ti nduzu tongana kota bongo, lo zi ya ni titene aga da ti bongo so lo yeke duti daa.

²³ Lo sara si amakonzi ti dunia so aga ye oko pepe, lo sara si awafango-ngbanga ti sese so aga senge senge ye.

²⁴ Ataa a iri ala na kua gi fafadeso, ataa ala gbu mbata ti kua ti ala gi fafadeso, ataa gere ti ala ade ti li sese pepe, mo ye ti baa, KOTA GBIA ahuru pupu na ndö ti ala. Tongaso, ala hole si ngangu pupu ahon na ala tongana holengo pere.

²⁵ Nzapa so ayeke nde si ayeke nzoni kue ahunda ndo, atene: “Ala haka mbi na zo wa? Zo wa laa alingbi na mbi, zo wa?”

²⁶ Ala yo le ti ala na nduzu, ala baa ndo: Zo wa laa asara atongoro, zo wa? Zo wa laa asara si ala yeke tambula na molongo tongana aturugu so, zo wa? Lo yeke iri ala oko oko kue na iri ti ala. Na lege ti kota ngangu ti lo nga na kota komandema ti lo, tongoro oko so ake ti ga na iringo ndo ti lo ayeke daa pepe.

KOTA GBIA akiri ngangu na azo so awoko

²⁷ Jacob, ngbanga ti nyen si mo tene tënë tongaso? Israel, ngbanga ti nyen si mo tene: “Ye so asi na mbi so, *KOTA GBIA abaa ni pepe. Nzoni fango ngbanga ti mbi, le ti Nzapa ti mbi ati na ndö ni pepe”?

²⁸ Mo hinga pepe? Mo ma tënë ni pepe? KOTA GBIA ayeke Nzapa so angba lakue lakue; lo laa lo sara sese, alondo na mbeni yanga ni asi na mbeni yanga ni. Ngangu atia ti lo laoko pepe, lo woko laoko pepe. Hingango ye ti lo, zo oko alingbi ti gi nda ni pepe.

²⁹ Zo so awoko awe, lo yeke mu ngangu na zo ni; zo so ngangu ti lo ahunzi kue, lo yeke kiri ngangu na lo.

³⁰ Ataa amaseka, ngangu ayeke hunzi na ala si ala yeke woko; ataa angangu maseka ayeke ti.

³¹ Me azo so azia be ti ala na ndö ti KOTA GBIA, ala yeke wara fini ngangu; ala yeke huru tongana *ngoalo. Ala mu loro, me ala yeke woko pepe, ala tambula, me ngangu ayeke hunzi na ala pepe.