Ésaïe 4 - Mbeti ti Nzapa - Tënë so amu fini

¹ Na lango ni so, fade awali mbarambara ayeke gbu koli oko si ala tene na lo, atene: “E wani, e yeke gi kobe ti yanga ti e; e wani, e yeke vo bongo ti yungo ti e. Me e hunda gi ye oko: mo zia iri ti mo na ndö ti e ti zi kamene na le ti e.”

Azo ti Jérusalem so angba na fini

² Na lango ni so, fade *KOTA GBIA ayeke sara titene mbeni kete keke asigigi pendere si aga ye ti gonda. Ye so kodro ni ayeke le ayeke ga ye ti nengo ndali ti azo ti Israel so angba na fini nga na ye ti mungo gonda na ala.

³ Tongaso, azo so ayeke ngba na Jérusalem na tanga ti azo so angba na fini na *Sion, fade a yeke mu na ala mbeni iri so atene: “Azo so a zia ala nde ndali ti KOTA GBIA”; so ti tene azo so kue KOTA GBIA asu iri ti ala na ya ti mbeti ti lo titene ala duti na fini na Jérusalem.

⁴ KOTA GBIA ayeke tokua yingo ti fango ngbanga nga na yingo so ayeke gbi ye tongana wâ ti zi sioni ti azo ti Sion, ti sukula Jérusalem ndali ti mene so atuku na ya ti gbata ni.

⁵ Na pekoni, lo yeke sara mbeni mbinda na kota lâ na ndö ti hoto ti Sion kue nga na ndö ti azo so kue ayeke bongbi na ndö ti hoto ni; lo yeke sara mbeni ngbongboro guru ti wâ so ayeke za na bi. Gonda ti KOTA GBIA ayeke duti na ndö ti aye ni kue.

⁶ Gonda ni ayeke ga tongana li ti da ti mu de na azo na ngoi ti ndo-wâ na kota lâ; ayeke ga tongana ndo ti batango tere na ndo ti hondengo tere ndali ti kota pupu nga na ngu-Nzapa.