Ésaïe 38 - Mbeti ti Nzapa - Tënë so amu fini

Tere ti Ezekias aso, kobela ti lo akai

¹ Na ngoi ni so, tere ti Ezekias aso nduru na kuâ. Wayanga-Nzapa Ésaïe, molenge ti Amoz aga abaa lo si atene na lo: “Tënë so *KOTA GBIA atene ayeke so: Mo leke tënë ti aye ti da ti mo biani, ngbanga ti so mo yeke kui, mo yeke ngba na fini pepe.”

² Tongaso Ezekias azia le ti lo na mbage ti dere ti da si lo sambela KOTA GBIA,

³ lo tene: “Ae! KOTA GBIA, mbi gbu gere ti mo, mo dabe ti mo so mbi sara ye na le ti mo na lege ti taa-tënë si mbi sara ni na be ti mbirimbiri. Mbi sara nga ye so ayeke nzoni na le ti mo.” Na pekoni Ezekias atoto mingi.

⁴ Tongaso, tënë ti KOTA GBIA asi na Ésaïe, atene:

⁵ “Gue mo tene na Ezekias, mo tene: Tënë so KOTA GBIA, Nzapa ti David, kotara ti mo atene ayeke so: ‘Mbi ma sambela ti mo awe, mbi baa ngu ti le ti mo awe. Baa, mbi yeke zia ngu baleoko na oku na ndö ti lango ti fini ti mo.

⁶ Fade mbi yeke zi mo nga na gbata so na maboko ti gbia ti Asirii. Mbi yeke bata gbata so.’ ”

⁷ Ésaïe atene na lo: “Ye so ayeke fa ande na mo atene, KOTA GBIA ayeke sara ye alingbi na tënë so lo tene ayeke so:

⁸ Na ndö ti eskalie ti Ahaz so ayeke fade na lâ, gbe ti de azu daa awe. Nilaa KOTA GBIA ayeke sara titene gbe ti de ni akiri na peko alingbi na bingo gere baleoko.” Biani, gbe ti de ni akiri na peko alingbi na bingo gere baleoko na ndö ti eskalie ti Ahaz so gbe ti de ti lâ azu fade na ndö ni so.

Na peko ti so kobela ti Ezekias akai, lo sambela

⁹ Na peko ti so tere ti Ezekias, gbia ti Juda aso si kobela ti lo akai, bia so lo leke ayeke so:

¹⁰ Lani mbi tene na be ti mbi, mbi tene: so ade mbi te gigi mingi pepe, alingbi mbi hon. Angu so alingbi fade na mbi ti duti na fini, mbi yeke sara ni na ndo ti akuâ.

¹¹ Mbi kiri mbi tene na be ti mbi, mbi tene: na ndö ti sese so azo angba na fini daa so, mbi yeke kiri ti baa *KOTA GBIA pepe, mbi yeke kiri ti baa le ti mbeni zo pepe na popo ti azo ti dunia so.

¹² Da ti mbi so mbi duti na ya ni, a zi ni si a gue na ni yongoro na tere ti mbi, tongana gbefa ti wabatango-taba. Tongana ti so zo ti lekengo bongo ayeke rule bongo ti lo so ahunzi, fini ti mbi ahunzi legeoko tongaso. A fâ kamba ti bongo ni awe. KOTA GBIA, na kota lâ ngbii asi na lakui, mo hunzi na mbi awe.

¹³ Kozo si ndo ahan, mbi yeke ye oko pepe. KOTA GBIA afâ ya ti abio ti mbi kue tongana ti so bamara ayeke sara. Na kota lâ ngbii asi na lakui, mo hunzi na mbi awe.

¹⁴ Mbi dekongo tongana hirondele so ayeke huru mbage na mbage, mbi toto tongana *mbipa. Le ti mbi awoko kue na bango ndo na nduzu na mbage ti mo. KOTA GBIA, ye ahon ndö ti mbi awe, ga, mo mu maboko na mbi!

¹⁵ So KOTA GBIA laa asara ye ni so, fade mbi tene nyen na lo si lo kiri tënë na mbi? Lango akpe le ti mbi ndali ti vundu so ayeke na be ti mbi.

¹⁶ KOTA GBIA, ye so asi na mbi ando so, mo hinga ni kue, nilaa mo sara si mbi ngba na fini; mo kiri ngangu na mbi, mo bata mbi na fini.

¹⁷ Vundu ti be ti mbi akiri aga siriri. Biani, mo ye mbi mingi, nilaa mo sara si mbi li na du ti kuâ pepe; mo bi asiokpari ti mbi kue yongoro na peko ti mo.

¹⁸ Na ndo ti akuâ, zo oko ti gondango mo ayeke daa pepe, akuâ alingbi ti sepela mo pepe. Azo so azu na du ti kuâ awe, ala lingbi ti zia be ti ala na ndö ti tënë ti yanga ti mo mbeni pepe.

¹⁹ Me gi azo so ayeke na fini laa alingbi ti gonda mo, tongana mbi laso. Ababâ ayeke sara si amolenge ti ala ahinga so mo yeke bata tënë ti yanga ti mo.

²⁰ KOTA GBIA, mo soo mbi awe. Tongaso, e yeke pika mozoko ti gonda na mo na lango ti fini ti e kue, na ya ti da ti mo, KOTA GBIA.

²¹ Andaa Ésaïe atene: “Ayeke nzoni ala ga na mbeni gba ti holengo le ti fige so akpa gatoo so a nika ni nikango, ala zia na le ti ka ni si kobela ti lo akai.”

²² Ezekias ahunda ndo, atene: “Nyen laa ayeke fa na mbi atene, fade mbi yeke kiri ti gue na ya ti kota da ti KOTA GBIA?”