Ésaïe 36 - Mbeti ti Nzapa - Tënë so amu fini

Gbia ti Asirii aye ti tiri bira na Jérusalem

¹ Na ngu baleoko na osio ni so Ezekias ayeke le-gbia na Juda, Senakerib, gbia ti Asirii aga ti tiri bira na agbata kue ti Juda so a sara ngangu gbagba na tere ni si lo mu agbata ni.

² Andaa gbia ti Asirii ayeke na gbata ti Lakish. Lo ngba kâ si lo tokua na Jérusalem makonzi ti aturugu ti batango lo na gba ti aturugu; lo tokua ala na gbia Ezekias. Turugu ni aluti na tere ti du so ngu ayeke sua daa ti gue na ndo so a yeke bata ngu daa na nduzu; du ni ayeke na lege ti yaka ti azo ti sukulango bongo.

³ Tongaso, Eliakim, molenge ti Hilkia, makonzi ti yangbo ti gbia, lo na wakuasu Shebna nga na Yoa, molenge ti Asaf, zo ti tenengo peko ti tënë ti yanga ti gbia, asigigi ti wara lo.

⁴ Makonzi ti aturugu ti batango gbia ti Asirii atene na ala: “Ala gue, atene na Ezekias, atene: Tënë so kota gbia, gbia ti Asirii atene ayeke so: ‘So ziango be ti nyen laa mo zia na ndö ti ye so!

⁵ Mbi tene na mo, ye mo leke ti tiri bira na ngangu ayeke gi asenge tënë ti yanga! Zo wa laa mo zia be ti mo na ndö ti lo si mo tomboka na tere ti mbi so?

⁶ Baa, mo zia be ti mo na ndö ti Ezipte so ayeke tongana sosongo so afâ awe. Tongana zo agbu ni ti luti daa, ayeke kpo ya ti maboko ti lo. Faraon, gbia ti Ezipte ayeke nga tongaso ndali ti azo so kue azia be ti ala na ndö ti lo.

⁷ Gbaa, mo yeke tene na mbi, mo tene: Ala zia be ti e na ndö ti *KOTA GBIA, Nzapa ti ala. Me mo Ezekias laa, mo zi lani ando so a leke na ndö ti ahoto ti voro lo daa; mo zi nga agbalaka ti lo si mo mu yanga na azo ti Juda nga na azo ti Jérusalem ti voro KOTA GBIA gi na dawa ti gbalaka so!

⁸ Fadeso mo na gbia ti mbi, gbia ti Asirii atö, e baa: fade mbi yeke mu na mo ambarata saki use tongana mo lingbi ti wara azo ti kpengo na ala!

⁹ Na popo ti azo ti kua ti gbia ti mbi, ataa gi kete ni oko, mo lingbi ti tumba lo? Mo so mo zia be ti mo gi na ndö ti Ezipte titene mo wara apusu ti mbarata na azo ti kpengo na ni so!

¹⁰ KOTA GBIA biani laa ayeda titene gbia ti mbi ague ti tiri bira na kodro so si a buba ni! KOTA GBIA laa atene na lo: Mo gue, mo tiri bira na kodro so, mo buba ni kue!’ ”

¹¹ Tongaso Eliakim, Shebna nga na Yoa atene na makonzi ti aturugu ti batango gbia, atene: “E gbu gere ti mo, mo tene tënë na e, azo ti gbe ti mo, na yanga ti arameen, ngbanga ti so e yeke ma ni. Me mo tene tënë ni na yanga ti hebro pepe, ngbanga ti azo so aduti na ndö ti gbagba ti gbata ni.”

¹² Me makonzi ti aturugu ni akiri tënë: “Gbia ti mbi atokua mbi ti tene tënë so gi na ala nga na gbia ti ala oko? Tënë ni ayeke nga ndali ti azo so aduti na ndö ti gbagba ti gbata ni, azo so fade ayeke te puru ti ala wani si ala yeke nyon inon ti ala tongana ti so ala na gbia ti ala ayeke sara ni ande.”

¹³ Na pekoni, makonzi ti aturugu ti batango gbia ti Asirii aluti na nduzu si lo dekongo na kota go na yanga ti hebro, lo tene: “Ala ma tënë ti kota gbia, gbia ti Asirii si!

¹⁴ Tënë so gbia atene ayeke so: ‘Ala zia Ezekias ahanda ala pepe, lo lingbi ti zi ala pepe.

¹⁵ Lo hunda na ala titene ala zia be ti ala na ndö ti KOTA GBIA, atene: Fade KOTA GBIA ayeke zi e biani biani; fade gbata so ayeke ti na maboko ti gbia ti Asirii pepe. So mvene laa.

¹⁶ Ala ma tënë ti Ezekias pepe, me ala ma gi tënë so gbia ti Asirii ayeke tene na ala; lo tene: Ala sara songo na mbi, ala zia tere ti ala na maboko ti mbi si fade zo oko oko na popo ti ala ayeke te le ti *vinye ti lo na le ti keke ti fige ti lo si lo yeke nyon ngu ti du ti ngu ti lo.

¹⁷ Na pekoni, mbi yeke ga ti mu ala, ti gue na ala na mbeni sese so ayeke tongana sese ti ala, sese so *ble na fini vin ayeke daa, sese so kobe na vin asi singo daa.

¹⁸ Ala zia Ezekias ahanda ala pepe, atene: Fade KOTA GBIA ayeke zi e! Anzapa ti amara nde, mbeni oko awara lege ti zi kodro ti lo wani na maboko ti gbia ti Asirii awe?

¹⁹ Anzapa ti Hamat na ti Arpad ayeke na ndo wa? Anzapa ti Sefarvaim ayeke na ndo wa? Mbeni nzapa azi gbata ti Samarii na maboko ti mbi awe?

²⁰ Na popo ti anzapa kue ti akodro so, nzapa wa laa azi kodro ti lo na maboko ti mbi si fade KOTA GBIA alingbi ti zi Jérusalem na maboko ti mbi?’ ”

²¹ Azo ni kue azi yanga oko pepe; zo oko akiri tënë pepe, ngbanga ti so yanga so gbia amu fade ayeke so: “Fade ala kiri tënë na lo pepe.”

²² Na pekoni, Eliakim, molenge ti Hilkia, makonzi ti yangbo ti gbia, lo na wakuasu Shebna nga na Yoa, molenge ti Asaf, zo ti tenengo peko ti tënë ti yanga ti gbia asuru bongo na tere ti ala. Ala kiri na tere ti Ezekias si ala tene na lo peko ti tënë ti makonzi ti aturugu ti batango gbia ti Asirii.