Ésaïe 33 - Mbeti ti Nzapa - Tënë so amu fini

Mawa na zo ti bubango ye!

¹ Mawa na mo, mo so mo yeke buba ye si ade a buba mo pepe so! Mawa na mo, mo so mo yeke ka azo si ade ti ka mo pepe so! Tongana mo buba aye kue awe, fade a yeke buba nga mo. Tongana mo ka azo kue awe, fade a yeke ka nga mo.

² *KOTA GBIA, baa mawa ti e! E zia be ti e ti ku mo. Lakue na ndaperere, mo ga ngangu ti e, mo ga wasongo e na ndembe ti ye ti ngangu.

³ So azo ama wuluwulu ti mo, ala kpe; gi so mo londo, amara nde akangbi kirikiri.

⁴ Tongaso, azo ayeke ro aye na peko ti bira tongana ti so akete gbadola ayeke ro aye. Azo ayeke tuku na ndö ti aye ni tongana ti so agbadola ayeke tuku na ndö ti aye.

⁵ A ya iri ti KOTA GBIA, ngbanga ti so lo yeke duti na nduzu kâ. Lo sara si sarango ye na legeni na fango ngbanga ti mbirimbiri asi singo na ya ti Jérusalem kue.

⁶ Ti ala azo ti KOTA GBIA, na ya ti fini ti ala, mbeni ye ti sioni alingbi ti si na ala pepe. Dutingo na ndara na hingango Nzapa ayeke nzoni ye so ayeke soo ala; kpengo mbeto ti KOTA GBIA, so mosoro ti ala laa!

KOTA GBIA ayeke ga na tere ti azo ti lo

⁷ Baa, azo ti Ariel laa ayeke dekongo na ndö ti lege so. Awatokua ti siriri laa ayeke toto ngangu mingi so.

⁸ Ndö ti alege ade dengo, zo oko ayeke hon na ndö ti akete lege pepe. A buba tënë ti ya ti *mbuki awe, azo so ayeke na tere ti tënë ti mbuki ni, a bi ala yongoro awe, zo oko ti ne mba ti lo ayeke daa pepe.

⁹ Sese ni ayeke na mua, ayeke hole holengo. Agbako ti Liban ahole kue si kamene ahon ndö ti ala. Lando ti Saron ahole kasakasa. Ahoto ti Bashan na ti Karmel, akeke ayeke daa mbeni pepe.

¹⁰ *KOTA GBIA atene: “Fadeso mbi yeke londo, fadeso mbi yeke luti na nduzu, fadeso, mbi yeke sara titene azo aya iri ti mbi.

¹¹ Apialo so ala leke ayeke tongana holengo pere; tongana apialo ni abaa gigi awe, aga gi pere. Pupu ti yanga ti ala wani ayeke gbi ande ala tongana wâ.

¹² Wâ ayeke gbi amara nde si ala yeke ga gi mburu ti wâ. Wâ ayeke gbi ala tongana aki so a fâ ni si a tuku na le ti wâ.

¹³ Ala so ayeke na yongoro ndo, ala ma tënë ti ye so mbi sara! Ala so ayeke nduru ge, ala hinga ngangu ti mbi!”

¹⁴ Na *Sion, azo ti siokpari ado na mbeto, tere ti azo ti sioni ado. Ala yeke hunda tere ti ala, atene: “Wâ so ayeke gbi ye kue so, zo wa na popo ti e alingbi ande ti luti na tere ni, zo wa? Zo wa na popo ti e alingbi ti luti na tere ti kota wâ so ayeke gbi lakue lakue so zo wa?”

¹⁵ – Zo so ayeke sara ye ti mbirimbiri si lo yeke tene taa-tënë; zo so ake ti wara ye na lege ti sarango ngangu na azo, zo so ake titene a pete na lo goro, zo so akanga mê ti lo titene lo ma atënë ti fango zo pepe, zo so akanga le ti lo titene lo baa ye ti sioni pepe.

¹⁶ Zo tongaso ayeke duti na nduzu kâ. Ndo ti batango tere ti lo ayeke atêne so ayeke tongana ngangu gbagba. A yeke mu na lo kobe ti tengo ni, ngu ti nyongo ni ayeke tia lo pepe.

A zi Jérusalem na ya ti kpale awe

¹⁷ Fade le ti mo ayeke baa gbia na ya ti pendere ti lo, mo yeke baa kota le ti sese ni kue.

¹⁸ Mo yeke gbu li ti mo na ndö ti ye so ayeke zia lani mbeto na be ti mo si mo yeke hunda tere ti mo, mo tene: “Azo so lani ayeke baa ndo na ndö ti akua so, ala yeke fadeso na ndo wa? Azo so lani ayeke diko nginza ti lapo so, ala yeke fadeso na ndo wa? Azo so lani ayeke baa lege ti angangu gbagba so, ala yeke fadeso na ndo wa?”

¹⁹ Azo ti baba so, ala so ayeke tene yanga ti kodro so zo ayeke ma ya ni pepe, ala so ayeke tene guguma so zo alingbi ti ma ni pepe, mo yeke kiri ti baa ala pepe.

²⁰ Mo baa *Sion, gbata so ando e yeke sara amatanga ti e daa, mo baa Jérusalem, ndo so azo ayeke duti daa kpoo; gbata ni ayeke ga tongana da ti bongo so ayeke kiri ti zi ni pepe, a yeke kiri ti gboto awen so a kpo ti gbu na da ni pepe, a yeke kiri ti zi akamba ni pepe.

²¹ Kâ laa KOTA GBIA ayeke fa na e gonda ti lo. Ndo ni kâ ayeke duti ndo ti akota *bale na ti akota ngu. Amangboko ti bira ayeke hon na le ti ngu ni pepe, apendere kota mangboko ayeke fâ ngu ni pepe.

²² Biani, KOTA GBIA ayeke fâ ngbanga na popo ti e, lo laa lo yeke fa na e ndia. KOTA GBIA ayeke gbia ti e, lo laa lo yeke soo e.

²³ Akamba so a kanga na tere ti amangboko, a zi ni awe; akamba ni akiri agbu keke ti mangboko ni pepe; a yeke kiri ti gboto bendere ni na nduzu pepe. Ndani laa azo ayeke kangbi na popo ti ala gba ti aye so ala gbu na peko ti bira. Ataa azo ti bubango gere ayeke gue ti nzi aye.

²⁴ Mbeni zo oko so alango na Jérusalem ayeke tene pepe: “Tere ti mbi aso.” A yeke zi siokpari na li ti azo ti gbata ni.