Ésaïe 31 - Mbeti ti Nzapa - Tënë so amu fini

Azo ti Ezipte ayeke gi asenge zo ti sese!

¹ Mawa na azo so ayeke gue na Ezipte titene a mu maboko na ala! Ala zia be ti ala na ndö ti ambarata, na ndö ti apusu ti mbarata, ngbanga ti so apusu ni ayeke gbani gbani; ala zia be ti ala na ndö ti azo ti kpengo na mbarata, ngbanga ti so ala yeke na ngangu mingi. Me ala yeke baa ndo na mbage ti Nzapa ti Israel pepe, lo so lo yeke nde si lo yeke nzoni kue; ala yeke gi *KOTA GBIA pepe.

² Me lo nga, lo yeke na kode: lo yeke sara si ye ti mawa aga, tënë so lo tene, lo tene awe. Lo londo ti ga na tere ti bongbi ti azo ti sioni nga na tere ti azo ti sarango sioni so a iri ala ti ga ti mu maboko.

³ Azo ti Ezipte ayeke gi asenge zo, ala yeke anzapa pepe; ambarata ti ala ayeke gi anyama, ala yeke yingo pepe. Tongana *KOTA GBIA ayoro maboko ti lo, zo so aye fade ti mu maboko na mba ti lo ayeke pika gere ti lo ti ti, zo so ahunda fade titene mba ti lo amu maboko na lo, lo yeke ti; ala use kue ayeke kui.

KOTA GBIA, wabatango Jérusalem

⁴ Tënë so *KOTA GBIA atene na mbi laa: “Tongana bamara wala kete bamara ayeke toto ti bata nyama so lo gbu ti te, ataa azo airi gba ti awabatango-taba ti ga na tere ti lo, mbeto ti dekongo ti ala asara lo pepe, lo yeke zia nyama ni ndali ti wusuwusu ti ala pepe. Ye ni ayeke duti ande legeoko tongaso ndali ti mbi KOTA GBIA so mbi yeke na ndö ti dunia kue, mbi yeke zu na ndö ti hoto ti *Sion, ti tiri bira kâ.”

⁵ Tongana ti so ndeke ayeke zi ya ti *akpangi ti lo fade KOTA GBIA so ayeke na ndö ti dunia kue ayeke bata Jérusalem. Lo yeke bata lo si lo yeke zi lo, lo yeke kanga lege na kpale ti si na lo si lo yeke soo lo.

⁶ Ala azo ti Israel, ala ke lani KOTA GBIA mingi! Ala kiri fadeso na mbage ti lo ma!

⁷ Na lango ni so, zo oko oko ayeke bi anzapa ti lo so lo sara na wen ti nginza wala na lôro, anzapa so maboko ti lo ti siokpari asara ni so.

⁸ Fade azo ti Asirii ayeke ti na yanga ti yongoro zeme so ayeke ti zo pepe; yongoro zeme so ayeke fâ ala ayeke ti zo pepe. Azo ti Asirii ayeke kpe na le ti yongoro zeme ni, a yeke gbu amaseka ti ala ti koli ti sara akua ti ngbaa.

⁹ Lo so lo yeke na ngangu mingi, lo yeke do na mbeto si lo yeke kpe, be ti amakonzi ti aturugu ti lo ayeke woko kue, ala yeke do bendere ti ala ti zia ti hon. So tënë ti yanga ti KOTA GBIA laa, lo so wâ ti lo ayeke na Sion, kota wâ ti lo ayeke za na Jérusalem.