Ésaïe 25 - Mbeti ti Nzapa - Tënë so amu fini

KOTA GBIA, ndo ti batango tere ti azo ti lo

¹ *KOTA GBIA, mo yeke Nzapa ti mbi, mbi yeke ya iri ti mo, mbi yeke sepela iri ti mo, ngbanga ti so mo sara aye ti dongo be. Mo leke tënë ti aye ni na be ti mo ngbene ye aninga, aluti ngangu si akpengba.

² Mo sara si gbata ni aga gba ti atêne. Gbata so a sara ngangu gbagba na tere ni, mo sara si abuba kue. Yangbo ti awande akpa gbata mbeni pepe, zo ayeke kiri ti leke ni laoko pepe.

³ Ndani laa mbeni ngangu mara ayeke gonda mo, gbata ti amara so ayeke sara ngangu na azo ayeke kpe mbeto ti mo.

⁴ Biani, mo yeke ndo so azo so ayeke na ngangu pepe ayeke kpe daa ti bata tere ti ala, mo yeke ndo ti batango tere ti awayere so ye ti ngangu asi na ala. Mo yeke tongana gbefa ti bata zo ndali ti ngu-Nzapa, gbe ti de ti bata zo ndali ti ndo-wâ. Biani, pupu ti yanga ti azo ti sarango ngangu na zo ayeke tongana ngangu pupu ti ngu-Nzapa so apika tere ti da,

⁵ tongana sungo ti lâ na ndö ti kuru sese. Mo yeke kai wusuwusu ti awande. Mo yeke kai ngia ti azo ti sarango ngangu na zo tongana ti so mbinda ayeke kanga le ti lâ.

Matanga ndali ti azo kue

⁶ Na ndö ti hoto ti *Sion, *KOTA GBIA so ayeke na ndö ti dunia kue ayeke leke matanga ndali ti azo kue, matanga ti nyama ti mafuta na ti vin ti nzoni ni, ti nyama ti mafuta so awoko pendere na vin so ayeke nzoni mingi.

⁷ Na ndö ti hoto so, lo yeke zi bongo ti mua so akanga ndö ti azo kue, lo yeke zi nga bongo so a bi na ndö ti amara kue.

⁸ Lo yeke mingo kuâ biani biani. Kota Gbia NZAPA ayeke mbo ngu ti le ti azo kue; lo yeke zi kamene na le ti azo ti lo na ndö ti sese so kue. KOTA GBIA laa atene tënë so.

Ngia na azo ti Israel, vundu na azo ti Moab

⁹ Na lango ni so, fade azo ayeke tene: “*KOTA GBIA laa ayeke Nzapa ti e. E zia be ti e lani ti ku lo si lo soo e. KOTA GBIA laa e zia be ti e ti ku lo. Ayeke nzoni e duti na ngia, e dodo na ngia, ndali so lo soo e awe!

¹⁰ Maboko ti KOTA GBIA ayeke na ndö ti hoto so.” Me a yeke do Moab na gbe ti gere na ndo so lo yeke daa, tongana ti so a yeke do holengo pere na ndo so puru ti bagara ayeke daa.

¹¹ Kâ, Moab ayeke yoro maboko ti lo tongana ti zo ti tingo ngu. Ataa lo sara ngangu tongana nyen, KOTA GBIA ayeke sara si baba ti lo akiri na gbeni.

¹² Ngangu gbagba so ayo na nduzu, kota gbagba ti bira ti mo so, KOTA GBIA ayeke kungbi ni na sese, lo yeke fâ ni kue si lo yeke bi ni na ya ti fuku ti sese.