Ésaïe 22 - Mbeti ti Nzapa - Tënë so amu fini

Nzapa agboto mê ti Jérusalem

¹ Nengo tënë na ndö ti popo-hoto, ndo so mbeni ye asigigi daa na ya ti mbeni ye tongana bango-li. Jérusalem, nyen laa asara si azo ti mo kue ama na li ti da so?

² Ngbanga ti nyen si wuluwulu na wusuwusu asi singo na ya ti gbata ni? Azo ti mo so akui so, ala kui kuâ ti yongoro zeme pepe, a fâ ala na ya ti bira pepe.

³ Aturugu ti mo ti kota kamba kue akpe, azo ti pikango kokora agbu aturugu ni ti ga azo ti kanga. Azo so kue awato awara ala, awato ni agbu ala ti ga azo ti kanga, ataa ala so akpe yongoro.

⁴ Ndani laa mbi tene na ala: “Ala zia mbi, mbi toto ngangu mingi. Kota kpale asi na azo ti mbi, ala tara ti de be ti mbi pepe.

⁵ Biani, laso Kota Gbia, NZAPA so ayeke na ndö ti dunia kue atokua ye ti ziango kota mbeto na be ti e, lo sara si e ti na gbe ti awato si ye aga kirikiri na e.” Na popo-hoto, ndo so ye asigigi daa na ya ti mbeni ye tongana bango-li, kota gbagba ati na sese awe; dekongo ti azo ague ngbii asi na li ti ahoto.

⁶ Aturugu ti Elam ayo bozo ti akokora; ala yeke na ndö ti apusu ti mbarata nga na ndö ti ambarata. Aturugu ti Kir aleke *avala ti ala.

⁷ Jérusalem, apusu ti mbarata ti bira asi singo na ya ti apendere popo-hoto ti mo; azo ti kpengo na mbarata aleke tere ti ala ti tiri bira na yanga ti gbata ti mo.

⁸ Mbeni ye so ayeke bata kodro ti Juda ayeke daa mbeni pepe. Na lango ni so, ala baa ndo awe na mbage ti aye ti bira so a bata na ya ti da so iri ni “Gbako”.

⁹ Adu so kue azo akoro na tere ti gbagba so ayeke bata Gbata ti David, ala baa ni awe. Ala to ngu awe, abata na ya ti du so ayeke na gbeni.

¹⁰ Ala diko ada ti Jérusalem awe, ala kungbi ambeni da ni na sese ti sara si gbagba ti gbata ni akpengba ngangu.

¹¹ Ala leke mbeni ndo ti batango ngu na popo ti agbagba use so awe ndali ti ngu ti ngbene du ti batango ngu. Me lo so asara si aye so abaa gigi, ala baa ndo na mbage ti lo pepe. Lo sara aye ni ngbene ye aninga awe, me ala baa lo pepe.

¹² Na lango ni so, Kota Gbia, NZAPA so ayeke na ndö ti dunia kue, airi ala ti toto, ti dema tere, ti kio kua ti li ti ala, ti yu bongo ti mua.

¹³ Andaa ala yeke dodo, ala yeke sara ngia: ala fâ abagara, ala fâ ataba, ala te nyama, ala nyon vin. Ala tene: “E te, e nyon, ngbanga ti so kekereke, e yeke kui.”

¹⁴ Me *KOTA GBIA so ayeke na ndö ti dunia kue atene na mê ti mbi tënë so angba na hondengo, atene: “Mbi deba yanga ti mbi, mbi tene, sioni so ala sara so, a yeke zi tënë ni na li ti ala laoko pepe, ngbii ala kui.” Tënë so Kota Gbia, NZAPA so ayeke na ndö ti dunia kue atene laa.

Fade a yeke zi Shebna na ndo ti kua ti lo

¹⁵ Tënë so Kota Gbia NZAPA so ayeke na ndö ti dunia kue atene na mbi ayeke so: “Gue mo wara Shebna so, lo so lo yeke baa ndo na ndö ti azo nga na aye ti da ti gbia, makonzi ti yangbo ti gbia, mo tene:

¹⁶ Nyen laa mo yeke na ni ge, nyen? Zo wa laa ayeke sewa ti mo ge si mo zi du ti kuâ ndali ti mo, mo leke ni ngbii asi na nduzu, mo zi ndangba ndo ti lango ti mo na ya ti têne so?

¹⁷ Mo koli-ngangu so, fade *KOTA GBIA ayeke bi mo yongoro, lo yeke kanga mo tongana gba

¹⁸ si lo yeke tokua mo titene mo rule tongana ndembo na ya ti mbeni kodro so akono. Kâ, mo yeke kui ande, mo na apendere pusu ti mbarata ti mo kue, mo so mo yeke zia kota kamene na le ti makonzi ti mo!”

¹⁹ KOTA GBIA atene: “Fade mbi yeke tumba mo na ndo ti kua ti mo, mbi yeke zi mo na kota ndo ti mo.

²⁰ Na lango ni so, fade mbi yeke iri zo ti kua ti mbi Eliakim, molenge ti Hilkia.

²¹ Mbi yeke mu kota bongo ti kua ti mo ti yu na lo, mbi yeke mu kamba ti ndö ti bongo ti mo ti kanga na ngbonda ti lo, mbi yeke zi komandema ti mo ti mu na lo. Lo yeke ga babâ ti azo ti Jérusalem na ti azo ti Juda.

²² Mbi yeke mu na lo kerere ti yanga ti da ti David. Tongana lo zi yanga ti da ni, zo oko ti kanga ni ayeke daa pepe, tongana lo kanga yanga ti da ni, zo oko ti zi ni ayeke daa pepe.

²³ Mbi yeke sara titene lo kpengba na ndo so lo yeke daa tongana kota pondi so a pika si alinda na ndo so akpengba kpengbango.”

²⁴ Azo ti sewa ti lo kue, akota zo na akete zo, a yeke kanga ala na tere ti lo tongana ti so a yeke kanga akungba ti ya ti da na tere ti pondi so a pika si alinda na ya ti dere; a yeke kanga akungba ni, ti londo na akete du ti sembe ti si na akota sembe. So nengo kungba!

²⁵ So tënë ti yanga ti KOTA GBIA so ayeke na ndö ti dunia kue laa: “Na lango ni so, wen so a pika si alinda na ndo so akpengba, fade a yeke zi, a yeke kungbi si ayeke ti na sese, anengo kungba so a kanga na tere ni ayeke buba.” KOTA GBIA laa atene tënë so.