Ésaïe 20 - Mbeti ti Nzapa - Tënë so amu fini

Ésaïe ayeke tambula tere ti lo senge, gere ti lo senge

¹ Ye ni asi na ngu so Sargon, gbia ti Asirii atokua turugu ti kota kamba ti lo ti gue ti tiri bira na gbata ti Asdod si lo mu gbata ni.

² Ngu ota kozoni, *KOTA GBIA atene tënë na azo na lege ti Ésaïe, molenge ti Amoz, lo tene: “Gue mo zi bongo ti mua so mo kanga na ngbonda ti mo, mo zi nga poro na gere ti mo.” Ésaïe asara ye ni si lo tambula tere ti lo senge, gere ti lo senge.

³ Na ngoi so a mu gbata ti Asdod, KOTA GBIA atene tënë na lege ti Ésaïe, atene: “Baa, ngu ota laa Ésaïe, zo ti kua ti mbi atambula tere ti lo senge, gere ti lo senge. Ye ni afa mbeni ye so ayeke si, ye ti gbotongo mê ndali ti Ezipte na Etiopii.

⁴ Fade gbia ti Asirii ayeke gbu azo ti Ezipte ti gue na ala na kodro wande, lo yeke gbu azo ti Etiopii ti gue na ala na kodro ti lo: amaseka na ambakoro. Lo yeke gue na ala tere ti ala senge, gere ti ala senge, ngbonda ti ala senge. Fade ayeke duti ye ti kamene na azo ti Ezipte!

⁵ Azo so azia be ti ala ando na ndö ti Etiopii, azo so ayeke pika kate ti ala ndali ti maboko so Ezipte ayeke mu na ala, fade kamene ayeke gbu le ti ala.”

⁶ Na lango ni so, azo so ayeke lango na yanga ti kota ngu-ingo so ayeke tene: “Azo so lani e zia be ti e na ndö ti ala so, baa ye so asi na ala laa! E ye lani ti honde tere ti e na ndo ti ala, titene ala mu na e maboko, titene ala zi e na maboko ti gbia ti Asirii! Fadeso e yeke sara tongana nyen?”