Ésaïe 19 - Mbeti ti Nzapa - Tënë so amu fini

Ye aga kirikiri na azo ti Ezipte

¹ Nengo tënë na ndö ti Ezipte. Baa KOTA GBIA ayeke tambula na ndö ti mbinda so ayeke hon hio hio, lo yeke ga na Ezipte. Ayanda ti Ezipte ayeke do na mbeto na dawa ti lo; be ti azo ti Ezipte afun kue.

² *KOTA GBIA atene: “Mbi yeke pusu azo ti Ezipte na tere ti amba ti ala, zo oko oko ayeke tiri na ita ti lo, zo oko oko ayeke tiri na mba ti lo mbeni gbata ayeke tiri na mbeni gbata, mbeni kodro-gbia ayeke tiri na mbeni kodro-gbia.

³ Fade be ti azo ti Ezipte ayeke woko, mbi yeke buba ya ti apialo ti ala. Tongaso, ala yeke gue ti hunda ayanda, ayingo ti akuâ na azo so ayeke baa nda ti aye.

⁴ Mbi yeke zia azo ti Ezipte na gbe ti komandema ti mbeni makonzi so aso mingi; mbeni gbia ti ngangu ayeke sara komandema na ndö ti ala.” So tënë ti yanga ti Kota Gbia NZAPA so ayeke na ndö ti dunia kue laa.

⁵ Fade ngu ti Nil ayeke hole, *bale ayeke hole kasakasa.

⁶ Ngu ti ya ti akota du ayeke fun, akete ngu ti Ezipte ayeke kiri na gbeni si ayeke hole. Asosongo na apere ti yanga ti ngu ayeke hole.

⁷ Apere so ayeke na yanga ti ngu ti Nil na ala so ayeke na ndo so ngu ti Nil ayeke tuku daa na ya ti kota ngu-ingo, na ayaka so kue a lu na tere ti ngu ni, ala kue ayeke hole. Pupu ayeke mu ni ti hon na ni, ye oko ayeke ngba pepe.

⁸ Azo ti gingo susu ayeke dema, azo ti bingo yango na ya ti ngu ti Nil ayeke toto tere ti ala, azo so ayeke bi gbanda na ya ti ngu ni, ngangu ayeke hunzi na ala kue.

⁹ Azo so ayeke sara kua ti *len, kamene ayeke gbu le ti ala; awali so ayeke sua ya ti akamba ni na akoli so ayeke kpo bongo, gingo be ayeke hon ndö ti ala.

¹⁰ Azo so ayeke kpo bongo, ngangu ayeke na ala pepe; azo so ayeke sara kua ti nginza, be ti ala awoko kue.

¹¹ Amakonzi ti gbata ti Soan ayeke azo ti buba mingi, azo ti ndara so ayeke mu wango na Faraon, ala yeke bongbi ti azo so li ti ala ayeke daa pepe. Asara tongana nyen laa ala tene na Faraon: “Mbi yeke molenge ti azo ti ndara, molenge ti agbia ti giriri”?

¹² Gbia Faraon, azo ti ndara ti mo ni ayeke na ndo wa? Ye so KOTA GBIA so ayeke na ndö ti dunia kue aleke na be ti lo ti ga na ni na tere ti Ezipte so, ayeke nzoni ala fa ni na mo titene mo hinga!

¹³ Amakonzi ti Soan aga azo ti buba awe, amakonzi ti Manfis ahanda tere ti ala. Amakonzi ti akete mara laa ayeke gue na Ezipte na sioni lege.

¹⁴ KOTA GBIA azia na ya ti Ezipte yingo ti turnengo li ti zo. Biani, amakonzi ni ayeke hon na Ezipte kirikiri na ya ti aye so kue kodro ni ayeke sara. Ezipte ayeke tongana zo so samba ahon ndö ti lo si lo yeke hon kirikiri na ya ti ye so lo de awe.

¹⁵ Na Ezipte, zo oko ayeke kiri ti sara ye pepe, ataa li ni, ataa damba ni, ataa maboko ti mburu na pere ti sosongo.

Kekereke ti Ezipte

¹⁶ Na lango ni so, azo ti Ezipte ayeke ga tongana awali; ala yeke do na mbeto na ndembe so *KOTA GBIA so ayeke na ndö ti dunia kue ayeke yoro maboko ti lo ti be le na ala.

¹⁷ Sese ti Juda ayeke ga mbeni ye ti ziango mbeto na be ti azo ti Ezipte. Lakue tongana mbeni zo adabe ti ala na ye so asi na Juda, tere ti ala ayeke do ndali ti ye so KOTA GBIA so ayeke na ndö ti dunia kue aleke na be ti lo ti sara na ala.

¹⁸ Na lango ni so, fade agbata ayeke duti oku na Ezipte so azo ayeke tene yanga ti hebro daa, so azo adeba yanga ti ala kâ ti ga azo ti KOTA GBIA so ayeke na ndö ti dunia kue. Oko ti agbata ni, iri ni ayeke duti Gbata-ti-lâ.

¹⁹ Na lango ni so, fade gbalaka ti KOTA GBIA ayeke duti taa na be ti kodro ti Ezipte, mbeni ngbongboro têne so azo aleke si aluti na nduzu ndali ti KOTA GBIA ayeke duti na katikati ti kodro ni.

²⁰ So ayeke mbeni ye so ayeke fa atene, KOTA GBIA so ayeke na ndö ti dunia kue ayeke na ya ti kodro ti Ezipte. Tongana azo ti Ezipte adekongo na KOTA GBIA ndali ti azo so ayeke sara ngangu na ala, fade lo yeke tokua mbeni wasongo ala so ayeke gbu koko ti ala si ayeke zi ala.

²¹ KOTA GBIA ayeke sara si azo ti Ezipte ahinga lo; na lango ni so, ala yeke hinga lo si ala yeke sara na lo na mungo na lo asandaga nga na anzoni ye. Ala yeke mu zendo na KOTA GBIA si ala yeke sara ye ti peko ti zendo ni.

²² Tongaso, KOTA GBIA ayeke pika azo ti Ezipte. Lo yeke pika ala, me lo yeke kai kobela ti ala: fade ala yeke kiri na KOTA GBIA, lo yeke ma ala si lo yeke kai kobela ti ala.

²³ Na lango ni so, mbeni lege ayeke londo na Ezipte ti si na Asirii. Azo ti Asirii ayeke gue na Ezipte si azo ti Ezipte ayeke gue na Asirii. Ala kue ayeke bongbi ti voro KOTA GBIA.

²⁴ Na lango ni so, Israel ayeke duti ota kodro na popo ti akodro ti Ezipte na ti Asirii so na lege ti ala, KOTA GBIA ayeke sara tufa na ndö ti dunia kue.

²⁵ KOTA GBIA so ayeke na ndö ti dunia kue ayeke sara tufa ni, atene: “Mbi sara tufa na ndö ti Ezipte, azo ti mbi, na ndö ti Asirii so mbi sara na maboko ti mbi wani nga na ndö ti Israel, ye so aga ye ti mbi.”