Ésaïe 18 - Mbeti ti Nzapa - Tënë so amu fini

Nzapa agboto mê ti alembe ti Etiopii

¹ So mawa ti nyen! Kodro so amangboko ti lo ayeke na abongo use so a kanga na li ni, kodro so ayeke na tere ti *bale ti Etiopii!

² Mo so mo yeke tokua alembe ti tambula na le ti kota ngu ti Nil si ala yeke tambula na ya ti ango so a sara na sosongo! Ala alembe so ayeke gue tokua hio hio so, ala kiri na mbage ti azo ti mara so ayo mingi si poro ti tere ti ala ayeke za zango so, azo so ayeke zia mbeto na be ti azo na ndo so ngbii asi na ndo kue, mara so ayeke na ngangu si ayeke nika awato ti ala so. Ala kiri na kodro ti ala so abale ahon na ya ni so.

³ Ala azo so kue alango na ndö ti dunia, ala so amu ndö ti sese, na ndembe so a yeke yo bendere na nduzu na ndö ti ahoto, ala baa ndo! Na ndembe so a yeke huru didi, ala ma!

⁴ Biani, tënë so *KOTA GBIA atene na mbi ayeke so: “Kâ na nduzu, na ndo so mbi yeke duti daa, mbi duti kpoo, mbi yeke baa ndo tongana ti so ndo amu wâ mingi na kota lâ, tongana ti so mbinda ti ngu ayeke na ndö ti pere na ngoi ti fango ale ti kobe.”

⁵ Kozo titene a fâ ale ti kobe, tongana kongo ti vinye asigigi awe, tongana kongo ni aga le ti vinye si ato nda ti be, a yeke mu nzenze ti fâ na akete maboko ti keke so aduti senge senge na tere ti keke ni, a yeke zi *aguruma ni nga na akugbe ni.

⁶ Fade a yeke do aye so kue ti zia na *angoalo ti li ti hoto nga na asioni nyama ti ngonda. Angoalo ni ayeke gue ti duti kâ na ngoi ti ndo-wâ; asioni nyama ni ayeke gue ti duti kâ na ngoi ti de.

⁷ Na ngoi ni so, fade azo ayeke ga na anzoni ye na KOTA GBIA so ayeke na ndö ti dunia kue; azo ni ayo mingi, poro ti tere ti ala ayeke za zango, ala yeke zia mbeto na be ti azo na ndo so ngbii asi na ndo kue, ala yeke nika awato ti ala, abale ahon na ya ti kodro ti ala. Fade a yeke ga na anzoni ye na li ti hoto ti *Sion, ndo so KOTA GBIA so ayeke na ndö ti dunia kue ayeke duti daa.