Ésaïe 16 - Mbeti ti Nzapa - Tënë so amu fini

Moab ahunda na Jérusalem ti mu na lo maboko

¹ Amakonzi ti Moab atene: “Kâ na gbata ti Kota-têne-ti-benyama, ala tokua koli-taba na kota zo ti kodro ni, na gbia ti Juda, na hoto ti *Sion.”

² Awali ti Moab ayeke luti na ndo so a yeke fâ ngu ti Arnon daa na gere. Ala kpa andeke so akpe, andeke so a tumba ala na da ti ala.

³ Azo ti Moab ahunda na Jérusalem, atene: “Mo mu na e wango, mo mu yanga biani. Taa na kota lâ, mo gbara gbe-de ti mo na ndö ti e ti bata e tongana bi so ayeke gbara gbe-de ti lo. Azo ti e so akpe so, mo honde ala, mo ka ala pepe.

⁴ Azo ti e so akpe kodro ti ala so, mo zia lege na ala ti duti na ndo ti mo. Mo mu mbeni ndo na ala titene ala honde tere ti ala daa ndali ti zo ti bubango ndo. Mbeni lâ, zo ti nikango azo ayeke daa mbeni pepe, bubango ndo ayeke hunzi, zo ti sarango ngangu na azo ayeke hon na ya ti kodro ni.

⁵ Tongaso, ndali ti nzoni be ti mo, fade mbata ti gbia ti *hale ti David ayeke kpengba. Lo yeke duti ti fâ ngbanga mbirimbiri, lo yeke sara ye na lege ti ndia, lo yeke nduru ti fâ ngbanga mbirimbiri.”

Jérusalem alingbi ti sara ye oko ndali ti Moab pepe

⁶ E ma tënë ti baba ti Moab awe; baba ti lo so ahon ndoni, pikango kate ti lo, bango azo tongana mbumbuse ye, kuru baba ti lo so ahon ndoni, fango tere ti lo so ayeke senge senge.

⁷ Me fadeso, azo ti Moab ayeke dema tere ndali ti Moab. Ala kue ayeke he bia ti demango tere ndali ti agatoo so a sara na le ti *vinye so a sara na Kir-Heres. Na vundu na be, ala yeke dema.

⁸ Ayaka ti Heshebon ahole kue, ayaka ti vinye ti Sibma ahole nga kue: vin ti ala ayeke kinda ando amakonzi ti amara nde. Ayaka ni ague ngbii asi na Yazer, amu ndo ngbii asi na benyama; amaboko ti akeke ni ague ngbii asi na mbage ti kota ngu ti Gba-ti-ingo kâ.

⁹ Ndani laa, mbi na azo ti Yazer e yeke toto ndali ti yaka ti vinye ti Sibma. Mo Heshebon, mo Elale, ngu ti le ti mbi ayeke yuru gbani gbani na ndö ti ala tongana ngu so ayeke sua. Biani, dekongo ti bira ati na ndö ti ale ti vinye ti ala nga na ale ti kobe ti ala.

¹⁰ Ngia na nzerengo tere ahunzi awe na ya ti ayaka so akeke so a yeke te le ni tengo ayeke daa. Na ya ti ayaka ti vinye, zo ayeke kiri ti ma bia ti ngia pepe, zo ayeke kiri ti ma dekongo na ngia pepe. Zo ayeke kiri ti pete vin pepe na ya ti du so a yeke pete ale ti vinye daa, dekongo na ngia akai awe.

¹¹ Ndani laa mbi yeke toto na vundu ndali ti Moab tongana kundi so atoto. Be ti mbi aso mingi ndali ti Kir-Heres.

¹² A yeke baa azo ti Moab so awoko kue si ala yeke gue na ndo so a leke na nduzu ti voro anzapa ti ala daa; ala yeke gue na ndo so a zia ni nde ndali ti nzapa ti ala titene ala sambela, me kue gbaa.

¹³ Baa tënë so *KOTA GBIA atene ando giriri na ndö ti Moab laa.

¹⁴ Fadeso, KOTA GBIA atene: “Na peko ti ngu ota, so ti tene mbeni lango oko ayeke ti na ndö ni pepe, akota zo ti Moab na gba ti azo ti kodro ni ayeke ngba zo pepe. Gi azo kete laa ayeke ngba ande, wungo ti ala ayeke kpa ye oko pepe.”