Ésaïe 14 - Mbeti ti Nzapa - Tënë so amu fini

Kiringo ti azo ti Israel na kodro ti ala

¹ Biani, fade *KOTA GBIA ayeke baa mawa ti Jacob; lo yeke kiri ti soro Israel. Lo yeke zia azo ti Israel ti duti na kodro ti ala wani. Awande ayeke bongbi oko na ala si ala kue ayeke ga azo ti Jacob.

² Amara nde ayeke ga ti mu azo ti Israel ti kiri na ala na kodro ti ala. Na sese so ayeke ti KOTA GBIA, azo ti Israel ayeke mu amara ni ti ga angbaa ti ala, akoli na awali. Azo so lani agbu azo ti Israel na kanga so, fade azo ti Israel ayeke gbu ala ti ga azo ti kanga; ala yeke sara komandema na ndö ti azo so asara lani ngangu na ala.

Lengo-gbia ti gbia ti Babilone ahunzi awe

³ Israel, na peko ti apasi so mo baa, na aye ti ngangu nde nde so asi na mo nga na ngangu kua ti ngbaa so lani a zia mo na gbe ni, mbeni lâ, *KOTA GBIA ayeke sara titene mo wu tere ti mo.

⁴ Fade mo yeke he bia so na iri ti gbia ti Babilone, mo tene: Ye ni tongana nyen! Zo ti sarango ngangu na azo ayeke fadeso na ndo wa? Ngangu so lo yeke sara na azo so ahunzi awe!

⁵ KOTA GBIA akungbi keke ti azo ti sioni awe, lo fâ ya ti keke ti azo ti komandema.

⁶ Zo so lani, na lege ti sioni ngonzo ti lo, lo yeke pika azo, lo yeke pika ala, lo wu tere ti lo pepe; lo so na lege ti ngonzo ti lo, lo yeke nika amara nde, lo yeke sara ngangu na ala, lo baa mawa ti ala pepe.

⁷ Fadeso, sese kue awu tere si aduti kpoo. Azo ayeke dekongo na ngia.

⁸ Ataa akeke ti sipre ayeke na ngia ndali ti tingo ti lo, akeke ti sedre ti Liban atene: “Ngbene ye so mo yeke na du ti kuâ so, zo ti dengo e na sese ayeke daa mbeni pepe!”

⁹ Na gbeni kâ, ndo ti akuâ ayingi ti yamba mo na gango ti mo. Ndali ti mo, lo yeke zingo akuâ, akota zo ti sese so; lo sara si agbia kue ti amara nde alondo na ndö ti mbata ti ala ti gbia.

¹⁰ Ala kue amu tënë si ala tene na mo: “Mo nga, mo yeke na ngangu pepe tongana e. Fadeso mo ga tongana e awe!”

¹¹ Na lege ti toto ti kundi ti mo, a bi nengo ti mo ti gbia na ndo ti akuâ. Gbogbo ti mo ayeke puru, angusu ayeke balangeti ti mo.

¹² Mo, tongoro ti ndaperere so mo yeke za zango so, asara tongana nyen laa mo londo na nduzu kâ, mo ti na sese? Mo so ando mo yeke kinda amara so, asara tongana nyen laa a bi mo na sese?

¹³ Mo yeke tene ando na be ti mo, mo tene: “Mbi yeke ma ngbii mbi si na yayu, mbi yeke zia mbata ti mbi ti gbia na ndö ti atongoro ti Nzapa. Mbi yeke duti na ndö ti hoto so anzapa ayeke wara tere daa, yongoro kâ na mbage ti Banga.

¹⁴ Mbi yeke ma na ndö ti ambinda, mbi yeke ga tongana Nzapa so ayeke na yayu kâ na ndö ti aye kue.”

¹⁵ Me a zu na mo na ndo ti akuâ, ngbii asi na gbe ti du kâ.

¹⁶ Azo so ayeke baa mo, le ti ala ayeke ngba gi ti baa mo kpoo. Ala yeke dabe ti ala na mo si ala tene: “Koli so ando ayeke yingi sese so, lo so ando lo yeke sara si akodro-gbia ado so, lo laa biani?

¹⁷ Lo so ando lo yeke sara si dunia aga benyama so, lo so ando lo yeke buba agbata si lo yeke ke ti zi azo ti kanga ti lo so, lo laa biani?”

¹⁸ Agbia kue ti amara nde, biani, ala kue kue kue, ala lango na nengo tere, zo oko oko na ya ti du ti kuâ ti lo.

¹⁹ Me ti mo, a bi mo na gigi yongoro na du ti kuâ ti mo tongana molenge so a du lo na kuâ ni si azo abaa lo tongana fungo ye. Mo yeke tongana kuâ so azo ado na gbe ti gere ti ala; mo yeke na popo ti azo so a fâ ala, azo so a kpo ala na yongoro zeme si a bi ala na ndö ti têne so ayeke na ngbonda ti du kâ.

²⁰ Me fade a yeke lu kuâ ti mo na popo ti ala pepe, ngbanga ti so mo buba kodro ti mo, mo fâ azo ti mo. Fade a yeke kiri ti di iri ti sioni mara ti mo oko pepe.

²¹ Ala leke tere ti ala ti fâ amolenge ndali ti sioni so ababâ ti ala asara. Alingbi ala kiri alondo ti mu sese pepe, alingbi ala kiri ti sara si agbata asi singo na ndö ti dunia so pepe.

²² So tënë ti yanga ti KOTA GBIA so ayeke na ndö ti dunia kue laa: “Fade mbi yeke londo na tere ti azo ti Babilone, mbi yeke zi iri ti Babilone, na tanga ti azo ti gbata ni so angba na fini, amolenge ti ala nga na *ahale ti ala. So tënë ti yanga ti KOTA GBIA laa.

²³ Fade mbi yeke sara titene Babilone aga ndo ti potopoto, ndo so abelu ayeke lango daa. Mbi yeke zi Babilone na balee so ayeke zi azende kue. So tënë ti yanga ti KOTA GBIA so ayeke na ndö ti dunia kue laa.”

KOTA GBIA ayeke buba ngangu ti azo ti Asirii

²⁴ *KOTA GBIA so ayeke na ndö ti dunia kue adeba yanga ti lo, atene: “Ye so mbi leke na be ti mbi ti sarango ni ayeke si; ye so mbi ye ti sara, mbi yeke sara ni.

²⁵ Fade mbi yeke buba ngangu ti azo ti Asirii taa na ya ti kodro ti mbi; mbi yeke do ala na gbe ti gere ti mbi na ndö ti ahoto ti mbi. Ala zia ando anengo kungba na ndö ti azo ti mbi tongana *zuge, fade mbi yeke zi ni. Ala zia ando nengo kungba na ndö ti go ti azo ti mbi, mbi yeke zi ni na ndö ti go ti ala.”

²⁶ Baa yanga so KOTA GBIA amu ndali ti sese kue laa! Baa ngangu so lo ye ti sara na amara kue laa.

²⁷ Tongana KOTA GBIA so ayeke na ndö ti dunia kue amu yanga, zo wa laa alingbi ti buba ya ni, zo wa? Tongana lo yoro maboko ti lo ti pika zo, zo wa laa alingbi ti gbanzi lo, zo wa?

Nengo tënë na ndö ti azo ti Filistii

²⁸ Na ngu so gbia Ahaz akui na ni, nengo tënë so asigigi, atene:

²⁹ Ala azo ti Filistii kue, keke so lani ayeke pika ala, ya ni afâ awe; me alingbi tere ti ala anzere ndali ni pepe. Biani, fade mbeni sioni ngbo ayeke sigigi na ya ti ngbo so akui awe; na ya ti para ti sioni ngbo ni, mbeni sioni nyama so akpa ngunde si ayeke huru hurungo na le ti nduzu ayeke sigigi.

³⁰ Fade awayere ayeke te ye nzoni, azo ti mawa ayeke wu tere nzoni, mbeni ye ti sarango ala ayeke daa pepe. Me ti ala azo ti Filistii, fade mbi yeke sara titene *ahale ti ala akui nzara si tanga ti azo ti ala so angba na fini, a yeke fâ ala.

³¹ Ala ayanga ti gbata, ala dema tere ti ala ma! Ala agbata, ala dekongo ma! Sese ti Filistii kue awoko kue awe: mbeni ngbongboro guru ti wâ alondo na Banga si ayeke ga. Na mbage ti awato, ala kue abongbi tere ti ala, zo oko angba na peko pepe.

³² Azo so azo ti Filistii atokua ala so, tënë ti nyen laa a yeke kiri na ni na ala? Tënë ni ayeke so: *KOTA GBIA wani laa alu gere ti *Sion. Na ndo so laa asenge zo ti lo ayeke duti daa, mbeni ye ti sioni ti sara ala ayeke daa pepe.