Ésaïe 11 - Mbeti ti Nzapa - Tënë so amu fini

David ti fini ni

¹ Fade mbeni kete keke ayeke sigigi na tere ti nduru keke ti Yese; kete keke ayeke sigigi na gere ni.

² Fade yingo ti *KOTA GBIA ayeke duti na ndö ti lo: yingo ti ndara na ti hingango popo ti nzoni na sioni, yingo ti mungo wango na ti ngangu, yingo ti hingango ndo na ti kpengo mbeto ti KOTA GBIA.

³ Yingo ni ayeke zia na be ti lo ti duti na kpengo mbeto ti KOTA GBIA. Lo yeke fâ ngbanga na lege ti ye so zo ayeke baa bango pepe, lo yeke leke tënë na lege ti ye so zo ama mango pepe.

⁴ Me azo so ye atia ala, lo yeke fâ ngbanga ti ala mbirimbiri; awayere so ayeke na ya ti kodro, lo yeke leke tënë ti ala na legeni. Tënë ti yanga ti lo ayeke pika kodro ni tongana keke so ayeke pika ye, pupu ti yanga ti lo ayeke fâ azo ti sioni.

⁵ Fade sarango ye ti mbirimbiri ayeke duti tongana kamba ti ndö ti bongo ti lo, sarango ye lakue na legeni ayeke duti tongana kamba so lo kanga na ngbonda ti lo.

⁶ Tongaso, fade mbo ti ngonda na molenge ti taba ayeke duti na ndo oko, ze na molenge ti ngasa ayeke lango na ndo oko. Molenge ti bagara na ti bamara ayeke te ye na ndo oko; molenge-koli laa ayeke fa lege na ala.

⁷ Mama ti bagara na *urse ayeke te ye na ndo oko, amolenge ti ala ayeke lango na ndo oko. Bamara ayeke te pere tongana bagara.

⁸ Molenge so angba ti nyon me ayeke sara ngia na yanga ti du ti ngbo; kete molenge ayeke yoro maboko ti lo na ya ti du ti longo.

⁹ Na ndö ti hoto so kue ayeke nde si ayeke nzoni kue, fade sioni ye na buba ye ayeke duti daa pepe, ngbanga ti so hingango KOTA GBIA ayeke si singo na ya ti kodro ni tongana ti so ngu asi singo na ya ti kota ngu-ingo.

¹⁰ Na lango ni so, lo so ayeke molenge ti Yese ayeke ga bendere ndali ti azo ti sese. Amara nde ayeke gi lo; ndo so lo yeke duti daa, gonda ti Nzapa ayeke mu ni kue.

Kiringo ti azo ti Israel na kodro ti ala

¹¹ Na lango ni so, *KOTA GBIA ayeke yoro maboko ti lo ti fani use ti zi tanga ti azo ti lo ti kiri na ala na kodro ti ala: azo ti lo so angba na fini na sese ti Asirii, ti Ezipte, ti Patros, ti Kush, ti Elam, ti Shinear nga na ti Hamat na ala so ayeke na ya ti azoa so ayeke na le ti kota ngu-ingo.

¹² Fade lo yeke yo bendere na nduzu ndali ti azo ti amara nde, lo yeke bongbi azo ti Israel so a gbu ala a gue na ala na kodro wande, lo yeke bongbi na ndo oko azo ti Juda so akangbi na ndangoro osio ti sese kue.

¹³ Kota be ti Efraim na tere ti Juda ayeke hunzi, a yeke fâ awato ti Juda kue; Efraim ayeke kiri ti sara kota be na tere ti Juda pepe; Juda ayeke kiri ti duti awato ti Efraim pepe.

¹⁴ Na mbage ti Do, ala yeke ti na ndö ti azo ti Filistii; na mbage ti To, ala kue ayeke nzi ye ti amara so ayeke na benyama: azo ti mara ti Edom na ti Moab ayeke ti na gbe ti ala, azo ti mara ti Amon ayeke ga angbaa ti ala.

¹⁵ KOTA GBIA ayeke sara si kota ngu-ingo ti Ezipte ahole. Lo yeke yoro maboko ti lo na ndö ti *bale ti Efrate; lo yeke wu kota pupu si ya ti bale ni akangbi maboko ni mbarambara, zo alingbi ti hon daa na gere senge.

¹⁶ Mbeni lege ayeke duti daa ndali ti tanga ti azo ti lo, azo ti lo so angba na fini na sese ti Asirii. Lege ni ayeke duti tongana lege so azo ti Israel amu ni ando na ngoi so ala londo na Ezipte ti sigigi.