Awayango-sandaga 3 - Mbeti ti Nzapa - Tënë so amu fini

Sandaga ti beoko

¹ “Tongana mbeni zo aye ti mu bagara na *sandaga ti beoko, alingbi lo mu koli-bagara wala mama ti bagara so mbeni mbage ti tere ti lo abuba pepe si lo ga na ni na dawa ti KOTA GBIA.

² Zo ni ayeke zia maboko ti lo na li ti nyama ni si lo yeke fâ go ti lo na yanga ti da ti bongo so KOTA GBIA na azo ti lo ayeke wara tere daa. Awayango-sandaga, amolenge ti Aaron ayeke fi mene ni na tere ti gbalaka, angoro ni kue.

³ Lege so lo yeke mu sandaga ti beoko ni ayeke so: lo yeke zi mafuta so kue ayeke na tere ti akamba ti ya ti nyama ni, lo gbi ni kue na wâ ndali ti KOTA GBIA;

⁴ aronyon use na mafuta so ayeke na tere ti aronyon ni, na mafuta so ayeke na tere ti ngbonda ti nyama ni nga na mafuta so ayeke na tere ti be ni na aye so ayeke na tere ni; lo zi ni na aronyon ni.

⁵ Na pekoni, amolenge ti Aaron ayeke zö aye ni kue na ndö ti gbalaka legeoko na sandaga so a yeke gbi ni kue na wâ, asandaga so a zia na ndö ti akeke ti wâ. So ayeke sandaga so a gbi ni kue na wâ titene fion ni anzere na KOTA GBIA.

⁶ “Tongana zo ni aye ti mu taba wala ngasa na sandaga ti beoko na KOTA GBIA, alingbi lo mu koli ni wala mama ni so mbeni mbage ti tere ti lo abuba pepe.

⁷ Tongana nyama ni ayeke taba, zo ni ayeke gue na lo na dawa ti KOTA GBIA.

⁸ Zo ni ayeke zia maboko ti lo na li ti taba ni si lo yeke fâ go ti lo na yanga ti da ti bongo so KOTA GBIA na azo ti lo ayeke wara tere daa. Tongaso, amolenge ti Aaron ayeke fi mene ni na tere ti gbalaka, angoro ni kue.

⁹ Lege so lo yeke mu sandaga ti beoko ti akasa so mafuta ayeke daa mingi ayeke so: damba ni kue so lo yeke zi ni na tere ti abio ti peko ti nyama ni, na mafuta so ayeke na tere ti akamba ti ya ti nyama ni; lo yeke gbi ni kue na wâ ndali ti KOTA GBIA;

¹⁰ aronyon use na mafuta so ayeke na tere ti aronyon ni, na mafuta so ayeke na tere ti ngbonda ti nyama ni nga na mafuta so ayeke na tere ti be ni na aye so ayeke na tere ni; lo yeke zi ni na aronyon ni.

¹¹ Na pekoni, wayango-sandaga ayeke zö aye ni kue na ndö ti gbalaka. So ayeke kobe ti sandaga so a gbi ni kue na wâ ndali ti KOTA GBIA.

¹² “Tongana nyama ni ayeke ngasa, zo ni ayeke gue na lo na dawa ti KOTA GBIA.

¹³ Zo ni ayeke zia maboko ti lo na li ti ngasa ni si lo yeke fâ go ti lo na yanga ti da ti bongo so KOTA GBIA na azo ti lo ayeke wara tere daa. Tongaso, amolenge ti Aaron ayeke fi mene ni na tere ti gbalaka, angoro ni kue.

¹⁴ Lege so lo yeke mu sandaga ti beoko ti akasa so mafuta ayeke daa mingi ayeke so: mafuta so ayeke na tere ti akamba ti ya ti nyama ni, lo yeke gbi ni kue na wâ ndali ti KOTA GBIA;

¹⁵ aronyon use na mafuta so ayeke na tere ti aronyon ni, na mafuta so ayeke na tere ti ngbonda ti nyama ni nga na mafuta so ayeke na tere ti be ni na aye so ayeke na tere ni; lo yeke zi ni na aronyon ni.

¹⁶ Na pekoni, wayango-sandaga ayeke zö aye ni kue na ndö ti gbalaka. So ayeke kobe ti sandaga so a gbi ni kue na wâ titene fion ni anzere na KOTA GBIA. “Mafuta kue ti anyama ayeke ti KOTA GBIA.

¹⁷ So ayeke mbeni ndia so ayeke ngba ngu na ngu ndali ti *ahale ti ala ti angoi kue. Ndani laa, na ndo so kue ala yeke duti daa, kasa ti mafuta, wala mene, fade ala yeke te ni oko pepe.”