Awayango-sandaga 19 - Mbeti ti Nzapa - Tënë so amu fini

Lege so Nzapa aye titene azo asara na lo

¹ KOTA GBIA atene na Moïse:

² Mo tene na bongbi ti azo ti Israel kue, mo tene: “Ayeke nzoni ala duti nde si ala duti nzoni kue, ngbanga ti so mbi KOTA GBIA Nzapa ti ala, mbi yeke nde si mbi yeke nzoni kue.

³ “Alingbi zo oko oko akpe mbeto ti babâ ti lo na mama ti lo. Alingbi zo oko oko abata *lango ti wungo tere. Mbi laa mbi yeke KOTA GBIA, Nzapa ti ala.

⁴ “Ala mu peko ti ayanda pepe. Ala kporo wen ti sara na asenge nzapa ndali ti ala wani pepe. Mbi laa mbi yeke KOTA GBIA, Nzapa ti ala.

⁵ “Tongana ala yeke mu na mbi *sandaga ti beoko, ayeke nzoni ala sara ni na lege ti ndia ni si fade mbi yeda na ala.

⁶ Nyama so ala mu na sandaga so, ala lingbi ti te ni gi na lango so ala mu na sandaga ni, wala lango oko na pekoni. Me tongana tanga ni asi na lango ota ni, alingbi a gbi ni.

⁷ Tongana mbeni zo ate nyama ni na lango ota ni, nyama ni aga sioni awe; mbi yeke yeda pepe.

⁸ Zo so ate nyama ni, andaa lo sara si ye so a zia nde ndali ti mbi aga sioni; ngbanga ni ayeke ti na li ti lo. A yeke tumba lo na ya ti bongbi ti azo ti Israel.

⁹ “Tongana ala yeke fâ ale ti kobe ti yaka ti ala, alingbi ala fâ ale ti kobe so ayeke na yanga ti yaka ni pepe. Fade ala yeke kiri ti fâ ale ti kobe so angba so pepe.

¹⁰ Ala yeke kiri na ya ti yaka ti *vinye ti ala pepe ti fâ ale ti vinye so angba wala so atuku na sese. Ala yeke zia ni na awayere nga na awande. Mbi laa mbi yeke KOTA GBIA, Nzapa ti ala.

¹¹ “Alingbi ala nzi pepe, ala tene mvene pepe, ala handa amba ti ala pepe.

¹² Ala mu iri ti mbi ti deba na ni na lege ti mvene pepe. Tongana ala sara tongaso, andaa ala buba iri ti mbi, Nzapa ti ala. Mbi laa mbi yeke KOTA GBIA.

¹³ “Alingbi ala sara sioni na amba ti ala pepe, ala nzi ala pepe. Zo so asara kua na ala, ala gbanzi futa ti lo ngbii asi kekereke pepe.

¹⁴ Zo so mê ti lo akanga, alingbi ala zonga lo pepe; zo so le ti lo abuba, alingbi ala zia na lege ti lo pepe mbeni ye so lo lingbi ti pika gere ti lo daa ti ti. Tongaso laa ala yeke fa atene, ala yeke kpe mbeto ti mbi Nzapa ti ala. Mbi laa mbi yeke KOTA GBIA.

¹⁵ “Na le ti ngbanga, ala fâ ngbanga na legeni: ala mu mbage ti zo ti mawa pepe, ala mu nga mbage ti kota zo pepe; me ala fâ ngbanga ti amba ti ala mbirimbiri.

¹⁶ Ala du mvene na li ti azo ti kodro ti ala pepe. Ala bi tënë na li ti mba ti ala titene a fâ ngbanga ti kuâ na li ti lo pepe. Mbi laa mbi yeke KOTA GBIA.

¹⁷ “Be ti ala ake ita ti ala pepe, me ala suku na zo ti kodro ti ala, tongaso si sioni ti lo ati na li ti ala pepe.

¹⁸ Ala kiri peko ti sioni na azo pepe; zo ti mara ti ala so asara sioni na ala, ala bata ngonzo na be ti ala na tere ti lo pepe. Alingbi zo oko oko aye mba ti lo tongana ti so lo ye tere ti lo wani. Mbi laa mbi yeke KOTA GBIA.

¹⁹ “Alingbi ala bata andia ti mbi so: Ala zia mara ti anyama ti ala use nde nde abongbi koli na wali pepe. Alingbi ala lu mara ti ale ti kobe use nde nde na yaka ti ala pepe. Abongo so a sara na mara ti akamba use nde nde, ala yu ni pepe.

²⁰ “Tongana mbeni koli aduti koli na wali na mbeni ngbaa-wali so mbeni koli nde aye ti mu lo ti ga wali ti lo, tongana a de ti futa mbeni ye ndali ti wali ni pepe, wala a de ti zi wali ni na gbe ti ngbaa pepe, fade koli ni ayeke futa mbeni lamande. Me a yeke fâ koli ni na wali ni pepe, ngbanga ti so wali ni ade na gbe ti ngbaa.

²¹ Alingbi koli ni aga na mbeni koli-taba na yanga ti da ti bongo so KOTA GBIA na azo ti lo ayeke wara tere daa; lo yeke mu lo na sandaga na KOTA GBIA ti lekengo tënë.

²² Wayango-sandaga ayeke ya koli-taba ni na dawa ti mbi, KOTA GBIA titene mbi zi siokpari na li ti koli ni ndali ti siokpari so lo sara; tongaso a zi siokpari ni na li ti lo awe.

²³ “Tongana ala si ande na ya ti kodro ni si ala lu akeke nde nde so a yeke te le ni, na ya ti ngu ota, fade ala yeke baa le ti akeke ni tongana ye so a gbanzi na ala awe; ala yeke te ni pepe.

²⁴ Na osio ngu ni, fade a yeke zia le ti akeke ni kue nde ndali ti mbi KOTA GBIA, na ndembe ti mbeni matanga ti sepelango mbi.

²⁵ Na oku ngu ni, fade ala lingbi ti te le ti akeke ni senge. Tongana ala sara tongaso, fade ale ti kobe ti ala ayeke gue guengo na nduzu. Mbi laa mbi yeke KOTA GBIA, Nzapa ti ala.

²⁶ “Kasa so mene angba na ya ni, alingbi ala te ni pepe; ala sara mazi pepe, wala ala baa nda ti ye pepe.

²⁷ Ala fâ yanga ti kua ti li ti ala angoro ngorongo na ni pepe, ala fâ tere ti kua ti yanga ti ala pepe.

²⁸ Tongana mbeni zo akui, ala suru tere ti ala na ka pepe, ala kpo nga anzoroko na tere ti ala pepe. Mbi laa mbi yeke KOTA GBIA.

²⁹ “Ala sara si amolenge ti ala ti wali aga sioni pepe na lege ti sarango aye ti ndumba ndali ti anzapa nde; tongaso pepe, fade azo ti kodro ni ayeke sara aye ti ndumba si aye ti sioni mingi ayeke si singo na ya ti kodro ni.

³⁰ Alingbi ala bata lango ti wungo tere, ala ne ndo so a zia nde ndali ti mbi. Mbi laa mbi yeke KOTA GBIA.

³¹ “Ala gi lege ti hunda yingo ti akuâ pepe wala ti atoro pepe. Tongana ala gue kâ, fade ala yeke ga *sioni. Mbi laa mbi yeke KOTA GBIA, Nzapa ti ala.

³² “Alingbi ala londo na nduzu na dawa ti mbeni zo so kua ti li ti lo avuru. Alingbi ala ne mbakoro; tongaso laa ala yeke fa atene, ala yeke kpe mbeto ti mbi Nzapa ti ala laa. Mbi laa mbi yeke KOTA GBIA.

³³ “Tongana mbeni wande aga aduti na ndo ti ala, na ya ti kodro ti ala, alingbi ala sara sioni na lo pepe.

³⁴ Me fade ala yeke sara na lo tongana taa zo ti kodro ti ala: alingbi ala ye lo tongana ti so ala ye tere ti ala wani. Biani, ala wani, ala yeke ando awande na kodro ti Ezipte. Mbi laa mbi yeke KOTA GBIA, Nzapa ti ala.

³⁵ “Ye so a yeke haka ye na ni: kamba, kilo wala litere, ala nzi zo na ni pepe.

³⁶ Alingbi ala mu kilo so ayeke na legeni, sembe ni nga na aye ti hakango na ye so ayeke na legeni ti haka na ye na azo. Mbi laa mbi yeke KOTA GBIA, Nzapa ti ala so mbi mu ala na kodro ti Ezipte, mbi sigigi na ala.

³⁷ “Alingbi ala bata andia ti mbi kue, ala sara ye alingbi na atënë ti ndia ti mbi. Mbi laa mbi yeke KOTA GBIA.”