Awayango-sandaga 18 - Mbeti ti Nzapa - Tënë so amu fini

Ndia ti batango tere koli na wali

¹ KOTA GBIA atene na Moïse:

² Mo tene na azo ti Israel, mo tene: “Mbi laa mbi yeke KOTA GBIA, Nzapa ti ala!

³ Ye so azo asara na sese ti Ezipte, ala sara ni pepe; ala lango ando kâ. Ye so azo asara na sese ti Kanaan, ndo so mbi yeke sara titene ala gue daa so, ala sara ni pepe. Ala sara ye alingbi na andia ti azo ni pepe.

⁴ Ala sara ye alingbi na atënë ti ndia ti mbi, ala zia be ti ala ti bata andia ti mbi. Biani, mbi laa mbi yeke KOTA GBIA, Nzapa ti ala.

⁵ “Ala bata andia ti mbi na atënë ti ndia ti mbi; zo so asara ye alingbi na ni, fade lo yeke duti na fini ndali ni. Mbi laa mbi yeke KOTA GBIA.

⁶ “Alingbi mbeni zo oko na popo ti ala alango na mbeni wali ti ya ti sewa ti lo pepe. Mbi laa mbi yeke KOTA GBIA.

⁷ “Alingbi mo zia kamene na le ti babâ ti mo pepe ti lango na mama ti mo pepe. So mama ti mo laa, alingbi mo zia kamene na le ti lo pepe.

⁸ “Alingbi mo lango na wali ti babâ ti mo pepe; so ziango kamene na le ti babâ ti mo laa.

⁹ “Alingbi mo lango na ita ti mo ti wali pepe, ataa babâ ti mo laa adu lo, wala mama ti mo laa adu lo, ataa a bata lo na ya ti sewa ti mo, wala na ya ti mbeni sewa nde.

¹⁰ “Alingbi mo lango pepe na molenge-wali so molenge ti mo ti koli adu, wala molenge-wali so molenge ti mo ti wali adu; so ziango kamene na le ti mo wani laa.

¹¹ “Molenge-wali so mbeni wali ti babâ ti mo adu, alingbi mo lango na lo pepe. Molenge ti babâ ti mo laa; so ita ti mo ti wali laa.

¹² “Alingbi mo lango na omba ti mo pepe; lo na babâ ti mo ayeke mene oko.

¹³ “Alingbi mo lango na mama-kota wala mama-kete ti mo pepe; lo na mama ti mo ayeke mene oko.

¹⁴ “Alingbi mo zia kamene na le ti babâ-kota wala babâ-kete ti mo pepe ti lango na wali ti lo; so mama ti mo laa.

¹⁵ “Alingbi mo lango na wali ti molenge ti mo pepe; so kogara ti mo laa.

¹⁶ “Alingbi mo lango na wali ti ita ti mo pepe; so ziango kamene na le ti ita ti mo laa.

¹⁷ “Alingbi mo lango na mbeni wali pepe, ataa molenge ti wali ni, ataa molenge ti molenge ti wali ni. Biani, ala kue gi mene oko; so ayeke sarango ye ti kamene mingi.

¹⁸ “Tongana wali ti mo ade na fini, alingbi mo mu ita ti lo ti wali ti ga wali ti mo pepe. So fade ayeke sara si mbanda alondo.

¹⁹ “Na ndembe so mbeni wali abaa ya ti lo, alingbi mo lango na lo pepe; lo ga *sioni awe.

²⁰ “Alingbi mo lango pepe na wali ti mbeni mba ti mo so mo na lo ayeke na ya ti kodro oko. So fade ayeke sara si mo ga *sioni.

²¹ “Alingbi mo mu mbeni molenge ti mo oko pepe titene a gbi lo na wâ na *sandaga na nzapa Molek. So fade ayeke sara si iri ti mbi, Nzapa ti mo abuba: mbi laa mbi yeke KOTA GBIA.

²² “Alingbi mo lango na mbeni koli pepe tongana ti so koli ayeke lango na wali. So ayeke sioni ye mingi!

²³ “Alingbi mo na mbeni nyama abongbi pepe. Tongaso pepe, fade mo yeke ga *sioni. Alingbi mbeni wali na mbeni nyama abongbi nga pepe. So ayeke ye ti kirikiri mingi!

²⁴ “Alingbi ala ga *sioni pepe na lege ti sarango mara ti aye tongaso. Amara so mbi yeke tumba ala na dawa ti ala, azo ti Israel, asara mara ti aye so si ala ga *sioni.

²⁵ Sioni sarango ye ti azo ni asara si kodro ni aga *sioni. Nilaa mbi fâ ngbanga na ndö ti kodro ni si kodro ni atumba azo ti lo.

²⁶ “Ti ala, azo ti Israel, wala awande so aduti na popo ti ala, ala bata andia ti mbi nga na atënë ti ndia ti mbi. Ala sara sioni ye oko tongaso pepe.

²⁷ Azo so aduti ando na kodro ni kozo ti ala, asara asioni ye so kue; nilaa kodro ni aga *sioni.

²⁸ Ala sara si kodro ni akiri aga *sioni pepe. Tongaso pepe, kodro ni ayeke tumba ala tongana ti so lo tumba ando azo so aduti daa kozo ti ala.

²⁹ Biani, zo so kue asara mara ti sioni ye tongaso, fade a yeke tumba lo na popo ti azo ti Israel.

³⁰ “Ala bata atënë ti yanga ti mbi; ala sara mara ti asioni ye so azo asara ando kozo ti ala so pepe. Ala ga *sioni pepe na lege ti sarango mara ti aye tongaso. Mbi laa mbi yeke KOTA GBIA, Nzapa ti ala.”