Awayango-sandaga 13 - Mbeti ti Nzapa - Tënë so amu fini

Akobela ti poro ti tere ti zo

¹ KOTA GBIA atene na Moïse na Aaron:

² “Tongana mbeni ye asuku na ndö ti poro ti tere ti zo, wala mbeni dartere asigigi na tere ti lo wala mbeni ye asuku na tere ti lo, le ni ayeke za zango si akpa buruma, ayeke nzoni ala gue na zo ni na wayango-sandaga Aaron, wala na mbeni molenge ti lo so ayeke wayango-sandaga.

³ Wayango-sandaga ayeke baa ndo so kobela ni asigigi daa. Tongana kua ti tere ti zo ni aga vuru ni si na plase ni du akoro daa, so mbeni mara ti buruma laa. Na peko ti bango tere ti zo ni, wayango-sandaga ayeke fa atene, lo ga *sioni awe.

⁴ Ye so asuku na tere ti zo ni, tongana le ni ayeke za zango si avuru vurungo, me plase ni ayeke du du pepe si kua ti tere ti lo aga vuru ni pepe, wayango-sandaga ayeke zia zo ni na mbeni ndo nde ti duti gi lo oko na ya ti lango mbarambara.

⁵ Na lango mbarambara ni, wayango-sandaga ayeke kiri ti baa tere ti zo ni. Tongana wayango-sandaga abaa so ye so asigigi na tere ti zo ni angba gi tongaso, amu tere ti lo kue pepe, wayango-sandaga ni ayeke kiri ti zia lo na mbeni ndo nde ti duti gi lo oko na ya ti lango mbarambara.

⁶ Na lango mbarambara ni, wayango-sandaga ayeke kiri ti baa tere ti zo ni. Tongana wayango-sandaga abaa so ye so asigigi na tere ti zo ni avuko kete, amu tere ti lo kue pepe, fade wayango-sandaga ayeke fa atene, zo ni aga *nzoni awe; gi dartere laa asigigi na tere ti lo. Fade zo ni ayeke sukula bongo ti lo, na pekoni lo yeke ga *nzoni.

⁷ Me tongana dartere ni amu tere ti zo ni kue na peko ti so wayango-sandaga abaa fade tere ti lo si atene, lo ga *nzoni awe, fade zo ni ayeke kiri ti fani use ni na ndo ti wayango-sandaga.

⁸ Wayango-sandaga ayeke kiri ti baa tere ti zo ni. Tongana lo baa so dartere ni amu tere ti zo ni kue, wayango-sandaga ni ayeke fa atene, zo ni aga *sioni awe; so buruma laa.

⁹ “Tongana mbeni kobela so akpa buruma asigigi na tere ti zo, ayeke nzoni a gue na zo ni na ndo ti wayango-sandaga.

¹⁰ Wayango-sandaga ayeke baa tere ti lo. Tongana mbeni ye so avuru vurungo asuku na ndö ti poro ti tere ti lo, kua ti tere ti lo aga vuru ni si mbeni kasa ti tere ti lo asigigi,

¹¹ andaa buruma ti hunzingo ni pepe laa. Wayango-sandaga ayeke fa atene, zo ni aga *sioni awe. Wayango-sandaga abaa pasi senge senge ti zia lo na mbeni ndo nde ti duti gi lo pepe, ngbanga ti so buruma ni afa polele atene, lo ga *sioni awe.

¹² Me tongana wayango-sandaga abaa so buruma ni asigigi na tere ti zo ni kue, alondo na li ti lo asi na gere ti lo,

¹³ wayango-sandaga ayeke kiri ti baa zo ni mbirimbiri si. Tongana lo baa so buruma ni amu tere ti zo ni kue, fade lo yeke fa atene, kobela so ayeke sara titene zo ni aga *sioni pepe. Zo ni ayeke *nzoni, ngbanga ti so tere ti lo kue aga vuru ni.

¹⁴ Me na lango so a yeke baa atene, mbeni kasa ti tere ti zo ni asigigi, andaa lo ga *sioni awe.

¹⁵ Wayango-sandaga ayeke baa kasa ti tere ti zo ni so asigigi so; na pekoni, lo yeke fa atene, zo ni aga *sioni awe. Kasa ti tere ti zo so asigigi so aga *sioni awe; so buruma laa.

¹⁶ Tongana ndo so kasa ti tere ti zo ni asigigi daa akiri aga vuru ni, fade lo yeke gue na ndo ti wayango-sandaga;

¹⁷ wayango-sandaga ayeke baa tere ti lo. Tongana wayango-sandaga abaa so le ti ka ni akiri aga vuru ni, lo yeke fa atene, ka ni ayeke sara titene zo aga *sioni pepe: zo ni ayeke *nzoni awe.

¹⁸ “Mbeni ye alingbi ti suku na tere ti zo; na pekoni ye ni akai.

¹⁹ Me na ndo so ye ni asuku daa so, tongana mbeni ye so avuru vurungo akiri asigigi daa, wala le ni ayeke za zango, wala avuru si abe kete, fade zo ni ayeke gue titene wayango-sandaga abaa lo.

²⁰ Wayango-sandaga ni ayeke baa tere ti lo. Tongana sukungo ye ni akoro du na ya ti poro ti tere ti zo ni si kua ti tere ti lo aga vuru ni, wayango-sandaga ayeke fa atene, zo ni aga *sioni awe; so ayeke mbeni mara ti buruma so ato nda ti sigigi na ndo so ye ni asuku daa so.

²¹ Me tongana wayango-sandaga abaa tere ti zo ni si vuru kua ti tere ayeke na ndo ni so pepe, ye ni akoro du na ya ti poro ti tere ti lo pepe si poro ti tere ti lo avuru tuuu, wayango-sandaga ayeke zia lo na mbeni ndo nde ti duti gi lo oko na ya ti lango mbarambara.

²² Tongana sukungo ye ni amu tere ti zo ni kue, wayango-sandaga ayeke fa atene, zo ni aga *sioni awe; so mbeni mara ti buruma laa.

²³ Me tongana ye so asuku so angba gi tongaso, amu tere ti zo ni kue pepe, so ayeke gi senge plase ti sukungo ye laa. Wayango-sandaga ayeke fa atene, zo ni ayeke *nzoni.

²⁴ “Mbeni ye so alingbi ti si ayeke so: wâ azö mbeni zo si mbeni ye so le ni avuru vurungo si ayeke za zango, wala avuru si abe kete asigigi na plase ni.

²⁵ Wayango-sandaga ayeke baa tere ti zo ni. Tongana kua ti tere ti lo aga vuru ni na ndo so si mbeni du akoro na ya ti poro ti tere ti lo, andaa buruma laa ato nda ti sigigi na plase ti wâ ni so. Tongaso wayango-sandaga ayeke fa atene, zo ni aga *sioni awe.

²⁶ Me tongana wayango-sandaga abaa tere ti zo ni si vuru kua ti tere ayeke daa pepe si du akoro na ya ti poro ti tere ti lo pepe, le ti ye ni avuru tuuu pepe, wayango-sandaga ayeke zia zo ni na mbeni ndo nde ti duti gi lo oko na ya ti lango mbarambara.

²⁷ Na lango mbarambara ni, wayango-sandaga ayeke baa tere ti zo ni. Tongana ye ni amu tere ti lo kue, wayango-sandaga ayeke fa atene, lo ga *sioni awe; so mbeni mara ti buruma laa.

²⁸ Me tongana ye so le ni ayeke za zango so angba gi tongaso, amu tere ti zo ni kue pepe, le ni avuru tuuu, andaa gi senge sukungo ye laa si asigigi na plase ti ka ti wâ ni.

²⁹ “Mbeni koli wala mbeni wali alingbi ti duti na mbeni kobela ti poro ti tere na li ti lo wala na gbe ti ngbangba ti lo;

³⁰ wayango-sandaga ayeke baa kobela ni. Tongana du akoro na ya ti poro ti tere ti zo ni, kua ti tere ti lo abe kete si avuru kete, wayango-sandaga ayeke fa atene, zo ni aga *sioni awe: so palata, so ti tene buruma laa ayeke sigigi na li ti lo wala na gbe ti ngbangba ti lo so.

³¹ Me tongana wayango-sandaga abaa ndo so palata ni asigigi daa si lo baa so du akoro na ya ti poro ti tere ti zo ni pepe, ataa so vuko kua ti tere ayeke daa pepe, wayango-sandaga ayeke zia zo ni na mbeni ndo nde ti duti gi lo oko na ya ti lango mbarambara.

³² Na lango mbarambara ni, wayango-sandaga ayeke kiri ti baa ndo so kobela ni ayeke daa. Tongana palata ni amu tere ti zo ni kue pepe, kua ti tere ti lo angba tongana ti kozo si du akoro na ya ti poro ti tere ti lo pepe,

³³ zo ni ayeke kio kua ti li ti lo. Me ndo so palata ni ayeke daa, lo yeke kio ni pepe. Na pekoni, wayango-sandaga ayeke kiri ti zia lo na mbeni ndo nde ti duti gi lo oko na ya ti lango mbarambara.

³⁴ Na lango mbarambara ni, wayango-sandaga ayeke baa palata ni. Tongana palata ni amu tere ti zo ni kue pepe si du akoro na ya ti poro ti tere ti lo pepe, wayango-sandaga ayeke fa atene, zo ni ayeke *nzoni. Alingbi lo sukula gi abongo ti lo titene lo ga *nzoni.

³⁵ Me na peko ti so wayango-sandaga afa atene, zo ni ayeke *nzoni si palata ni akiri amu tere ti lo kue,

³⁶ wayango-sandaga ayeke kiri ti baa tere ti lo. Tongana palata ni amu tere ti zo ni kue biani, wayango-sandaga alingbi ti gi ti hinga pepe wala kua ti tere ti zo ni ayeke tongana ti kozo; zo ni ayeke *sioni awe, awe.

³⁷ Me tongana palata ni angba gi tongaso, tongana vuko kua ti tere asigigi daa, andaa palata ni akai awe; zo ni aga *nzoni awe. Wayango-sandaga ayeke fa atene, lo ga *nzoni awe.

³⁸ “Ambeni ye vuru vuru si ayeke za zango alingbi ti sigigi na ndö ti poro ti tere ti mbeni koli wala ti mbeni wali;

³⁹ wayango-sandaga ayeke baa tere ti zo ni. Tongana aye so asigigi na tere ti zo ni avuru tuuu, andaa gi asenge ye laa asigigi so; zo ni ayeke *nzoni.

⁴⁰ “Tongana kua ti li ti mbeni koli atuku kue, lo ga li-mbombo awe; lo yeke *nzoni.

⁴¹ Tongana kua ti li ti lo ti dawa atuku kue, lo ga li-mbombo na dawa ti li ti lo; zo ni ayeke *nzoni.

⁴² Me tongana mbeni ye vuru vuru si abe kete asigigi na plase ti li-mbombo ni, ataa na mbage ti peko wala na mbage ti dawa, andaa buruma laa ato nda ti sigigi so.

⁴³ Wayango-sandaga ayeke baa zo ni. Tongana mbeni ye vuru vuru si abe kete asigigi na plase ti li-mbombo ni, ye ni akpa buruma,

⁴⁴ andaa zo ni ayeke zo ti buruma; lo yeke *sioni. Wayango-sandaga ayeke fa atene, lo ga *sioni awe; buruma laa asigigi na li ti lo so.

⁴⁵ “Zo so ayeke na kobela ti buruma ayeke yu asurungo bongo, lo yeke sua ya ti li ti lo pepe, lo yeke mu bongo, lo kanga na kua ti yanga ti lo si lo yeke dekongo, atene: ‘Mbi ga *sioni awe! Mbi ga *sioni awe!’

⁴⁶ Na ngoi so kue lo yeke na kobela ni, lo yeke ngba *sioni. Ndani laa, fade lo yeke lango yamba na azo, lo yeke sara da ti lo yongoro na tere ti bâbâ.”

Asioni gugu so ayeke na tere ti bongo

⁴⁷ “Ambeni sioni gugu alingbi ti sigigi na tere ti bongo: bongo so a sara na kua ti tere ti taba wala bongo so a sara na *len,

⁴⁸ wala mapia-bongo, wala bongo so a sara na kua ti tere ti taba wala na len so a kpo ni kpongo, wala bongo so a sara na poro ti nyama, wala mbeni ye so a sara na poro ti nyama.

⁴⁹ Tongana mbeni nzoroko ti ngu-ngunza si abe kete asigigi na tere ti aye ni so, andaa asioni gugu laa. Fade a yeke gue na ni na wayango-sandaga titene lo baa ni.

⁵⁰ Wayango-sandaga ayeke baa nzoroko ni so. Na pekoni, lo yeke zia aye ni na mbeni ndo nde na ya ti lango mbarambara.

⁵¹ Na lango mbarambara ni, wayango-sandaga ayeke kiri ti baa nzoroko ni. Tongana nzoroko ni amu tere ti bongo ni, wala tere ti poro ti nyama ni, andaa sioni gugu laa agbu tere ti aye ni biani biani. Ye ni aga *sioni awe.

⁵² Tongaso wayango-sandaga ayeke gbi bongo ni, mapia-bongo ni nga na bongo so a sara na kua ti tere ti taba wala na len si a kpo ni kpongo so, wala ye so kue a sara na poro ti nyama. A yeke gbi aye ni, ngbanga ti so asioni gugu so asigigi daa so ayeke gbu tere ti ye biani biani.

⁵³ Me tongana wayango-sandaga abaa so nzoroko ni amu tere ti bongo ni nga na tere ti ye so kue a sara na poro ti nyama,

⁵⁴ wayango-sandaga ayeke mu yanga titene a sukula aye ni. Na pekoni, lo yeke kiri ti zia ni na mbeni ndo nde na ya ti lango mbarambara.

⁵⁵ Na peko ti sukulango bongo ni, wayango-sandaga ayeke kiri ti baa tere ni. Tongana nzoroko ni angba gi tongaso, ataa amu tere ti bongo ni kue pepe, ye ni aga *sioni awe. Ataa sioni gugu ni ate ye ni na mbage ti gigi wala na mbage ti ya ni, a yeke gbi ni gbingo.

⁵⁶ Me na peko ti sukulango bongo ni, tongana wayango-sandaga akiri abaa tere ni si nzoroko ni avuko kete, lo yeke fâ nzoroko ni na tere ti bongo ni, poro ti nyama ni, mapia-bongo ni wala na tere ti bongo so a kpo ni kpongo.

⁵⁷ Me mbeni lâ, tongana nzoroko ni akiri asigigi na tere ti bongo ni, mapia-bongo ni, bongo so a kpo ni kpongo, wala na tere ti ye so kue a sara na poro ti nyama, andaa sioni gugu laa ato nda ti sigigi so. Tongaso, a yeke gbi ye so nzoroko ni ayeke na tere ni so.

⁵⁸ “Na peko ti sukulango bongo, mapia-bongo, bongo so a kpo ni kpongo nga na ye so kue a sara na poro ti nyama, tongana nzoroko so asigigi na tere ni ahon biani biani, fade a yeke kiri ti sukula aye ni ti fani use ni titene aga *nzoni.”

⁵⁹ So ayeke ndia ndali ti bongo so a sara na kua ti tere ti taba wala na len, mapia-bongo wala bongo so a kpo ni kpongo, wala ye so kue a sara na poro ti nyama. Ndia so amu lege na azo ti hinga ye so ayeke *nzoni wala ye so ayeke *sioni.