Awayango-sandaga 1 - Mbeti ti Nzapa - Tënë so amu fini

LEGE TI MUNGO ASANDAGA 1–7 Sandaga so a yeke gbi ni kue na wâ

¹ KOTA GBIA airi Moïse; kâ na ya ti da ti bongo so lo na azo ti lo ayeke wara tere daa, lo mu yanga na lo

² ti tene na azo ti Israel: “Tongana mbeni zo na popo ti ala aye ti mu na KOTA GBIA *sandaga ti nyama, lo lingbi ti mu bagara, taba wala ngasa.

³ “Tongana zo ni aye ti mu bagara na sandaga so a yeke gbi ni kue na wâ, alingbi lo mu koli-bagara so mbeni mbage ti tere ti lo abuba pepe. Zo ni ayeke gue na nyama ni na yanga ti da ti bongo so KOTA GBIA na azo ti lo ayeke wara tere daa, tongaso si KOTA GBIA ayamba lo nzoni.

⁴ Zo ni ayeke zia maboko ti lo na li ti nyama ni. Tongaso KOTA GBIA ayeke yeda na sandaga ti zo ni si lo yeke zi siokpari na li ti lo.

⁵ Zo ni ayeke fâ go ti nyama ni na dawa ti KOTA GBIA. Awayango-sandaga, amolenge ti Aaron, ayeke ya mene ni na KOTA GBIA. Na pekoni, ala yeke fi mene ni na tere ti gbalaka so ayeke na yanga ti da ti bongo so KOTA GBIA na azo ti lo ayeke wara tere daa; ala yeke fi ni angoro gbalaka ni kue.

⁶ Zo ni ayeke zi poro ti nyama ni si lo yeke doroko nyama ni.

⁷ Awayango-sandaga, amolenge ti Aaron ayeke sara wâ na ndö ti gbalaka ni si ala yeke leke akeke ti wâ daa.

⁸ Ala yeke mu li ti nyama ni, akasa ni nga na mafuta ni, ala yeke zia na ndö ti akeke ti wâ so ayeke na ndö ti gbalaka ni.

⁹ Zo ni ayeke sukula akamba ti ya ti nyama ni na agere ti nyama ni. Na pekoni, wayango-sandaga ayeke zö aye ni kue na ndö ti gbalaka. So ayeke sandaga so a gbi ni kue na wâ titene fion ni anzere na KOTA GBIA.

¹⁰ “Tongana zo ni aye ti mu taba wala ngasa na sandaga so a yeke gbi ni kue na wâ, alingbi lo soro na popo ti ataba wala angasa mbeni koli-taba, wala koli-ngasa so mbeni mbage ti tere ti lo abuba pepe.

¹¹ Zo ni ayeke fâ go ti nyama ni na dawa ti KOTA GBIA, na mbage ti Banga ti gbalaka ni. Tongaso awayango-sandaga, amolenge ti Aaron ayeke fi mene ni na tere ti gbalaka, angoro ni kue.

¹² Zo ni ayeke doroko nyama ni, lo yeke zi li ni nga na mafuta ni, lo zia nde. Wayango-sandaga ayeke zia akasa ni kue na ndö ti akeke so ayeke na le ti wâ na ndö ti gbalaka.

¹³ Zo ni ayeke sukula ya ti nyama ni na agere ni. Na pekoni, wayango-sandaga ayeke ya ni na KOTA GBIA si lo yeke gbi ni kue na ndö ti gbalaka. So ayeke sandaga so a gbi ni kue na wâ titene fion ni anzere na KOTA GBIA.

¹⁴ “Tongana zo ni aye ti mu na KOTA GBIA sandaga ti ndeke so a yeke gbi ni kue na wâ, alingbi lo mu *kolokoto wala mbipa.

¹⁵ Wayango-sandaga ayeke ga na ndeke ni na dawa ti gbalaka; lo yeke zi li ti ndeke ni si lo yeke zö ni na ndö ti gbalaka. Na pekoni, lo yeke yuru mene ni na tere ti gbalaka ni.

¹⁶ Zo ni ayeke zi bozo ti gbe ti go ti ndeke ni na aye so kue ayeke na ya ni, lo yeke bi ni na tere ti gbalaka ni, na mbage ti To, na ndo so a yeke tuku mburu ti wâ ti mafuta daa.

¹⁷ Zo ni ayeke suru ya ti ndeke ni use, na popo ti akpangi ti lo, me lo yeke zi akpangi ni pepe. Na pekoni, wayango-sandaga ayeke zö ndeke ni kue na wâ so ayeke na ndö ti gbalaka ni. So ayeke sandaga so a gbi ni kue na wâ titene fion ni anzere na KOTA GBIA.”