Awatokua 8 - Mbeti ti Nzapa - Tënë so amu fini

¹ Saul ayeda na tënë ti fango Étienne. Na lango ni so, azo ato nda ti sara ngangu mingi na azo ti *Eglize so ayeke na Jérusalem. Azo ti Jésus kue akangbi na ndö ti sese ti Judée na ti Samarii, gi *awatokua laa angba na Jérusalem.

Saul asara ngangu na azo ti Eglize

² Ambeni zo so aye tënë ti Nzapa mingi alu Étienne si ala toto kuâ ti lo ngangu.

³ Andaa Saul angba ti lo lakue ti buba *Eglize. Lo yeke li na ya ti ada ti gbu akoli na awali si lo yeke bi ala na da ti kanga.

Philippe afa Nzoni Tënë na Samarii

⁴ Azo ti Jésus so akangbi kirikiri ague na ando nde nde si ala yeke fa Nzoni Tënë.

⁵ Philippe ague na ya ti mbeni gbata ti Samarii si lo fa tënë ti Christ kâ.

⁶ Gba ti azo ti gbata ni ama tënë ti aye ti kpene so Philippe asara, ala baa ni si ala zi mê ti ala mbirimbiri ti ma tënë so lo yeke tene.

⁷ Biani, asioni yingo asigigi na ya ti azo mingi na dekongo na yanga ti ala. Azo mingi so mbeni mbage ti tere ti ala abuba na ala so gere ti ala abuba, tere ti ala aga nzoni.

⁸ Be ti azo ti gbata ni kue ayeke na kota ngia.

⁹ Andaa mbeni koli so iri ti lo Simon ayeke na ya ti gbata ni kozoni. Lo yeke zo ti sarango mazi, lo sara aye ti kpene mingi na le ti azo ti Samarii; lo baa tere ti lo tongana mbeni kota zo.

¹⁰ Azo kue azi mê ti ala ti ma lo, alondo na akete zo ngbii asi na akota zo. A tene: “Koli so ayeke na ngangu ti Nzapa so a iri ni ‘Kota Ngangu’.”

¹¹ Ala yeke ma gi tënë ti lo, ndali ti so aninga mingi so lo yeke sara aye ti dongo be na lege ti mazi ti lo ni.

¹² Me na peko ti so ala ma na be na Nzoni Tënë ti *Kodro-gbia ti Nzapa so Philippe afa na ala na iri ti Jésus Christ, akoli na awali awara bateme.

¹³ Simon nga ama na be si lo wara bateme; lo ngba lakue na tere ti Philippe. Lo nga, be ti lo ado na bango aye ti kpene na aye ti dongo be so Philippe ayeke sara so.

¹⁴ So *Awatokua so ayeke na Jérusalem ama a tene, azo ti Samarii ayamba tënë ti Nzapa awe, ala tokua Pierre na Jean na ala.

¹⁵ So Pierre na Jean asi kâ, ala sambela ndali ti azo ti Samarii ni titene ala wara Yingo-Vuru.

¹⁶ Andaa Yingo-Vuru ade ti zu pepe na ndö ti mbeni oko na popo ti ala; lani ala wara gi bateme na iri ti *Kota Gbia Jésus.

¹⁷ Tongaso Pierre na Jean azia maboko na ndö ti ala si ala wara Yingo-Vuru.

¹⁸ So Simon abaa so Yingo-Vuru azu na ndö ti azo ndali ti so awatokua azia maboko na ndö ti azo ni, lo ga na ala nginza

¹⁹ si lo tene: “Ala mu nga na mbi ngangu so titene tongana mbi zia ande maboko na ndö ti zo, lo wara Yingo-Vuru.”

²⁰ Me Pierre akiri tënë na lo, atene: “Mo na nginza ti mo ni kue, ala gue na le ti wâ, ngbanga ti so nzoni ye so Nzapa ayeke mu na zo senge so, mo baa ti mo, mo tene, zo ayeke vo ni vongo na nginza!

²¹ Kua so e yeke sara ge so, mbeni ye ti mo oko wala tënë ti mo ayeke daa pepe, ngbanga ti so be ti mo ayeke mbirimbiri na le ti Nzapa pepe.

²² Mo zia lege ti sarango asioni ye ti mo so, mo sambela Kota Gbia titene tongana lege ayeke daa, lo yeke zi sioni tënë so mo leke na be ti mo so.

²³ Biani, mbi baa so sioni nzara ti warango ye asi singo na be ti mo si mo yeke ngbaa ti siokpari.”

²⁴ Simon akiri tënë, atene: “Ala wani asambela Kota Gbia ndali ti mbi si sioni so ala tene tënë ni so asi na mbi pepe.”

²⁵ Na peko ti so Pierre na Jean afa tënë ti ye so ala hinga na ndö ti Kota Gbia awe si ala fa nga tënë ti lo awe, ala mu lege ti kiri na Jérusalem. Na lege, ala yeke fa Nzoni Tënë na ya ti akete kodro mingi ti Samarii.

Philippe na mbeni kota zo ti kodro ti Etiopii

²⁶ *Ange ti *Kota Gbia atene na Philippe: “Londo, mo gue na mbage ti Mbongo, na lege so alondo na Jérusalem azu ti gue na Gaza. Azo akiri ahon na lege ni so pepe.”

²⁷ Lo londo hio si lo gue. Andaa mbeni *mbaiwa ti Etiopii so ayeke kota wabatango-mosoro ti Kandas, gbia-wali ti Etiopii, ague na Jérusalem ti voro Nzapa.

²⁸ Na kiringo ti lo, lo duti na ndö ti pusu ti mbarata si lo yeke diko mbeti ti Wayanga-Nzapa Ésaïe.

²⁹ Yingo atene na Philippe: “Mo gue, mo tengbi na pusu ti mbarata so.”

³⁰ Philippe akpe, ague si lo wara zo ti Etiopii so ayeke diko mbeti ti wayanga-Nzapa Ésaïe. Lo hunda lo, lo tene: “Mo ma ya ti tënë so mo yeke diko so?”

³¹ Koli ni akiri tënë, atene: “So mbeni zo ti fa nda ni na mbi ayeke daa pepe so, mbi lingbi ti ma ya ni tongana nyen?” Lo hunda na Philippe ti duti na tere ti lo na ndö ti pusu ti mbarata ni.

³² Kamba ti tënë so lo yeke diko so atene: “A gue na lo tongana mbeni taba so azo ayeke gue na lo na ndo ti fango anyama; a gue na lo tongana molenge ti taba so ayeke buburu na gbe ti zo so ayeke fâ kua ti tere ti lo. Lo zi yanga ti lo oko pepe.

³³ So lo sara tere ti lo kete so, mbeni wafango-ngbanga ti lo na legeni ayeke daa pepe. Zo wa laa alingbi ti tene ande tënë ti *ahale ti lo? Fini ti lo na ndö ti gigi so ahunzi awe.”

³⁴ Mbaiwa ni ahunda Philippe, atene: “Mbi gbu gere ti mo, tene na mbi: zo wa laa wayanga-Nzapa ni ayeke tene tënë ti lo so? Lo tene tënë ni na ndö ti lo wani wala na ndö ti mbeni zo nde?”

³⁵ Philippe amu tënë; na ndö ti kamba ti mbeti ti Ésaïe so, lo to nda ti fa Nzoni Tënë ti Jésus na lo.

³⁶ So ala ngba na lege ti gue, ala si na ndo so ngu ayeke daa. Mbaiwa ni atene: “Baa, ngu laa; nyen laa akanga lege na mbi ti wara bateme?” [

³⁷ Philippe atene: “Tongana mo ma na be biani, mo lingbi ti wara bateme senge.” Mbaiwa ni atene: “Mbi ma na be so Jésus Christ ayeke Molenge ti Nzapa.”]

³⁸ Lo mu yanga titene pusu ti mbarata ni aluti. Philippe na mbaiwa ni, ala use kue azu na ya ti ngu si Philippe abatize lo.

³⁹ So ala sigigi na ya ti ngu ni awe, Yingo ti Kota Gbia amu Philippe ahon na lo si mbaiwa ni akiri abaa lo pepe. Lo mu lege ti gue na ngia na be ti lo.

⁴⁰ Ti Philippe, lo si na gbata ti Azot. So lo yeke tambula na lege, lo yeke fa Nzoni Tënë na ya ti agbata so kue lo yeke hon daa. Lo gue ngbii lo si na gbata ti Sezare.