Awafango-ngbanga 9 - Mbeti ti Nzapa - Tënë so amu fini

Abimelek aga gbia na Sishem

¹ Abimelek, molenge ti Yerubaal, ague na Sishem ti baa akoya ti lo nga na asewa ti mama ti lo kue. Lo tene na ala:

² “Ala gue, ahunda akota zo ti gbata ti Sishem, atene: ‘Ala ye titene zo oko laa aduti na ndö ti ala? Wala ala ye titene amolenge balembarambara ti Yerubaal kue laa aduti na ndö ti ala? Ayeke nzoni ala dabe ti ala atene, mbi yeke mene ti ala!’ ”

³ Akoya ti Abimelek alondo si ague, atene peko ti tënë so kue na akota zo ti Sishem. Ala kue be ti ala aye gi Abimelek, ngbanga ti so ala tene: “So ita ti e laa!”

⁴ Tongaso ala mu na Abimelek ale ti nginza balembarambara so ayeke na ya ti da ti nzapa Baal-Berit. Lo mu nginza so, lo futa na agodobe nga na azo ti kirikiri titene ala mu peko ti lo.

⁵ Lo londo, lo gue na da ti babâ ti lo so ayeke na Ofra. Kâ, lo fâ a-ita ti lo, amolenge ti Yerubaal balembarambara kue; lo fâ ala gi na ndö ti têne oko. Zo so asoo kuâ ayeke gi ngambe ni so iri ti lo Yotam, ngbanga ti so lo honde tere ti lo.

⁶ Akota zo ti gbata ti Sishem na azo ti Bet-Milo kue abongbi tere ti ala. Ala gue na tere ti keke ti shene so ayeke na Sishem; keke ni ayeke na tere ti kota têne so a leke ni si aluti na nduzu. Kâ, ala mu Abimelek si lo ga gbia.

Toli ti Yotam

⁷ Azo ague, atene tënë ni na Yotam. Tongaso lo gue, lo luti na li ti hoto ti Garizim; lo dekongo, lo tene: “Ala akota zo ti Sishem, ala ma mbi si fade Nzapa ama ala!

⁸ “Mbeni lâ, akeke alondo ti gue ti soro mbeni mba ti ala titene lo ga gbia ti ala. Ala tene na keke ti olive: ‘Le-gbia na ndö ti e!’

⁹ Me keke ti olive atene: ‘Anzapa na azo aye tënë ti mafuta ti mbi mingi. Ala baa ti ala atene, fade mbi yeke zia lege ti sarango mafuta ni titene mbi baa pasi senge senge na kua ti lengo-gbia na ndö ti amba ti mbi?’

¹⁰ Tongaso, akeke atene na keke ti fige: ‘Mo so, ga, mo le-gbia na ndö ti e!’

¹¹ Me keke ti fige akiri tënë: ‘Ala baa ti ala atene, fade mbi yeke zia lege ti apendere nzerengo lengo ti mbi ti gue ti baa pasi senge senge na kua ti lengo-gbia na ndö ti amba ti mbi?’

¹² Akeke atene na keke ti *vinye: ‘Mo so, ga, mo le-gbia na ndö ti e!’

¹³ Me keke ti vinye akiri tënë: ‘Ala baa ti ala atene, mbi yeke zia lege ti vin ti mbi so ayeke zia ngia mingi na be ti anzapa na ti azo ti gue ti baa pasi senge senge na kua ti lengo-gbia na ndö ti amba ti mbi?’

¹⁴ Tongaso akeke kue atene na keke ti ki: ‘Mo so, ga, mo le-gbia na ndö ti e!’

¹⁵ Keke ti ki akiri tënë: ‘Tongana ala ye biani ti soro mbi titene mbi ga gbia ti ala, ayeke nzoni ala ga aduti na gbe ti de ti mbi. Tongaso pepe, fade wâ ayeke sigigi na ya ti mbi ti gbi akeke ti sedre ti Liban kue.’ ”

¹⁶ Yotam angba ti tene tënë, lo tene: “Ayeke na nzoni be wala na legeni laa ala yeda ti soro Abimelek titene lo ga gbia so? So nzoni ye laa ala sara na Yerubaal na asewa ti lo so? Anzoni ye so lo sara na ala so, peko ni laa ala kiri na ni na lo so?

¹⁷ Babâ ti mbi atiri ando bira ndali ti ala; lo ka tere ti lo na kuâ titene lo zi ala na maboko ti azo ti Madian.

¹⁸ Me ti ala, ala londo laso ti ke babâ ti mbi nga na azo ti sewa ti lo; ala fâ amolenge ti lo balembarambara kue gi na ndö ti têne oko; ala zia Abimelek lo ga gbia. Andaa lo yeke mbeni molenge so babâ ti mbi adu lo na mbeni wali so ayeke sara kua na lo. Ala mu Abimelek titene lo ga gbia na ndö ti akota zo ti Sishem, ngbanga ti so lo yeke ita ti ala.

¹⁹ Tongana, ayeke na nzoni be wala na legeni laa ala sara laso tongaso na Abimelek na asewa ti lo, ayeke nzoni lo mu ngia na ala, ala nga, ala mu ngia na lo.

²⁰ Tongana ayeke tongaso pepe, ayeke nzoni wâ asigigi na ya ti Abimelek agbi akota zo ti Sishem nga na azo ti Bet-Milo. Ayeke nzoni wâ asigigi nga na ya ti akota zo ti gbata ti Sishem na azo ti Bet-Milo agbi Abimelek.”

²¹ Na pekoni, Yotam akpe, lo gue, lo honde tere ti lo na Beera, ngbanga ti so lo sara mbeto ti ita ti lo Abimelek.

Azo ti Sishem atomboka na tere ti Abimelek

²² Abimelek ale-gbia ngu ota na ndö ti azo ti Israel.

²³ Na pekoni, Nzapa atokua mbeni yingo ti kangbi na popo ti Abimelek na akota zo ti gbata ti Sishem. Nilaa akota zo ni alondo ti ke lo.

²⁴ Tongaso si sioni so Abimelek asara, lo wara ye ti peko ni, ngbanga ti so lo fâ a-ita ti lo, amolenge ti Yerubaal balembarambara kue. Ti azo ti Sishem, sioni so ala sara, ala wara ye ti peko ni, ngbanga ti so ala mu maboko na Abimelek titene lo fâ a-ita ti lo.

²⁵ Nilaa akota zo so ayeke na Sishem ahonde *azaragina na li ti ahoto si ala yeke nzi akungba ti azo so kue ayeke hon na lege. Abimelek ama tënë ni.

²⁶ Mbeni lâ Gaal, molenge ti Ebed asi na Sishem, lo na a-ita ti lo; akota zo ti Sishem azia be ti ala na ndö ti lo.

²⁷ Ala londo ague na yaka ti *vinye ti ala, ala ko ale ti vinye ni, ala pete ni; na pekoni ala leke mbeni matanga. Ala gue na ya ti da ti nzapa ti ala, ala te, ala nyon si ala deba Abimelek.

²⁸ Gaal, molenge ti Ebed ahunda ala, atene: “Abimelek ni ayeke ti lo zo wa? Nyen laa abongbi lo na azo ti Sishem titene e duti angbaa na gbe ti lo? Yerubaal ayeke babâ ti lo si Zebul ayeke zo ti tokua ti lo pepe? Ti ala, ala ngba na gbe ti Hamor, lo so lo sara si Sishem abaa ando gigi so. Me ti e, e hinga ndani so e lingbi ti sara ngbaa na gbe ti Abimelek pepe.

²⁹ Ti mbi, tongana ala zia tënë ti azo ti Sishem na maboko ti mbi, ka mbi yeke tumba Abimelek na ndö ti mbata ti gbia ni.” Na pekoni lo tene na Abimelek: “Mo zia ambeni turugu na ndö ti aturugu ti mo, mo ga, e tiri bira!”

³⁰ So Zebul, govoronere ti gbata ni ama tënë so Gaal molenge ti Ebed atene, ngonzo ti lo alondo tongana wâ.

³¹ Lo tokua azo na hondengo ni ti tene na Abimelek, atene: “Gaal, molenge ti Ebed, lo na a-ita ti lo asi na Sishem awe, ala yeke pusu azo ti gbata ni titene ala ke mo.

³² Tongaso mbi hunda na mo ti londo gi na bi so, mo na azo ti mo, ala gue, ahonde tere ti ala na ya ti ngonda.

³³ Kekereke na ndaperere, tongana lâ asigigi awe, fade mo londo ti sara bira na azo ti gbata ni. Tongana Gaal na azo ti lo aga ti sara bira na mo, fade mo yeke sara na ala ye ti be ti mo.”

³⁴ Abimelek na azo ti lo akangbi ya ti ala osio; ala londo na bi si ala gue, ahonde tere ti ala nduru na Sishem.

³⁵ Na ngoi so Gaal, molenge ti Ebed asigigi si lo yeke luti na yanga ti gbata ni, Abimelek na azo ti lo alondo na ndo so ala honde tere ti ala daa so si ala sigigi.

³⁶ Gaal abaa ala si lo tene na Zebul: “Baa, gba ti azo laa alondo na li ti hoto kâ si ayeke zu so!” Zebul akiri tënë na lo: “So yingo ti ahoto laa, mo baa mo tene, azo so!”

³⁷ Gaal akiri atene: “Taa-tënë, gba ti azo laa alondo na li ti hoto so a iri ni ‘Turungu ti sese’ si ayeke zu so. Ambeni zo ni amu lege ti keke ti shene ti Azo ti Bango nda ti aye si ayeke ga.”

³⁸ Zebul akiri tënë na lo: “Yanga ti mo so lani ayeke za so ayeke na ndo wa fadeso? Mo tene na e lani, mo tene: ‘Abimelek ni ayeke ti lo zo wa si e duti na gbe ti lo so?’ Azo so mo yeke zonga ala lani so, ala laa ayeke ga so. Fadeso, gue, mo tiri bira na ala ma!”

³⁹ Gaal asigigi, lo mu li ni si lo na akota zo ti Sishem ague ti tiri bira na Abimelek.

⁴⁰ Abimelek atumba peko ti Gaal ngbii; me Gaal akpe na le ti lo. Gba ti azo so awara angangu ka ati na lege ngbii asi na yanga ti gbata ni.

⁴¹ Na pekoni, Abimelek ague, asara kodro na Aruma. Me Zebul angba ti lo gi ti tumba peko ti Gaal na a-ita ti lo. Lo gbanzi lege na ala ti kiri ti sara kodro na Sishem.

⁴² Lango oko na pekoni, azo ti gbata ti Sishem aleke tere ti ala ti gue na yaka; Abimelek ama tënë ni,

⁴³ lo mu azo ti lo, lo kangbi ya ti ala ota si ala honde tere ti ala na ngonda. So ala baa azo ti Sishem ayeke sigigi na ya ti gbata ni, ala londo na ngonda si ala ga atiri bira na azo ni.

⁴⁴ Abimelek na mbeni bongbi ti azo so ayeke na lo, ague si akanga lege na ndo so azo ayeke li daa na ya ti gbata ni. Tanga ti abongbi use so ague ti ala na tere ti azo so ayeke na yaka. Ala ti na ndö ti azo ni si afâ ala gbani gbani.

⁴⁵ Ti londo na ndaperere ngbii asi na lakui, Abimelek angba ti sara bira na ya ti gbata ni. So lo mu gbata ni awe, lo fâ azo ti gbata ni kue kue kue; lo kungbi nga na sese aye so kue ayeke na ya ti gbata ni, na pekoni lo lu ingo na ndo ni.

⁴⁶ So akota zo ti Migdal-Sishem ama tënë so, ala kue amu lege, ala gue na ya ti kubu so a leke si ayeke na gbe ti da ti nzapa Baal-Berit.

⁴⁷ Azo ague, atene na Abimelek: “Akota zo ti gbata ti Sishem abongbi tere ti ala na ndo so.”

⁴⁸ Tongaso, Abimelek na azo ti lo ague na li ti hoto ti Salmon. Lo mu do, lo fâ na maboko ti mbeni keke si lo zia na ndö ti go ti lo. Lo tene na azo ti lo ni: “Ala baa ye so mbi sara so? Ala sara tongana ti so mbi sara so hio!”

⁴⁹ Zo oko oko afâ maboko ti keke si ala mu peko ti Abimelek. Ala do amaboko ti keke ni na yanga ti kubu so ayeke na gbe ti da ti nzapa ni si ala bi wâ daa; ala gbi kubu ni nga na azo so kue ayeke na ya ni. Nilaa azo ti Migdal-Sishem kue akui, akoli na awali so wungo ti ala aga nduru na saki oko.

Abimelek akui

⁵⁰ Na pekoni, Abimelek amu lege, lo gue na gbata ti Tebes. Lo ngoro gbata ni si lo mu ni na bira.

⁵¹ Andaa na be ti gbata ni, mbeni kota da so ayo na nduzu ayeke daa; ngangu gbagba ayeke na tere ni. Akoli, awali nga na akota zo ti gbata ni kue ague, ahonde tere ti ala na ya ni. Ala kanga ayanga ti da ni kue na ndö ti ala si ala gue na ndo so a leke na li ti da ni titene azo aduti daa.

⁵² Abimelek aga, lo si na tere ti da ni, lo sara bira titene lo mu da ni; lo gue nduru na tere ti yanga ti da ni titene lo bi wâ daa.

⁵³ Me mbeni wali amu ngbongboro têne ti nikango na ye, lo bo na li ti Abimelek si bio ni asuru.

⁵⁴ Abimelek airi zo ti yongo aye ti bira ti lo hio, lo tene na lo: “Sigigi na yongoro zeme ti mo, mo fâ mbi, tongaso si azo ahe mbi pepe, atene: wali laa afâ lo!” Nilaa maseka-koli ni amu zeme ti lo, ayoro na ya ti Abimelek si Abimelek akui.

⁵⁵ So azo ti Israel abaa atene, Abimelek akui awe, zo oko oko akiri na ndo ti lo.

⁵⁶ Nzapa asara si sioni so Abimelek asara na babâ ti lo, sioni ni akiri gi na li ti lo wani, so lo fâ lani a-ita ti lo balembarambara so.

⁵⁷ Nzapa asara nga si sioni so azo ti Sishem asara, sioni ni akiri gi na li ti ala wani. Nilaa dengo ba so Yotam, molenge ti Yerubaal, ade na li ti ala, dengo ba ni aga taa-tënë biani.