Awafango-ngbanga 4 - Mbeti ti Nzapa - Tënë so amu fini

Debora na Barak

¹ Na peko ti kuâ ti Ehud, azo ti Israel akiri asara ye so ayeke sioni na le ti *KOTA GBIA.

² Nilaa KOTA GBIA azia ala na maboko ti Yabin, gbia ti Kanaan; lo yeke lango na gbata ti Hasor. Makonzi ti aturugu ti lo ayeke Sisra; Sisra ayeke lango ti lo na Harosheth-Goim.

³ Yabin ayeke na apusu ti bira ngbangbo gumbaya so a sara na wen; lo sara sana na azo ti Israel na ya ti ngu baleuse. Tongaso azo ti Israel adekongo na KOTA GBIA titene lo mu maboko na ala.

⁴ Na ngoi ni so, Debora ayeke wayanga-Nzapa; lo yeke wali ti Lapidot; Debora ayeke nga wafango-ngbanga na kodro ti Israel.

⁵ Lo yeke duti na gbe ti keke ti mburu so a iri ni “Keke ti mburu ti Debora”; ndo ni ayeke na popo ti gbata ti Rama na Betel, na sese ti Efraim, na ndo so ahoto ayeke daa. Kâ laa azo ti Israel ayeke gue ti baa lo titene lo fâ ya ti angbanga ti ala.

⁶ Mbeni lâ, Debora atokua ti iri Barak, molenge ti Abinoam. Barak ayeke na kodro ti Kedesh na sese ti Neftali. Debora atene na lo: “KOTA GBIA, Nzapa ti Israel amu yanga atene, mo londo, mo gue, mo mu akoli saki baleoko na popo ti azo ti mara ti Neftali na ti Zabulon, mo gue na ala na ndö ti hoto ti Tabor.

⁷ Fade mbi yeke pusu Sisra, makonzi ti aturugu ti Yabin titene lo mu apusu ti mbarata ti lo na aturugu ti lo kue ti ga ti tiri bira na mo na tere ti kete ngu ti Kishon. Kâ, fade mbi yeke zia lo na maboko ti mo.”

⁸ Barak akiri tënë na Debora, atene: “Tongana mbi na mo, e gue, fade mbi yeke gue, me tongana mo gue na mbi pepe, fade mbi nga, mbi yeke gue pepe.”

⁹ Debora atene: “Fade mbi na mo, e yeke gue. Me ayeke nzoni mo hinga, mo tene, mo yeke wara gonda ndali ti bira so pepe, ngbanga ti so KOTA GBIA ayeke zia ande Sisra na maboko ti senge wali.” Debora alondo si ague na Kedesh, lo na Barak.

¹⁰ Barak airi azo ti mara ti Zabulon na ti Neftali ti bongbi na Kedesh. Akoli saki baleoko alondo si amu peko ti lo; Debora nga ague na lo.

¹¹ Heber, zo ti kete mara ti Keni akangbi na azo ti mara ti lo, azo ti sewa ti Hobab, kogara ti Moïse. Heber ague, aleke da ti lo ti bongo nduru na kodro ti Kedesh, na gbe ti kota keke ti shene ti kodro ti Saananim.

¹² Sisra ama a tene, Barak, molenge ti Abinoam, asi na hoto ti Tabor awe.

¹³ Tongaso, Sisra alondo si lo bongbi apusu ti bira so a sara na wen, wungo ni ayeke ngbangbo gumbaya. Lo bongbi aturugu ti lo kue, ala londo na Harosheth-Goim si ala gue na tere ti kete ngu ti Kishon.

¹⁴ Debora atene na Barak: “Londo! Baa, lango so KOTA GBIA aleke titene Sisra ati na maboko ti mo alingbi awe! KOTA GBIA wani laa ayeke tambula na dawa ti mo.” Barak alondo na li ti hoto ti Tabor si lo zu, lo na aturugu saki baleoko so ayeke na peko ti lo.

¹⁵ KOTA GBIA azia kota wusuwusu na popo ti aturugu nga na apusu ti Sisra; ala kue akpe kirikiri na dawa ti ayongoro zeme ti azo ti Israel. Sisra alondo na ya ti pusu ti bira ti lo, lo zu na sese si lo zia gere daa.

¹⁶ Barak atumba peko ti apusu ti bira ni nga na aturugu ni ngbii lo si na Harosheth-Goim. Lo fâ aturugu ti Sisra kue, mbeni oko angba pepe.

¹⁷ Sisra akpe na gere ngbii, lo si na da ti bongo ti Yael, wali ti Heber, zo ti kete mara ti Keni. Andaa na ngoi ni so, siriri ayeke na popo ti azo ti da ti Heber na gbia Yabin ti gbata ti Hasor.

¹⁸ Yael asigigi ayamba Sisra si lo tene na lo: “Kota zo, li na da ti mbi! Sara mbeto pepe!” Sisra ali na da ti Yael si lo honde Sisra na gbe ti balangeti.

¹⁹ Sisra atene na Yael: “Mbi gbu gere ti mo, mu na mbi ngu kete mbi nyon; nzara ti ngu ahon ndö ti mbi.” Yael azi yanga ti ngbenda so a leke na poro ti nyama, lo tuku ngu ti me ti bagara so ayeke na ya ni si lo mu na lo ti nyon. Na pekoni, lo kiri lo bi balangeti ni na ndö ti lo.

²⁰ Sisra akiri atene na Yael: “Mo luti na yanga ti da ti bongo ni; tongana mbeni zo aga, ahunda mo, atene: ‘Zo ayeke na ndo so?’ Fade mo kiri tënë na lo: ‘Ên-en!’ ”

²¹ Sisra akui na lango; Yael, wali ti Heber amu mbeni nduru keke so a kpo ni ti gbu da ti bongo, lo mu nga martoo, lo gue yeke-yeke, lo si na tere ti Sisra si lo kpo li ti lo na keke ni; keke ni asigigi na mbage ti li ti lo si ali na ya ti sese. Lege so Sisra akui laa.

²² Barak angba ti tumba peko ti Sisra. So lo si awe, Yael asigigi ayamba lo si atene na lo: “Mo ga, mbi fa na mo koli so mo yeke gi lo so.” Barak ali na da ti Yael, lo baa gi kuâ ti Sisra laa alango na sese; keke ti da ni angba na ya ti li ti lo.

²³ Na lango ni so, Nzapa asara si Yabin, gbia ti Kanaan ati na gbe ti azo ti Israel.

²⁴ Ala sara ngangu mingi na Yabin; ala gue na lo ngbii ala fâ lo.