Awafango-ngbanga 2 - Mbeti ti Nzapa - Tënë so amu fini

KOTA GBIA asuku na azo ti lo

¹ *Ange ti *KOTA GBIA alondo na Gilgal asi na Bokim. Lo tene na azo ti Israel: “Mbi laa mbi sara si ala sigigi na kodro ti Ezipte si mbi gue na ala na kodro so mbi deba yanga ti mbi ti mu na akotara ti ala. Mbi tene, mbi yeke kiri ti buba pepe *mbuki so mbi na ala e sara.

² Me mbi mu yanga na ala titene ala na azo ti kodro so aga ambuki pepe. Fade ala kungbi agbalaka ti azo ni kue na sese. Me ala ma yanga ti mbi pepe. Nyen laa ala sara so, nyen?

³ Tongaso mbi tene: ‘Fade mbi yeke tumba azo ni na dawa ti ala pepe; azo ni ayeke ngba na popo ti ala, anzapa ti azo ni ayeke duti tongana kuku ndali ti ala.’ ”

⁴ So ange ti KOTA GBIA atene tënë so na azo ti Israel kue awe, azo ni kue ati na toto.

⁵ Tongaso ala di iri ti ndo ni Bokim si ala mu *sandaga na KOTA GBIA na ndo ni so.

Josué akui

⁶ Na pekoni, Josué azia azo ti Israel titene zo oko oko ague, amu sese so akangbi na lo titene aga ye ti lo.

⁷ Azo ti Israel asara na *KOTA GBIA na ngoi so kue Josué angba na fini. Na peko ti kuâ ti lo, ala ngba ti sara na KOTA GBIA. Ala ngba ti sara na lo na ngoi so kue *akangba so ade na fini abaa ando akota ye so KOTA GBIA asara na azo ti Israel.

⁸ Josué, molenge ti Nune, zo ti kua ti KOTA GBIA, akui na ngu ngbangbo oko na baleoko.

⁹ A lu lo na Timnat-Heres, sese so a mu na lo titene aga ti lo na sese ti Efraim, ndo so ahoto ayeke daa, na Banga ti hoto ti Gaash.

¹⁰ Na pekoni, azo so kue a du ala na ngoi ti Josué akui, ala mu peko ti ababâ ti ala. Ambeni zo so a du ala na peko, ala hinga KOTA GBIA pepe, ala hinga nga pepe aye so lo sara ndali ti azo ti Israel.

Azo ti Israel ado KOTA GBIA azia

¹¹ Azo ti Israel asara ye so ayeke sioni na le ti *KOTA GBIA: ala voro anzapa *Baal.

¹² Ala do KOTA GBIA, Nzapa ti akotara ti ala azia, lo so lo sara si ala sigigi na kodro ti Ezipte so. Ala gue, avoro ambeni nzapa nde so ayeke anzapa ti azo so alango nduru na ala. Ala kuku na gbe ti anzapa ni si ala zia ngonzo na be ti KOTA GBIA.

¹³ Ala do KOTA GBIA azia, ala voro anzapa Baal na *Astarte.

¹⁴ KOTA GBIA asara ngonzo na tere ti azo ti Israel. Lo zia ala na maboko ti azo ti gbungo ye ti azo si azo ni agbu aye ti ala kue. Lo ka ala na awato ti ala so alango nduru na ala; ala lingbi ti gbu le ni na awato ti ala mbeni pepe.

¹⁵ Lakue tongana ala yeke gue na bira, KOTA GBIA ayeke sara kue titene a kinda ala alingbi gi na tënë ti yanga ti lo nga na deba so lo de na ala. Ala yeke na ya ti kota mawa.

¹⁶ Tongaso KOTA GBIA asara si awafango-ngbanga abaa na gigi. Kua ti awafango-ngbanga ni ayeke ti zi azo ti Israel na maboko ti azo ti gbungo aye ti azo.

¹⁷ Me azo ti Israel ama yanga ti awafango-ngbanga ti ala ni pepe. Biani, ala kuku akpo li ti ala na gbe ti anzapa nde. Gi hio tongaso, ala zia lege so akotara ti ala atambula ando daa; ambeni kotara ti ala ayeke azo so abata ndia ti KOTA GBIA; sarango ye ti ala akpa ti akotara ti ala ni pepe.

¹⁸ Lakue tongana KOTA GBIA amu mbeni wafango-ngbanga na ala, KOTA GBIA ayeke na lo; wafango-ngbanga ni ayeke zi azo ti Israel na maboko ti awato ti ala na ngoi so kue wafango-ngbanga ni angba na fini. KOTA GBIA ayeke baa mawa ti ala tongana ala yeke dema tere ndali ti pasi so ala yeke baa na gbe ti azo so ayeke sara sana na ala.

¹⁹ Me tongana wafango-ngbanga ni akui awe, ala kiri asara ye ti sioni mingi ahon ti akotara ti ala. Ala yeke gue na peko ti ambeni nzapa nde ti sara na ala, ala yeke kuku akpo li ti ala na sese na dawa ti anzapa ni. Ala zia asioni sarango ye ti ala wala ngangu li ti ala oko pepe.

KOTA GBIA atara be ti azo ti Israel

²⁰ Ngonzo ti *KOTA GBIA alondo tongana wâ na tere ti azo ti Israel si lo tene: “So azo ti mara ni abuba lege ti *mbuki so mbi na akotara ti ala e sara si ala ke ti ma yanga ti mbi so,

²¹ mbi nga, mbi yeke kiri ti tumba mbeni zo oko ti amara oko pepe, ambeni mara so lani Josué ade atumba ala pepe kozo si lo kui so.

²² Na lege ti amara ni, mbi yeke tara be ti azo ti Israel ti hinga, wala ala yeke bata ndia ti mbi si ala yeke sara ye alingbi na ni tongana ti so akotara ti ala asara ando.”

²³ Amara so KOTA GBIA azia ala lani na maboko ti Josué pepe, lo zia ala, ala ngba na ya ti kodro ni; lo tumba ala hio pepe.