Amos 9 - Mbeti ti Nzapa - Tënë so amu fini

Oku ye so Amos abaa: zo oko alingbi ti kpe fango ngbanga ti Nzapa pepe

¹ Mbi baa Kota Gbia aluti na nduzu na ndö ti gbalaka, lo tene: “Alingbi ala kungbi ali ti akota yongoro gere ti kota da ti Nzapa si agere ti da ni ayingi. Ala fâ li ti da ni si da ni atuku na ndö ti azo kue. Azo so angba na fini, fade mbi yeke sara si ala kui kuâ ti yongoro zeme; zo oko alingbi ti kpe pepe, zo oko alingbi ti soo kuâ pepe.

² Tongana ala kungbi yanga ti ndo ti akuâ ti li kâ, maboko ti mbi ayeke gbu ala ti sigigi na ala. Tongana ala gue ngbii asi na yayu kâ, mbi yeke sara si ala zu na sese.

³ Tongana ala gue, ahonde tere ti ala na li ti hoto ti Karmel, mbi yeke gue ti gi ala si mbi yeke gboto ala kâ. Tongana ala linda na gbe ti kota ngu-ingo titene le ti mbi abaa ala pepe, mbi yeke tokua sioni ngbo ti gue ti te ala kâ.

⁴ Tongana awato ti ala agbu ala ague na ala na kodro wande, kâ, mbi yeke mu yanga si a fâ ala kue. Le ti mbi ayeke ngba na ndö ti ala, mbi yeke sara sioni na ala, me mbi yeke sara nzoni na ala pepe.”

⁵ Kota Gbia NZAPA so ayeke na ndö ti dunia kue, tongana lo ndu sese na maboko ti lo, sese ni ayeke yingi si azo ti kodro ni kue ayeke duti na vundu. Sese ni kue ayeke londo na nduzu, na pekoni, ayeke kiri na gbeni tongana kota ngu ti Ezipte so asuku si akiri na gbeni.

⁶ Lo so lo leke ndo ti dutingo ti lo na yayu kâ, lo gbara le ti nduzu na ndö ti sese; lo so lo iri angu ti kota ngu-ingo ti ga si lo tuku ni na ndö ti sese, iri ti lo ayeke *KOTA GBIA.

Nzapa ayeke fâ ngbanga na ndö ti azo ti sioni

⁷ So tënë ti yanga ti *KOTA GBIA laa: “Ala azo ti Israel, na le ti mbi, ala ne ahon azo ti Etiopii? Mbi mu ala na sese ti Ezipte, mbi sigigi na ala, mbi mu nga azo ti Filistii na ti Kaftor, mbi sigigi na ala si mbi mu nga azo ti Sirii na ti Kir, mbi sigigi na ala. Tënë ni ayeke tongaso pepe?”

⁸ Baa, le ti Kota Gbia NZAPA ayeke na ndö ti kodro-gbia so siokpari asi singo na ya ni. So tënë ti yanga ti KOTA GBIA laa: “Fade mbi yeke zi kodro-gbia ni na ndö ti sese so, me mbi yeke hunzi *ahale ti Jacob kue pepe.

⁹ Ti fadeso, mbi yeke mu yanga titene a yengere azo ti Israel na popo ti azo ti amara nde tongana ti so a yeke yengere ale ti kobe si gi ale ti têne laa angba na ya ti yengere ni.

¹⁰ Asioni zo so ayeke na popo ti azo ti mbi, fade ala kue ayeke kui kuâ ti bira, ala so lani ayeke tene: ‘Fade kota kpale ayeke ndu e pepe, kpale ni ayeke si na e pepe!’ ”

Nzapa ayeke kiri ti mu kodro ti Israel na nduzu

¹¹ “Gbata ti David ayeke tongana mbeni da so atuku na sese awe. Na lango ni so, fade mbi yeke kiri ti yo ni na nduzu, mbi yeke kanga adu ti da ni, mbi yeke kiri ti leke da ni kue; mbi yeke sara si akiri aluti na nduzu tongana ti kozo.

¹² Tongaso, atanga ti sese ti azo ti mara ti Edom na ti amara nde, sese so a di iri ti mbi daa so, fade azo ti Israel ayeke mu ni titene aga ti ala.” So tënë ti yanga ti *KOTA GBIA laa, lo so lo yeke sara aye ni so.

¹³ So tënë ti yanga ti KOTA GBIA laa: “Alango ayeke ga so zo so angba ti fâ yaka, mo ye ti baa, zo ti fango ale ti kobe asi awe, zo so angba ti lu ale ti *ble, mo ye ti baa, zo ti fango ale ti vinye asi awe. Na lango ni so, fade fini vin ayeke londo na ndö ti akota hoto ti sua na sese, fini vin ni ayeke sua amu ndö ti akete hoto kue.

¹⁴ Fade mbi yeke sara si gigi ti azo ti Israel, azo ti mbi, akiri aga nzoni, ala yeke kiri ti leke agbata so abuba so, ala yeke lango na ya ti agbata ni, ala yeke fâ ayaka ti vinye, ala yeke nyon vin ni; ala yeke fâ ayaka si ala yeke te akobe ni.

¹⁵ Mbi yeke kiri na ala na ndö ti sese ti ala; sese so mbi mu na ala so, zo ayeke kiri ti tumba ala daa pepe.” Tënë so KOTA GBIA, Nzapa ti ala atene laa.