Amos 8 - Mbeti ti Nzapa - Tënë so amu fini

Osio ye so Amos abaa: sakpa ti ale ti kobe

¹ Ye so Kota Gbia NZAPA afa na mbi si mbi baa ni ayeke so: mbeni sakpa so abengo le ti keke ayeke na ya ni.

² Lo hunda mbi, lo tene: “Amos, nyen laa mo baa, nyen?” Mbi kiri tënë: “Mbi baa mbeni sakpa so abengo le ti keke ayeke na ya ni.” Tongaso *KOTA GBIA atene na mbi: “Awe! Ti azo ti mbi, Israel, ye ni abe awe! Mbi yeke kiri ti kanga le na ndö ti sioni ti ala mbeni pepe.

³ Na lango ni so, abia so azo ayeke he na yangbo ti gbia ayeke ga abia ti demango tere. Gba ti akuâ ayeke si singo na ndo kue, a yeke bi akuâ ni na ando kirikiri si ndo ayeke de ngii”; so tënë ti yanga ti Kota Gbia NZAPA laa!

Azo ti dengo buze ayeke azo ti nzi

⁴ Ala ma tënë so nzoni si, ala so ayeke te aye ti azo ti mawa na mbana so. Ataa asenge zo ti kodro ni, ala ye titene ala ngba na ya ti kodro ni pepe.

⁵ Ala yeke tene: “Lawa laa matanga ti fini nze ayeke hunzi si e lingbi ti ka kobe ti e so-oo? Lawa laa *lango ti wungo tere ayeke hunzi si e lingbi ti zi yanga ti ada ti kango ale ti kobe ti e so-oo? Fade e yeke pika ngbonda ti sembe ti hakango na ye, e yeke pusu ngere na nduzu, e yeke sanze kilo ti nzi azo na ni.

⁶ E yeke kiri ti ka asaka ti kobe ni na azo, e yeke vo azo ti mawa gi na kete nginza si awayere, e yeke vo ala gi na ngere ti pâpä.”

⁷ *KOTA GBIA adeba yanga ti lo ndali ti ye so Israel ayeke pika kate ti lo daa, lo tene: “Sarango ye ti azo ti Israel so, be ti mbi ayeke girisa na ni laoko pepe!”

⁸ Ndani laa, fade sese ayeke yingi si azo ti kodro ni kue ayeke duti na vundu. Fade sese ni kue ayeke londo na nduzu, na pekoni, ayeke kiri na gbeni tongana kota ngu ti Ezipte so asuku si akiri na gbeni.

⁹ So tënë ti yanga ti Kota Gbia NZAPA laa: “Na lango ni so, mbi yeke sara si lâ alinda na bekombite si ndo avuko pitipiti na kota lâ.

¹⁰ Fade mbi yeke sara si amatanga ti ala aga ngoi ti vundu; abia ti ala ayeke ga abia ti totongo kuâ. Fade mbi yeke sara si azo kue ayeke yu bongo ti mua si ala yeke kio kua ti li ti ala; mbi yeke sara si ala yeke sara mua tongana ti so a yeke sara mua ndali ti oko molenge ti ya ti sewa so akui. Na lango ni so, fade aye so kue ayeke hunzi na ya ti mawa.”

¹¹ So tënë ti yanga ti Kota Gbia NZAPA laa: “Alango ayeke ga so mbi yeke tokua kota nzara na ya ti kodro ni. Nzara ayeke sara azo, me ayeke nzara ti kobe pepe, wala nzara ti ngu pepe; nzara ni ayeke nzara ti mango tënë ti KOTA GBIA.

¹² Fade azo ayeke tambula tongana ti azo so nzara awoko ala, ti londo na mbage ti Mbongo ti si na mbage ti Do, ti londo na mbage ti Banga ti si na mbage ti To, ala yeke fono ti gi ti ma tënë ti KOTA GBIA, me ala yeke wara ni pepe.

¹³ “Na lango ni so, apendere maseka-wali na amaseka-koli ayeke kui nzara ti ngu.

¹⁴ Azo so kue ayeke deba na iri ti sioni yanda ti Samarii, ala so kue ayeke deba, atene: ‘nzapa ti Dan ayeke na fini!’, ‘lege ti vorongo nzapa ti Bersheba ayeke daa.’ Fade azo so kue ayeke ti na sese, ala yeke kiri ti londo pepe.”