Amos 6 - Mbeti ti Nzapa - Tënë so amu fini

Mawa na akota zo ti kodro ti Israel

¹ Mawa na ala, azo so alango kpoo na gbata ti *Sion! Mawa na ala, azo so alango na ndö ti hoto ti Samarii si ala baa atene, mbeni sioni ye ti sarango ala ayeke daa pepe so! Azo ayeke baa ala tongana akota zo mingi na popo ti amara si azo ti Israel ayeke ga gi na mbage ti ala!

² Ala gue, abaa gbata ti Kalne; ala londo na ndo so ala gue na Hamat, kota gbata. Na pekoni, ala zu ague na Gat, gbata ti azo ti Filistii. Nyen laa agbata so ahon akodro ti ala na ni, nyen? Sese ti azo ni akono ahon ti ala?

³ Ala yeke gi lege ti pusu lango ti mawa ni yongoro, andaa ala yeke sara si sarango ngangu na zo aga na ya ti kodro.

⁴ Ala yeke lango na ndö ti gbogbo so a sara na pembe ti doli; ala yeke lango na ya ti ayongoro ngende, ala yeke te akete taba nga na akete bagara ti mafuta so a soro ala na ya ti gbagba ti batango ala.

⁵ Ala yeke pika kundi kirikiri ti he na bia. Titene ala sara ye tongana David, ala yeke sigigi na afini ye ti mozoko.

⁶ Ala yeke nyon vin na ya ti akota kopo, ala yeke sara mafuta so afun nzoni na tere ti ala, me be ti ala ayeke so oko pepe ndali ti ye ti ngangu so ayeke si na azo ti mara ti Joseph.

⁷ Ndani laa, fadeso ala yeke akozo zo so a yeke gbu ala ti gue na ala na kodro wande. Matanga ti ala ahunzi awe, azo ti sopo!

Gbata ti Samarii ayeke buba

⁸ *KOTA GBIA adeba yanga ti lo, atene: “Na iri ti mbi Nzapa, mbi ke na be ti mbi kue baba ti Jacob, be ti mbi ake apendere da ti lo. Fade mbi yeke zia gbata ti Samarii kue na maboko ti awato”; so tënë ti yanga ti KOTA GBIA, Nzapa so ayeke na ndö ti dunia kue laa.

⁹ Tongana azo baleoko angba na ya ti da oko, fade ala kue ayeke kui.

¹⁰ Tongaso, mbeni sewa oko ayeke mu akuâ ni na ya ti da ti gue ti gbi ni. Tongana mbeni zo angba na fini na ngbonda ti da ni kâ, sewa ni ayeke hunda lo, atene: “Mbeni zo ayeke na fini na tere ti mo kâ?” Zo ni ayeke kiri tënë: “Ên-en! Zo ayeke daa pepe.” Sewa ni ayeke kiri tënë, atene: “Kanga yanga ti mo! So ngoi ti dingo iri ti KOTA GBIA laa pepe!”

¹¹ Biani, KOTA GBIA amu gi yanga: akota da ayeke tuku na sese gburrr; ataa akete da ayeke suru kirikiri.

Asongo benda ti ala ayeke senge senge

¹² Laoko ambarata akpe loro na ndö ti akota têne? Laoko zo afâ yaka na abagara na ndö ti akota têne? Me ti ala, ala sara si sarango ye na lege ti ndia aga sioni yoro; ala sara si fango ngbanga ti mbirimbiri aga sioni yoro ti fango zo.

¹³ Ala yeke sara ngia, ngbanga ti so ala so benda na Lo-Dabar, gbata so ayeke ye oko pepe so. Na pekoni, ala yeke tene: “Ndali ti ngangu ti e laa e mu gbata ti Karnaim, ngangu gbata so!”

¹⁴ Me ti mbi, fade mbi yeke tokua na tere ti ala, azo ti Israel, mbeni mara ti sara ngangu na ala, ti londo na Banga ti Lebo-Hamat ngbii asi na tere ti kota ngu ti Gba-ti-ingo, na mbage ti Mbongo; so tënë ti yanga ti KOTA GBIA, Nzapa so ayeke na ndö ti dunia kue laa.