Amos 2 - Mbeti ti Nzapa - Tënë so amu fini

Fango ngbanga na ndö ti azo ti Moab

¹ Tënë so KOTA GBIA atene ayeke so: “Mbi yeke na tënë na azo ti Moab ndali ti asioni ye ota, wala osio so ala sara: ala gbi abio ti gbia ti azo ti Edom, ala gbi abio ni si aga fuku. Ndani laa, ngbanga so mbi fâ na li ti ala, mbi yeke kiri na ndö ni oko pepe.

² Fade mbi yeke bi wâ na ya ti kodro ti Moab si wâ ni ayeke gbi ayangbo ti gbata ti Keriot kue. Fade Moab ayeke kui na ya ti wusuwusu, na ya ti dekongo ti bira nga na ya ti hurungo didi.

³ Fade mbi yeke mingo kota makonzi so ayeke sara kua na ya ti kodro ni; mbi yeke fâ amakonzi ti lo kue legeoko na lo”; tënë so KOTA GBIA atene laa.

Fango ngbanga na ndö ti azo ti Juda

⁴ Tënë so KOTA GBIA atene ayeke so: “Mbi yeke na tënë na azo ti Juda ndali ti asioni ye ota, wala osio so ala sara: ala baa ndia ti mbi KOTA GBIA tongana mbumbuse ye, ala ke ti sara ye alingbi na ambela ti mbi; ala mu peko ti anzapa ti mvene tongana ti so akotara ti ala asara ando. Ndani laa, ngbanga so mbi fâ na li ti ala, mbi yeke kiri na ndö ni oko pepe.

⁵ Fade mbi yeke bi wâ na ya ti kodro ti Juda si wâ ni ayeke gbi ayangbo ti gbata ti Jérusalem kue.”

Fango ngbanga na ndö ti azo ti Israel

⁶ Tënë so KOTA GBIA atene ayeke so: “Mbi yeke na tënë na azo ti Israel ndali ti asioni ye ota, wala osio so ala sara: ala ka zo ti mbirimbiri ti wara na nginza, ala ka wayere ti wara na pâpä. Ndani laa, ngbanga so mbi fâ na li ti ala, mbi yeke kiri na ndö ni oko pepe.

⁷ Nzara ti mungo aye ti azo ti mawa ahon ndö ti ala, ataa fuku ti sese so ayeke na li ti ala; na le ti ngbanga, ala yeke sara si a fâ ngbanga ti asenge zo na legeni pepe. Molenge-koli na babâ ti lo ayeke lango gi na oko maseka-wali. Na sarango ye tongaso, ala yeke buba iri ti mbi so ayeke nde si ayeke nzoni kue.

⁸ Abongo so ala gbu na maboko ti awayere ndali ti boon so awayere ni amu, ala bi na sese, nduru na tere ti agbalaka si ala yeke lango na ndö ni. Vin so ala gbanzi, ala ayeke nyon ni na ya ti da ti anzapa ti ala.

⁹ Andaa mbi, mbi fâ ando azo ti mara ti Amori na dawa ti ala, mbi hunzi ala kue; azo ti Amori so ayo na nduzu tongana keke ti sedre si ala yeke na ngangu tongana keke ti shene so. Ti londo na li ti azo ni asi na gere ti ala, mbi fâ ala, mbi hunzi ala kue.

¹⁰ Kozoni, mbi mu ala, azo ti Israel na kodro ti Ezipte mbi sigigi na ala, mbi fa lege na ala na ya ti benyama ngu baleosio titene ala gue, amu kodro ti mara ti Amori titene aga ti ala.

¹¹ Na pekoni, mbi soro na popo ti amolenge ti ala ti koli ambeni zo ti ga awayanga-Nzapa; mbi soro na popo ti ala ambeni maseka-koli titene ala deba yanga ti ala ti mu tere ti ala kue na mbi. Ala azo ti Israel, mvene laa mbi tene so? – so tënë ti yanga ti KOTA GBIA laa.

¹² Me azo so adeba yanga ti ala ti nyon vin pepe, ngbanga ti so ala mu tere ti ala kue na mbi, ala azo ti Israel, ala mu vin na azo ni ti nyon. Ala kanga lege na awayanga-Nzapa ti tene peko ti atënë ti yanga ti mbi.

¹³ “Fade mbi yeke nika ala tongana ti so pusu so ayo nengo gba ti kobe ayeke nika sese na hongo ti lo.

¹⁴ Ataa azo so gere ti ala ayapu na mungo loro, ala lingbi ti kpe pepe; ataa azo so ayeke na ngangu mingi, ala lingbi ti sara ye na ngangu ti ala ni pepe; ataa angangu turugu, ala lingbi ti soo fini ti ala pepe.

¹⁵ Zo ti pikango kokora ayeke kiri ti gbu le ni pepe, nzoni zo ti kpengo loro ayeke ngba na fini pepe, zo ti kpengo na mbarata ayeke soo fini ti lo pepe.

¹⁶ Na lango ni so, ataa ngangu turugu so ayeke na mbeto pepe, lo yeke kpe tere ti lo ndumbu”; so tënë ti yanga ti KOTA GBIA laa.