Amato 5 - Mbeti ti Nzapa - Tënë so amu fini

Hange na wali ti gingo akoli kirikiri

¹ Molenge ti mbi, mo ma atënë ti ndara ti mbi; dingi mê ti mo na atënë ti hingango ndo ti mbi.

² Tongaso, fade mo yeke bata atënë ti mbi so ayeke sara si le ti mo ahan si mo yeke hinga nda ti atënë so mo yeke tene.

³ Biani, wali ti mbeni zo nde, atënë ti yanga ti lo anzere tongana mafuta ti wotoro, atënë ti lo ni awoko zo ahon mafuta.

⁴ Me agbe ti tënë ti lo ni asee tongana sengo pere, ayeke kpo zo tongana yongoro zeme so yanga ni aza mbage na mbage.

⁵ Lege ti dutingo ti lo ayeke gue na kuâ; agere ti lo ayeke gue na ndo ti akuâ.

⁶ Lege so ayeke gue na zo na fini, lo mu ti lo ni pepe; lo girisa lege awe, me lo hinga pepe.

⁷ Fadeso, amolenge ti mbi, ala ma mbi si; ala ke atënë ti mbi pepe.

⁸ Mo ngba yongoro na tere ti mara ti wali tongaso; mo ga nga nduru na yanga ti da ti lo pepe.

⁹ Tongaso pepe, fade lo yeke bi nengo ti mo na sese si mbeni koli so ayeke baa mawa ti zo pepe, ayeke buba fini ti mo;

¹⁰ awande laa ayeke te ye, ya ti ala asi na lege ti ngangu kua ti mo; azo nde laa ayeke baa nzoni na peko ti kua ti mo.

¹¹ Na ndani, fade mo yeke dema tongana ngangu ahunzi na ya ti tere ti mo kue.

¹² Fade mo yeke tene: “Azo agboto mê ti mbi, mbi ke ngbanga ti nyen? Azo asuku na mbi, mbi yeda pepe ngbanga ti nyen?

¹³ Mbi ke ti ma yanga ti awafango-ye ti mbi ngbanga ti nyen? Mbi dingi mê ti mbi ti ma ala pepe ngbanga ti nyen?

¹⁴ Angba kete ka akpale ti ngangu ahon ndö ti mbi na ya ti bongbi ti azo ti mbi.”

Mo ye wali ti ngoi ti maseka ti mo

¹⁵ Wali ti mo ayeke tongana li ti ngu ti mo wani; mo nyon gi ngu so asigigi na ya ti li ti ngu ti mo ni!

¹⁶ Mo zia ngu ti li ti ngu ti mo asua na gigi pepe; mo zia ni asua na ndö ti abalabala pepe!

¹⁷ Mo bata ngu ni gi ndali ti mo oko, mo kangbi ni na awande pepe!

¹⁸ Mo sara si li ti ngu ti mo awara ngia. Ayeke nzoni mo wara ngia ti mo gi na lege ti wali so mo mu lo na ngoi so mo de maseka.

¹⁹ Lo yeke woko be ti mo tongana tagba; lo yeke pendere tongana dengbe. Ayeke nzoni pendere ti tere ti lo azia ngia na be ti mo lakue! Ayeke nzoni nzara ti lo asara mo lakue tongana ti so samba ayeke sara zo!

²⁰ Molenge ti mbi, ngbanga ti nyen si nzara ti wali ti mbeni zo nde asara mo tongana ti so samba asara zo? Ngbanga ti nyen si mo gbu wali so ayeke ti mo pepe na kate ti mo?

²¹ KOTA GBIA abaa lege ti dutingo ti azo oko oko kue. Lo baa sarango ye kue ti ala mbirimbiri.

²² Sarango ye ti kirikiri ti zo wani laa akanga lo; siokpari ti lo agbu lo tongana kuku.

²³ Fade zo ni ayeke kui, ngbanga ti so a gboto mê ti lo gbaa; kota buba ti lo ayeke sara lo tongana samba.