Amato 3 - Mbeti ti Nzapa - Tënë so amu fini

Ndara nga na mango yanga ti Nzapa

¹ Molenge ti mbi, aye so mbi fa na mo, mo girisa ni pepe; bata atënë ti ndia ti mbi na ya ti be ti mo.

² Tongaso, fade gigi ti mo ague, ayo, mo yeke duti na fini aninga si mo yeke duti na siriri.

³ Ayeke nzoni mo zia ti sara nzoni be pepe, mo zia ti bata tënë ti yanga ti mo pepe; mo kanga ni na go ti mo tongana ye ti go, mo su ni na be ti mo tongana mbeti.

⁴ Tongaso, fade Nzapa na azo ayeke ye tënë ti mo; ala yeke gonda mo ndali ti zingo le ti mo.

⁵ Mo zia be ti mo na ndö ti hingango ndo ti mo wani pepe, me mo zia be ti mo kue na ndö ti KOTA GBIA.

⁶ Na ya ti sarango ye ti mo kue, mo dabe ti mo na lo; lo laa lo yeke leke lege so fade mo yeke tambula daa.

⁷ Mo baa tere ti mo wani tongana zo ti ndara pepe, me mo kpe mbeto ti KOTA GBIA; mo zia lege ti sioni ye.

⁸ Fade ayeke ga yoro ndali ti tere ti mo; ayeke sara si mo kiri mo wara ngangu.

⁹ Mo ne KOTA GBIA na mungo na lo aye ti mo; mo mu na lo akozo le ti kobe ti mo.

¹⁰ Tongaso, fade agogoro ti mo ayeke si singo na kobe; ndo so mo yeke bata vin ti mo daa, vin ayeke si singo daa si ayeke tuku.

¹¹ Molenge ti mbi, tongana KOTA GBIA agboto mê ti mo, mo ke pepe; tongana lo suku na mo, mo baa ni tongana mbumbuse ye pepe.

¹² Biani, zo so KOTA GBIA aye lo, lo yeke suku na lo tongana ti so babâ ayeke suku na molenge ti lo so lo ye lo mingi.

Ndara ayeke mu anzoni ye na zo

¹³ Ti lo nzoni, zo so awara ndara si lo ga zo ti hingango ndo!

¹⁴ Tongana zo awara ndara, lo yeke baa nzoni daa ahon warango nginza; nzoni ye so lo wara daa ahon lôro.

¹⁵ Ndara ahon atêne ti ngangu ngere. Na popo ti aye so kue zo asara nzara ni, mbeni ye ti lingbi na ni ayeke daa pepe.

¹⁶ Na mbage, ndara ayeke mu na zo fini so ayo; na mbeni mbage, lo yeke mu nga na lo mosoro na gonda.

¹⁷ Alege so lo yeke gue na zo daa anzere mingi; sioni ye oko ayeke si na zo na alege ni so pepe.

¹⁸ Ndara ayeke tongana keke so ayeke mu fini na azo so asara ye alingbi na ni. Lo yeke zia ngia na be ti azo so awara ni.

¹⁹ Na lege ti ndara ti lo, KOTA GBIA asara sese; na lege ti hingango ye ti lo, lo leke yayu.

²⁰ Na lege ti hingango ye ti lo, ngu so ayeke yongoro na gbe ti sese kâ asigigi, mbinda asara si ngu apika.

KOTA GBIA ayeke bata zo ti ndara

²¹ Molenge ti mbi, ayeke nzoni hango le na nzoni gbungo-li aga aye ti tere ti mo; alingbi mo zia ni laoko pepe.

²² Fade ala yeke sara si mo duti na taa fini nga na fini so anzere.

²³ Tongaso, mo yeke tambula, mbeni ye ti sara mo ayeke daa pepe; mbeni ye ti gbu gere ti mo titene mo ti ayeke daa pepe.

²⁴ Tongana mo yeke gue ti lango, mbeto ti mbeni ye oko ayeke sara mo pepe; tongana mo lango, lango ni ayeke nzere mingi.

²⁵ Ye ti mbeto so ayeke si gburrr wala azo ti sioni so ayeke tuku na ndö ti mo, fade mo yeke sara mbeto ti ala pepe.

²⁶ Biani, fade KOTA GBIA ayeke bata mo nzoni; lo yeke zia titene kuku agbu gere ti mo pepe.

Ayeke nzoni mo ye mba ti mo zo

²⁷ Tongana mo lingbi ti sara nzoni na zo so ye atia lo, alingbi mo ke ti sara ni pepe.

²⁸ Tongana ye ayeke daa titene mo mu na mba ti mo fafadeso, mo tene na lo pepe, mo tene: “Ita, mo gue. Kekereke si mbi mu na mo ye ni.”

²⁹ Mba ti mo so aduti nduru na mo si lo zia be ti lo na ndö ti mo so, mo gbu li ti mo ti sara sioni na lo pepe.

³⁰ Zo so asara sioni na mo pepe, mo papa na lo senge senge pepe.

³¹ Azo ti sarango ngangu na amba ti ala, mo sara kota be na tere ti ala pepe; mo manda lege ti sarango ye ti ala pepe.

³² Biani, be ti KOTA GBIA ake mingi azo so ake lege ti lo, me lo yeke fa atënë ti be ti lo na azo ti mbirimbiri.

³³ KOTA GBIA ayeke deba da ti azo ti sioni, me lo yeke sara tufa na ndö ti da ti azo ti mbirimbiri.

³⁴ Lo yeke he azo ti hengo ndo, me lo yeke sara nzoni be na azo so asara tere ti ala kete.

³⁵ Ye so ayeke ga ti azo ti ndara ayeke gonda; me ti azo ti buba, kamene ayeke gbu le ti ala.