Amato 21 - Mbeti ti Nzapa - Tënë so amu fini

¹ Tënë ti be ti gbia ayeke na ya ti maboko ti KOTA GBIA tongana kete ngu so ayeke sua. KOTA GBIA ayeke hon na atënë ti be ni na ndo so kue be ti lo wani aye.

² Zo oko oko ayeke baa na le ti lo atene, aye so kue ni yeke sara ayeke na legeni; me KOTA GBIA laa ayeke baa atënë ti be ti zo.

³ Sarango ye ti mbirimbiri na sarango ye na legeni anzere na KOTA GBIA ahon mungo *sandaga.

⁴ Le so abaa zo tongana mbumbuse ye nga na kate so asuku na baba, aye so afa polele na gigi siokpari ti zo.

⁵ Zo so agbu li ti lo na ndö ti ye so lo ye ti sara, fade lo yeke wara ye gbani gbani; me zo so asara ye na loro na loro, ye ayeke tia lo.

⁶ Azo so aye ti wara mosoro na lege ti tenengo mvene ayeke gi kuâ; ye so ala wara ayeke tongana guru so pupu amu ahon na ni.

⁷ Ye ti ngangu so azo ti sioni ayeke sara asara si fini ti ala agirisa, ngbanga ti so ala ke ti sara ye alingbi na tënë ti ndia.

⁸ Zo so tënë ayeke na li ti lo, lege ti lo ayeke gue kirikiri; me zo so tënë ayeke na li ti lo pepe, sarango ye ti lo ayeke na legeni.

⁹ Ti lango na gigi na gbe ti mbeni gbefa ayeke nzoni ahon ti lango na ya ti da oko na wali so aye tënë ti papa mingi.

¹⁰ Nzara ti be ti zo ti sioni ayeke gi ti sara sioni; ataa kamarade ti lo, lo yeke sara nzoni be na lo pepe.

¹¹ Tongana a pika zo ti hengo ndo, zo so le ti lo ahan pepe ayeke wara ndara. Tongana a fa ye na zo ti ndara, lo yeke kiri ti hinga ye mingi ahon ti kozoni.

¹² Le ti zo ti mbirimbiri angba na ndö ti aye so ayeke si na da ti azo ti sioni; lo yeke pusu ala ti ti na ya ti kpale.

¹³ Zo so akanga mê ti lo ti ma toto ti zo ti mawa, na ndembe so zo ni ayeke dekongo, zo oko ti mango lo ayeke nga daa pepe.

¹⁴ Kadoo so a yeke mu na hondengo ni ayeke sara si ngonzo ti zo ade; nzoni ye so a yeke pete na ya ti maboko ti zo ayeke kai ngonzo ti wâ ti lo.

¹⁵ Sarango ye alingbi na tënë ti ndia ayeke zia ngia na be ti zo ti mbirimbiri; me ayeke zia kota mbeto na be ti zo ti sarango asioni ye.

¹⁶ Zo so azia lege ti hingango ndo, fade lo yeke gue ti wu tere ti lo na ya ti bongbi ti akuâ.

¹⁷ Zo so aye ti sara matanga mingi, fade aye mingi ayeke tia lo; zo so aye gi samba na apendere kobe, lo yeke ga zo ti mosoro laoko pepe.

¹⁸ Pasi so alingbi fade ti si na azo ti mbirimbiri nga na azo so sarango ye ti ala ayeke na legeni, fade pasi ni ayeke kiri ti ti na ndö ti azo ti sioni nga na azo ti sarango ye na mayere.

¹⁹ Ti duti na benyama ayeke nzoni ahon ti duti na ndo oko na wali so aye ngonzo na tënë ti papa mingi.

²⁰ Na da ti zo ti ndara, gba ti anzoni ye na apendere kobe ayeke daa; me zo ti buba abuba ti lo aye ni kue.

²¹ Zo so ayeke gi lege ti sara ye ti mbirimbiri nga na nzoni be, fade gigi ti lo ague, ayo; azo ayeke sara ye na lo na lege ti mbirimbiri si ala yeke ne lo.

²² Mbeni gbata so ngangu gbagba ayeke na tere ni, zo ti ndara alingbi ti li daa, lo mu ni senge. Gbagba so azo ti gbata ni azia fade be ti ala na ndö ni, lo yeke kungbi ni kue na sese.

²³ Zo so abata yanga ti lo nga na menga ti lo, lo bata nga tere ti lo titene ye ti ngangu asi na lo pepe.

²⁴ Zo ti baba so abaa azo tongana mbumbuse ye, a iri lo “zo-ti-hengo-ndo”; sarango ye na kuru baba ahon ndö ti lo.

²⁵ Nzara ti aye nde nde ayeke fâ zo ti sopo, ngbanga ti so lo ye ti sara kua pepe.

²⁶ Ti londo na ndaperere ngbii asi na lakui, sarango nzara ti aye ahon ndö ti lo; me zo ti mbirimbiri amu ye na azo, lo gbanzi tanga ni pepe.

²⁷ Sandaga ti azo ti sioni ayeke ye ti sioni mingi. Sandaga so ayeke sioni ahon ndoni ayeke ti so ala mu na sioni be.

²⁸ Zo so atene mvene na le ti ngbanga, fade lo yeke kui; me zo so ahinga ti ma tënë, fade azo ayeke mu tënë na lo lakue.

²⁹ Zo ti sioni asara tere ti lo tongana zo so alingbi awe; me zo ti mbirimbiri ayeke sara si mbeni ye ayeke yingi dutingo ti lo pepe.

³⁰ Ataa ndara ti zo, ataa hingango ye ti zo, ataa gbungo-li ti zo, aye so kue ayeke ye oko pepe na le ti KOTA GBIA.

³¹ A yeke leke ambarata ti ku na lango ti bira; me KOTA GBIA oko laa ayeke sara si zo aso benda.