Amato 16 - Mbeti ti Nzapa - Tënë so amu fini

KOTA GBIA laa ayeke mu maboko na zo ti sara ye nzoni

¹ Azo ayeke leke apialo, me tanga ti tënë ni kue ayeke na yanga ti KOTA GBIA.

² Zo oko oko ayeke baa na le ti lo atene, aye so kue ni yeke sara ayeke nzoni; me KOTA GBIA laa ayeke baa atënë ti be ti zo.

³ Ye so mo yeke sara, mo zia ni na maboko ti KOTA GBIA si fade apialo ti mo ayeke ga nzoni.

⁴ Ye so kue KOTA GBIA asara, nda ni ayeke daa. Ataa zo ti sioni, lo sara lo ti ku na lango ti ye ti sioni.

⁵ Be ti KOTA GBIA ake azo ti baba mingi. Biani, fade peko ni ayeke ngba senge na ala pepe.

⁶ Zo so asara nzoni be na amba ti lo si azo alingbi ti zia be ti ala na ndö ti lo, a yeke zi sioni ti lo. Kpengo mbeto ti KOTA GBIA asara si zo akpe lege ti sioni ye.

⁷ Tongana KOTA GBIA ayeda na lege ti sarango ye ti mbeni zo, ataa awato ti zo ni, lo yeke leke songo na popo ti lo na ala.

⁸ Kete ye ti zo so lo wara na legeni, so laa ayeke nzoni ahon gba ti mosoro so zo awara na lege ti likisi.

⁹ Zo ayeke leke na be ti lo ti mu mbeni lege, me KOTA GBIA laa ayeke mu ngangu na lo ti tambula daa.

Tënë na ndö ti agbia

¹⁰ Gbia ayeke tene tënë na lege ti ngangu so a mu na lo. Tongana lo yeke fâ ya ti ngbanga, lo yeke mu mbage ti zo pepe.

¹¹ Kilo so ayeke mbirimbiri nga na sembe ni kue ayeke ti KOTA GBIA; lo laa lo yeke baa tënë ti akilo kue.

¹² Be ti agbia ake mingi tënë ti sarango ye ti sioni, ngbanga ti so sarango ye ti mbirimbiri laa ayeke sara si mbata ti ala aluti mbirimbiri.

¹³ Be ti gbia anzere na azo so ayeke tene tënë ti mbirimbiri; lo ye azo so ayeke tene taa-tënë.

¹⁴ Tongana ngonzo asara gbia, lo lingbi ti fâ zo; me zo ti ndara alingbi ti de be ti lo.

¹⁵ Tongana ngia amu yanga ti gbia, azo ayeke duti na fini; nzoni be ti lo ayeke tongana ngu-Nzapa so ayeke sara titene tere ti zo ade.

Lege ti dutingo ti zo na popo ti amba ti lo

¹⁶ Titene zo awara ndara, so laa ayeke nzoni ahon titene lo wara lôro ti nzoni ni. Titene zo awara hingango ndo, so laa ayeke nzoni ahon titene lo wara wen ti nginza.

¹⁷ Azo so sarango ye ti ala ayeke na legeni, ala yeke kpe lege ti sioni ye; zo so aye ti bata fini ti lo, lo yeke sara hange na lege ti dutingo ti lo.

¹⁸ Kuru baba ayeke gue na zo titene lo baa sioni; zo so abaa mba ti lo tongana senge zo, lo yeke gue ti ti.

¹⁹ Titene zo aduti tongana senge zo na popo ti azo ti mawa, so laa ayeke nzoni ahon titene lo na azo ti baba akangbi na popo ti ala akungba so ala gbu na peko ti bira.

²⁰ Zo so agbu li ti lo nzoni na ndö ti mbeni ye, lo yeke baa nzoni daa; zo so azia be ti lo na ndö ti KOTA GBIA, ti lo nzoni!

²¹ Zo so ayeke gbu li ti lo na ndara, lo yeke zo ti hingango ye. Zo so atene anzerengo tënë na mba ti lo, fade mba ti lo ni ayeke yeda na lo.

²² Hingango ndo ayeke tongana li ti ngu so ayeke mu fini na zo so ayeke na ni. Me pika so azo ti buba ayeke wara ayeke ye ti buba ti ala wani.

²³ Zo so ayeke gbu li ti lo na ndara, lo yeke gbu li ti lo kozoni si lo tene tënë; azo kue ayeke yeda na lo tongana lo tene tënë.

²⁴ Anzerengo tënë ayeke tongana mafuta ti wotoro; anzere na yanga ti zo si ayeke sara titene zo aduti na nzoni tere.

²⁵ Mbeni zo alingbi ti baa atene, lege ti sarango ye ti ni ayeke mbirimbiri, andaa lege ni ayeke gue na kuâ.

²⁶ Nzara ti ya ti zo ti kua ayeke pusu lo ti sara kua; nzara laa ayeke gue na lo ti sara kua.

²⁷ Mbumbuse zo aleke na be ti lo ti sara sioni ye; atënë ti yanga ti lo ayeke gbi zo tongana wâ.

²⁸ Zo ti handango ndo ayeke sara si papa alondo; zo so ayeke du mvene na li ti azo, lo yeke bi kangbi na popo ti akamarade.

²⁹ Zo ti sarango ngangu na zo, lo yeke handa amba ti lo si lo yeke gue na ala na sioni lege.

³⁰ Zo so akanga le ti lo si lo te poro ti yanga ti lo titene lo leke na be ti lo ti sara sioni, andaa lo sara ni awe.

³¹ Vuru kua ti li ayeke tongana pendere kpoto so amu nengo na zo; zo so awara ni ayeke zo so atambula na lege ti mbirimbiri.

³² Zo so ayeke sara ngonzo hio hio pepe, lo yeke nzoni lo hon mbeni ngangu zo ti bira. Zo so akanga anzara ti be ti lo, lo yeke nzoni lo hon zo so amu mbeni gbata na bira.

³³ Azo ayeke bi ye ti hinga na nda ti ye; tanga ti tënë kue ayeke na yanga ti KOTA GBIA.