Amato 15 - Mbeti ti Nzapa - Tënë so amu fini

¹ Kiringo tënë na nzoni be asara si ngonzo ade; me tënë ti songo be asara si ngonzo alondo.

² Tënë ti azo ti ndara ayeke zia nzara ti mandango ye na be ti zo; me ti azo ti buba, gi abuba tënë laa ayeke sigigi na yanga ti ala.

³ Le ti KOTA GBIA asi na ndo kue; lo yeke baa azo ti sioni na azo ti nzoni.

⁴ Tënë so ayeke mu ngangu na be ti zo ayeke tongana keke so ayeke mu fini na zo; tënë ti handa asara si be ti zo afun.

⁵ Zo ti buba abaa ye so babâ ti lo agboto mê ti lo daa tongana mbumbuse ye; me zo so aye titene a suku na lo, lo yeke zo ti hango le.

⁶ Ya ti da ti zo ti mbirimbiri asi singo na mosoro; me aye so zo ti sioni awara aga na akpale na ndö ti lo.

⁷ Atënë ti zo ti ndara ayeke mu lege na zo ti hinga ye; me gbungo-li ti zo ti buba ayeke mbeni ye nde!

⁸ Be ti KOTA GBIA ake mingi *sandaga ti azo ti sioni; me be ti lo anzere na sambela ti azo ti mbirimbiri.

⁹ Be ti KOTA GBIA ake mingi lege ti sarango ye ti azo ti sioni; me lo ye azo so ayeke gi lege ti sara ye ti mbirimbiri.

¹⁰ Zo so azia nzoni lege, fade a yeke pika lo ngangu. Zo so ake titene a gboto mê ti lo, lo yeke kui.

¹¹ Aye so asi na ndo ti akuâ, na ya ti *kota du so alinda mingi, KOTA GBIA ahinga ni kue. Ye so ayeke na ya ti be ti zo, lo lingbi ti hinga ni pepe?

¹² Zo ti hengo ndo aye titene a gboto mê ti lo pepe; lo yeke gue ti baa azo ti ndara pepe.

¹³ Be ti zo so ayeke na ngia asara si le ti lo ayeke na ngia; me tongana zo ayeke na vundu, be ti lo awoko kue.

¹⁴ Zo so ayeke gbu li ti lo ayeke gi lege ti hinga ye; me ti azo ti buba, ye ti buba laa aga kobe ti ala ti tengo ni.

¹⁵ Ti zo ti mawa, alango kue ayeke sioni; me zo so gigi anzere na lo, lo yeke na ya ti matanga lakue.

¹⁶ Kete ye so zo ayeke na ni si lo kpe mbeto ti KOTA GBIA, so laa ayeke nzoni ahon gba ti mosoro so gingo be mingi ayeke daa.

¹⁷ Tengo kugbe ti kasa na ndo so yengo tere ayeke daa ayeke nzoni ahon tengo bagara ti mafuta na ndo so kengo tere ayeke daa.

¹⁸ Zo so be ti lo wâ wâ asara si papa alondo; me zo so ayeke kanga be ti lo asara si tiri akai.

¹⁹ Lege ti zo ti sopo asi singo na akeke ti ki; me lege ti azo ti mbirimbiri, a de ni nzoni.

²⁰ Molenge ti ndara ayeke mu ngia na babâ ti lo; me zo ti buba abaa mama ti lo tongana mbumbuse zo.

²¹ Zo so li ti lo ayeke daa pepe awara ngia na lege ti aye ti buba; me zo so ahinga ndo amu lege so ayeke mbirimbiri.

²² Tongana zo ahunda wango na amba ti lo pepe, apialo ti lo ayeke li ngu; me tongana azo ti mungo wango ayeke daa mingi, apialo ni ayeke ga nzoni.

²³ Titene zo akiri tënë nzoni, so laa anzere. Tënë so zo atene na ndembe so alingbi, so ayeke nzoni mingi!

²⁴ Zo ti ndara ayeke mu lege so ague na nduzu ti duti na fini; lo yeke kpe lege so azu na gbeni, na ndo ti akuâ.

²⁵ KOTA GBIA ayeke kungbi na sese da ti azo ti baba; me lo yeke bata sese ti wali-mua titene zo andu ni pepe.

²⁶ Be ti KOTA GBIA ake mingi tënë ti sioni pialo; me atënë so zo atene na nzoni be, sioni ye oko ayeke daa pepe.

²⁷ Zo so ayeke wara mosoro na legeni pepe, lo yeke ga na kpale na ya ti sewa ti lo. Me zo so ake tënë ti petengo goro, lo yeke ngba na fini.

²⁸ Zo ti mbirimbiri ayeke gbu li ti lo kozoni si lo kiri tënë; me zo ti sioni ayeke de na gigi asioni tënë.

²⁹ KOTA GBIA angba yongoro na tere ti azo ti sioni; me lo yeke ma sambela ti azo ti mbirimbiri.

³⁰ Le ti zo so ayeke na ngia ayeke mu ngia na be ti zo; nzoni sango ayeke mu ngangu na zo.

³¹ Zo so adingi mê ti lo ti ma atënë ti gbotongo mê so ayeke mu fini na zo, lo yeke duti na popo ti azo ti ndara.

³² Zo so ake wango abi tere ti lo na sese; me zo so aye titene a gboto mê ti lo, lo yeke ga zo ti hingango ndo.

³³ Kpengo mbeto ti KOTA GBIA ayeke fa na zo lege ti dutingo na ndara. Kozo titene zo awara gonda, ayeke nzoni lo sara tere ti lo kete si.